អាមេរិក: មន្ត្រីកូរ៉េខាងជើង បានប្រាប់សមភាគីអាមេរិក របស់ពួកគេថា លោក គីម ជុងអ៊ុន បានត្រៀមខ្លួនជាស្រេច ដើម្បីពិភាក្សាអំពីការលុបបំបាត់អាវុធនុយក្លេអ៊ែរ សម្រាប់កិច្ចប្រជុំកំពូលមួយ ជាមួយប្រធានាធិបតីអាមេរិកលោក ដូណាល់ ត្រាំ។ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃទី៩ ខែមេសា ឆ្នាំ២០១៨។

នេះគឺជាលើកទីមួយហើយ ដែលក្រុងព្យុងយ៉ាង ធ្វើការផ្តល់ជូនដោយផ្ទាល់ទៅកាន់ក្រុងវ៉ាស៊ីនតោន បន្ទាប់ពីទីប្រឹក្សាសន្តិសុខជាតិកូរ៉េខាងត្បូង លោក Chung Eui-yong បាន​ធ្វើ​ដំណើរ​ទៅ​កាន់​ប្រទេស​កូរ៉េខាងជើង ដោយបាន​យក​សារលិខិត​របស់​ប្រធានាធិបតី​កូរ៉េខាងត្បូង ទៅ​ប្រគល់​ជូន​លោក គីម ជុងអ៊ុន ព្រម​ទាំង​បាន​ពិភាក្សា ​ជាមួយ​មេដឹកនាំ​កូរ៉េខាងជើង​ផង​ដែរ។

ពាក់ព័ន្ធនឹងបញ្ហានេះ មន្រ្តីរដ្ឋបាលលោក ត្រាំ បានប្រាប់កាសែត The Wall Street Journal និង Washington Post កាលពីថ្ងៃអាទិត្យថា «រដ្ឋាភិបាលខ្លួន បានបញ្ជាក់ថា លោក គីម ជុងអ៊ុន ពិតមានឆន្ទ:ចង់ពិភាក្សា អំពីការលុបបំបាត់អាវុធនុយក្លេអ៊ែរ នៅលើឧបទ្វីបកូរ៉េ ជាមួយអាមេរិកប្រាកដមែន» ។

ស្របពេលដែលក្រុងវ៉ាស៊ីនតោន ក៏បានធ្វើឲ្យមានការភ្ញាក់ផ្អើលដល់ក្រុមអ្នកសង្កេតការណ៍ នៅពេលដែលអាមេរិក បានប្រកាសកាលពីខែមុនថា ខ្លួនបានយល់ព្រមបើកកិច្ចប្រជុំប្រវត្តិសាស្ត្រជាលើកដំបូង រវាងលោក ត្រាំ និងលោក គីម ដែលនឹងត្រូវរៀបចំឡើង នៅចុងខែឧសភាខាងមុខ៕