Post News Media ព័ត៌មានអន្តរជាតិ មេដឹកនាំ​​បារ...

មេដឹកនាំ​​បារាំង ជំរុញ​អាមេរិក​ឲ្យ​រក្សា​ទុក​​កិច្ច​ព្រមព្រៀង​នុយក្លេអ៊ែរ ជាមួយ​អ៊ីរ៉ង់​

អាមេរិក: ប្រធានា​ធិបតី​បារាំងលោក អេម៉ានុយអែល ម៉ាក្រុង ​កាល​ពី​ថ្ងៃ​ពុធ​ បាន​ជំរុញសមាជិក​សភា​អាមេរិក ​កុំ​ឲ្យ​លុបចោល​កិច្ច​ព្រម​ព្រៀង​អន្តរជាតិ​ ជាមួយ​អ៊ីរ៉ង់​ ដើម្បី​ទប់ស្កាត់​ប្រទេស​នេះ ​កុំ​ឲ្យ​អភិវឌ្ឍ​អាវុធ​នុយក្លេអ៊ែរ។ នេះបើយោងតាមសារព័ត៌មាន Aljazeera ចេញផ្សាយនៅថ្ងៃទី២៦ ខែមេសា ឆ្នាំ២០១៨។

លោក​ ​ម៉ា​ក្រុង​ បាន​ប្រ​កាសនៅក្នុង​សុន្ទរកថា​មួយ ​ទៅ​កាន់​សភា​ទាំង២​​ថា ​អ៊ីរ៉ង់មិន​គួរ​មាន​អាវុធ​នុយក្លេអ៊ែរ​នោះទេ ​ក្នុង​រយ:​ពេល​៥ឆ្នាំ ​ឬ​១០​ឆ្នាំ​ទៅមុខទៀត​ក៏​ដោយ ​មិន​ត្រូវឲ្យ​មានជា​ដាច់​ខាត។

ដោយមេដឹកនាំរូបនេះ ​បានបន្ថែម​​ថា «យើង​ត្រូវ​ធ្វើ​ឲ្យ​ប្រាកដ​ថា ​មាន​ស្ថិរភាព ហើយ​មិន​លុបចោលកិច្ច​ព្រមព្រៀង​នោះ​ទេ ​ដោយលើកទ្បើង​ថា បារាំង​បាន​ចុះហត្ថលេខា​លើ​កិច្ច​ព្រម​ព្រៀង​នោះ​ ស្របតាម​ការ​ផ្តួចផ្តើម​របស់​អាមេរិក​ ដែល​បាន​ចរចា​ដោយ​អតី​ត​ប្រធានា​ធិបតី​​អាមេរិក​លោក បារ៉ាក់ ​អូបាម៉ា»។

សូមជំរាបថា ក្នុងអំទ្បុងពេលចរចា ជាមួយលោក ដូណាល់ ​ត្រាំ​នៅឯសេតវិមាន​កាលពី​ថ្ងៃ​អង្គារ ប្រធានា​ធិបតី​បារាំង ​​បាន​អំពាវនាវ​ឲ្យ​មានការ​ចរចា​កិច្ច​ព្រម​ព្រៀង​ថ្មី​ ជាមួយ​អ៊ីរ៉ង់​អំពីការ​សាកល្បងមីស៊ីលផ្លោង ក៏ដូចជាបញ្ហា​យោធា​របស់​រដ្ឋាភិបាល​ក្រុង Tehran ក្នុង​ប្រទេស​ស៊ីរី យេម៉ែន លីបង់ ​និង​អ៊ីរ៉ាក់។​ ប៉ុន្តែប្រធានា​ធិបតី​អ៊ីរ៉ង់​ Hassan Rouhani កាល​ពី​ថ្ងៃ​ពុធ ​បាន​ច្រាន​ចោល​គំនិត​នៃកិច្ច​ព្រម​ព្រៀង​ថ្មី ​ឬ​ការ​ផ្លាស់​ប្តូរ​ណា​មួយ ​នៅ​ក្នុង​កិច្ច​ព្រម​ព្រៀង​នុយក្លេអ៊ែរ ​ដែល​បាន​ធ្វើ​ឡើង​បន្ទាប់​ពី​ការ​ចរចា​យ៉ាង​យូរ​ជាមួយ​ចក្រភព​អង់គ្លេស ​អាល្លឺម៉ង់ ​រុស្ស៊ី ​ចិន ​បារាំង​និងអាមេរិកផងដែរ៕