ក្រសួងសាធារណការ និងដឹកជញ្ជូន គ្រោងនឹងដាក់ដំណើរការ ស្ពានអាកាសស្តុបផ្សារដីហុយ ជាបណ្តោះអាសន្ន នៅក្នុងឱកាសពិធីបុណ្យចូលឆ្នាំប្រពៃណីខ្មែរខាងមុខនេះ ដើម្បីសម្រួលការធ្វើដំណើររបស់ប្រជាពលរដ្ឋ។
ប៉ុន្ដែបើទោះបីយ៉ាងណាក្ដី ស្ពានអាកាសស្តុបផ្សារដីហុយនេះ នឹងផ្អាកដំណើរការឡើងវិញ បន្ទាប់ពីពិធីបុណ្យចូលឆ្នាំខ្មែរត្រូវបានបញ្ចប់ ដើម្បីឱ្យក្រុមបច្ចេកទេស បញ្ចប់ការសាងសង់ ហើយក្រុមការងារបច្ចេកទេស ត្រូវការពេលយ៉ាងហោចណាស់ ក៏ពីរខែទៀតដែរ ក្រោយពិធីបុណ្យចូលឆ្នាំខ្មែររួច ដើម្បីរៀបចម្បង្ហើយ ការងារដែលនៅសល់។
ទន្ទឹមនេះ អ្វីដែលជាបញ្ហាដែលធ្វើឱ្យដំណើរការសាងសង់ មានភាពយឺតយ៉ាវនោះ គឺដោយសារតែ ការដកខ្សែចម្លងតុងស្យុងកាត់ទទឹងស្ពានអាកាស មិនទាន់ដោះស្រាយបានលឿន និងរួចរាល់នៅឡើយ។
ស្ពានអាកាសស្តុបផ្សារដីហុយ ស្ថិតនៅប្រសព្វរវាងមហាវិថីសហព័ន្ធរុស្ស៊ី និងផ្លូវហាណូយ ជាគម្រោងហិរញ្ញប្បទានរបស់ប្រទេសចិន និងទទួលបានសិទ្ធិសាងសង់ដោយក្រុមហ៊ុនសៀងហៃ ហើយត្រួតពិនិត្យបច្ចេកទេសដោយ ក្រសួងសាធារណការ និងដឹកជញ្ជូន។
គួរបញ្ជាក់ដែរថា បច្ចុប្បន្ន រាជធានីភ្នំពេញមានស្ពានអាកាសចំនួន ៤ គឺស្ពានអាកាសតិចណូ ស្ពានអាកាសក្បាលថ្នល់ ស្ពានអាកាសពេទ្យលោកសង្ឃ និងស្ពានអាកាសស្ទឹងមានជ័យ ហើយស្ពានអាកាសចោមចៅ គ្រោងនឹងសាងសង់ក្នុងពេលឆាប់ៗខាងមុខ៕
មតិយោបល់