បរទេស: ភាពតានតឹងរវាងអ៊ីស្រាអែល និងប៉ាឡេស្ទីន បានឈានដល់កម្រិតមួយ ដែលមិនធ្លាប់មានពីមុនមក បន្ទាប់ពីការសម្រេចចិត្តរបស់ប្រធានាធិបតីអាមេរិកលោក ដូណាល់ ត្រាំ ប្រកាសទទួលស្គាល់ទីក្រុងយេរូសាឡឹមថា ជារដ្ឋធានីរបស់អ៊ីស្រាអែល ។ នេះបើយោងតាមសារព័ត៌មាន Sputnik ចេញផ្សាយនៅថ្ងៃទី២៦ ខែមីនា ឆ្នាំ២០១៨។

កាលពីយប់ថ្ងៃអាទិត្យប្រព័ន្ធការពារមីស៊ីល Iron Dome របស់អ៊ីស្រាអែល បានបង្ហាញសញ្ញានៃការធ្វើសកម្មភាពខុសឆ្គង នៅតាមបណ្តោយព្រំដែន ជាមួយតំបន់ហ្គាហ្សាស្ទ្រីប។

ពាក់ព័ន្ធនឹងបញ្ហានេះ កងកម្លាំងការពារអ៊ីស្រាអែល (IDF) បាននិយាយថា ពុំមានគ្រាប់រ៉ុកកែត ត្រូវបានគេបាញ់ចេញពីប្រព័ន្ធការពារមីស៊ីល ទៅកាន់តំបន់ព្រំដែនរបស់ប៉ាឡេស្ទីននោះទេ។

អ្នកនាំពាក្យរបស់ IDF លោកឧត្តមសេនីយ៍ Ronen Manelis បាននិយាយថា កងទ័ពនឹងស៊ើបអង្កេតមូលហេតុបច្ចេកទេស សម្រាប់ស៊ីរ៉ែនរ៉ុក្កែត និងការបាញ់ប្រព័ន្ធការពារមីស៊ីល Iron Dome៕