ចិនៈ យោងតាមសុន្ទរកថា ដែលបានរៀបចំដោយលោក លី កេឈាំង នាយករដ្ឋមន្ត្រីចិន នៅឯពិធីបើកកិច្ចប្រជុំសភាប្រចាំឆ្នាំ ក្នុងប្រទេសនៅថ្ងៃច័ន្ទនេះ បានឲ្យដឹងថា រដ្ឋាភិបាលក្រុងប៉េកាំង នឹងមិនអត់ឱនឲ្យនោះទេ ជុំវិញផែនការបំបែកខ្លួនណាមួយ របស់កោះតៃវ៉ាន់ ដែលចង់បានការគ្រប់គ្រងខ្លួនឯង ដោយអះអាងថា នឹងការពារបូរណភាពដែនទឹកដីរបស់ចិន។ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃទី៥ ខែមីនា ឆ្នាំ២០១៨។
រដ្ឋាភិបាលក្រុងប៉េកាំង បានបង្ហាញពីការមិនពេញចិត្ត ជុំវិញសេចក្តីព្រាងច្បាប់ថ្មីមួយរបស់អាមេរិក ដើម្បីធ្វើឲ្យប្រសើរឡើងនូវទំនាក់ទំនងរវាងក្រុងវ៉ាស៊ីនតោន និងតៃប៉ិ ដោយព្រមានទៅកាន់កោះតៃវ៉ាន់ថា វានឹងធ្វើឲ្យកើនកម្ដៅកាន់តែខ្លាំង ប្រសិនបើតៃប៉ិ ចង់ពឹងផ្អែកបរទេស ដើម្បីផ្ដាច់ខ្លួនពីនយោបាយចិនតែមួយនោះ។
កាលពីថ្ងៃព្រហស្បតិ៍ ព្រឹទ្ធសភាអាមេរិក បានអនុម័តជាឯកច្ឆន្ទនូវច្បាប់ធ្វើដំណើរទស្សនកិច្ចទៅកាន់តៃវ៉ាន់ (TTA) ដើម្បីពង្រឹងទំនាក់ទំនងរវាងប្រទេសទាំងពីរ ក៏ដូចជាបង្កើនឱកាសអាជីវកម្ម សម្រាប់អ្នកតំណាងសេដ្ឋកិច្ចតៃវ៉ាន់ នៅអាមេរិកផងដែរ។
ពាក់ព័ន្ធនឹងបញ្ហានេះ លោក លី បានបញ្ជាក់ថា ចិននឹងរក្សាជំហរដ៏រឹងមាំ ក្នុងការការពារអធិបតេយ្យភាព ក៏ដូចជាបូរណភាពដែនដីរបស់ខ្លួន ហើយនឹងមិនអត់ឱនទ្បើយ ចំពោះផែនការបំបែករដ្ឋ ឬសកម្មភាពណាមួយ សម្រាប់ឯករាជ្យភាពរបស់កោះតៃវ៉ាន់៕
មតិយោបល់