អាមេរិក: ប្រធានាធិបតីអាមេរិកលោក ដូណាល់ ត្រាំ នៅថ្ងៃអង្គារនេះ បានប្ដេជ្ញាថា នឹងដាក់ពង្រាយកងទ័ព ដើម្បីការពារព្រំដែនភាគខាងត្បូងរបស់អាមេរិក ខណ:ដែលក្រុមជនអន្តោប្រវេសន៍ ​បានធ្វើដំណើរ​ឆ្លងចូលអាមេរិក ​តាម​រយ:ព្រំដែន​ភាគខាងត្បូង​ជាមួយ​នឹង​ប្រទេស​ម៉ិកស៊ិក​។ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃទី៤ ខែមេសា ឆ្នាំ២០១៨។

មេដឹកនាំអាមេរិក បានចំណាយពេល ៤ ថ្ងៃ ដើម្បីប្រឆាំងនឹងរដ្ឋាភិបាលម៉ិកស៊ិក ដោយសារតែមិនបានហាមឃាត់មនុស្សប្រមាណ ១,៥០០ នាក់ មកពីប្រទេសហុងឌូរ៉ាស ហ្គាតេម៉ាឡា និងអេលសាលវ៉ាឌ័រ ពីការដើររបស់ពួកគេមកកាន់សហរដ្ឋអាមេរិក។

ដោយលោក ត្រាំ បានប្រាប់អ្នកសារព័ត៌មានថា «រហូតមកដល់ពេលនេះ អាមេរិក អាចមានជញ្ជាំងការពារ និងសន្តិសុខដ៏ត្រឹមត្រូវ ហើយយើងនឹងការពារព្រំដែនរបស់យើង ជាមួយយោធា» ។

ក្នុងនោះលោកបានបន្ថែមថា «ពាក់ព័ន្ធនឹងបញ្ហានេះ លោកក៏បានធ្វើការពិភាក្សា ជាមួយរដ្ឋមន្ត្រីការពារជាតិ លោក James Mattis រួចហើយផងដែរ»៕