Post News Media ព័ត៌មានអន្តរជាតិ មនុស្ស៦៥លាននា...

មនុស្ស៦៥លាននាក់ បាត់បង់ជម្រក និងផ្លាស់លំនៅ ព្រោះជម្លោះប្រដាប់អាវុធ

យូអិន: អង្គការសហប្រជាជាតិបានបញ្ចេញរបាយការណ៍មួយបង្ហាញថា ប្រជាជនរហូតដល់ ៦៥លាននាក់បានបង្ខំចិត្តផ្លាស់ប្តូរជម្រកដោយសារជម្លោះប្រដាប់អាវុធនៅទូទាំងពិភពលោកទាំងមូល។ អង្គការសហប្រជាជាតិក៏បានអំពាវនាវឲ្យមានការរួមគ្នាដោះស្រាយគំនិតស្អប់ខ្ពើមជាតិសាសន៍ដទៃនិងស្នើឲ្យអឺរ៉ុបចាត់ទុកជនភៀសខ្លួន និងជនអន្តោប្រវេសន៍ជាមនុស្សត្រូវការជំនួយមិនមែនឧក្រិដ្ឋជនឡើយ។

ចំនួនអ្នកភៀសខ្លួននិងបាត់បង់ជម្រកដោយសារជម្លោះប្រដាប់អាវុធនៅទូទាំងពិភពលោកទាំងមូលកើនឡើងដល់កម្រិតមួយមិនធ្លាប់មានក្នុងប្រវត្តិសាស្ត្រពិភពលោក ពោលគឺកើនដល់៦៥លាននាក់ឯណោះ។

ក្នុងចំណោមអ្នកទាំងនោះ មានប្រជាជនដែលបង្ខំចិត្តផ្លាសប្តូរជម្រកនោះមានមួយចំនួនគេចពីសង្គ្រាមស៊ីវិលស៊ូដង់ខាងត្បូង, បញ្ហាអសន្តិសុខបង្កដោយក្រុមជួញដូរគ្រឿងញៀននៅអាមេរិកកណ្តាល, និងពីសង្គ្រាមដែលបង្កឡើងដោយក្រុមភេរវជនដែស្ហ។ ប៉ុន្តែយផងតាមរបាយការណ៍អង្គការសហប្រជាជាតិ ភាគច្រើននៃប្រជាជនទាំងនោះផ្លាស់ប្តូរជម្រកនៅក្នុងទឹកដីប្រទេសពួកគេ ហើយប្រជាជនផ្សេងទៀតបង្ខំចិត្តធ្វើដំណើរផ្សងព្រេងដើម្បីសុំសិទ្ធិជ្រកកោននៅបរទេសជាពិសេសនៅប្រទេសអ្នកមានដូចអឺរ៉ុប។

យ៉ាងណាមិញ បញ្ហានៅត្រង់ថា ក្នុងចំណោមប្រជាជនដែលបាត់បង់ជម្រកហើយស្វែងរកសិទ្ធិជ្រកកោននោះមានកុមារតូចៗជិត១សែននាក់នោះ។ ជនភៀសខ្លួននិងជនអន្តោប្រវេសន៍ទាំងប្រុសស្រី ក្មេង និងចាស់សុទ្ធតែប្រឈមបញ្ហាច្រើននៅពេលដែលផ្សងព្រេងស្វែងរកលំនៅឬទីជម្រកថ្មីនៅប្រទេសថ្មី។  ដូចដែលឃើញស្រាប់ ប្រទេសមួយចំនួនជាពិសេសសហភាពអឺរុប បង្ហាញជំហមួយស្ទាក់ស្ទើរក្នុងការដោះស្រាយបញ្ហានៃការហូរចូលនៃជនភៀសខ្លួនមកអឺរ៉ុបតាមរយ:សមុទ្រមេឌឺទែរ៉ាណេ។

ទាក់ទិនបញ្ហានោះ ស្ថាប័នឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន បានបង្ហាញក្តីបារម្ភខ្លាំងចំពោះការកើនឡើងនៃចលនាស្អប់ខ្ពើមជាតិសាសន៍ដទៃដែលកំពុងរីកដុះដាលនៅអឺរ៉ុប។ ដែលសកម្មភាពនេះធ្វើឲ្យប្រជាជនដែលកំពុងស្វែងរកជំនួយនិងគេចពីបញ្ហាប្រឈមនោះ កាន់តែស្ថិតក្នុងស្ថានភានគ្រោះថ្នាក់និងអស់សង្ឃឹម។

ក្នុងពេលទស្សនកិច្ចកោះ Lesbos របស់ក្រិកដែលជាទីតាំងសម្រាប់ដាក់អ្នកសុំសិទ្ធិជ្រកកោនពីស៊ីរី អ៊ីរ៉ាក់ និងអាហ្វហ្កានីស្ថាន លោក បាន គីមូន អគ្គលេខាធិការអង្គការសហប្រជាជាតិ បានថ្កោលទោសការបិទព្រំដែន ដាក់រនាំបាំងបិទ និងសកម្មភាពព្រងើយកន្តើយនិងជ្រុលនិយមនានាដែលបានកើតឡើងកន្លងមក។  ហើយលោកក៏បានអំពាវនាវឲ្យបណ្តាប្រទេសអឺរ៉ុបបញ្ឈប់ការឃុំខ្លួនជនភៀសខ្លួន និងសកម្មភាពមិនសមរម្យផ្សេងទៀតដាក់ជនភៀសខ្លួន វាហាក់បីដូចជាពួកគេជាឧក្រិដ្ឋជនដូច្នេះដែរនោះ៕