ម៉ិកស៊ីក: មនុស្សប្រហែល ៨៤ នាក់បានរងរបួស កាលពីថ្ងៃអង្គារ នៅពេលដែលយន្តហោះដឹកអ្នកដំណើរ របស់ក្រុមហ៊ុនអាកាសចរណ៍ Aeromexico បានធ្លាក់បន្ទាប់ពីបានហោះហើរ នៅក្នុងរដ្ឋ Durango របស់ម៉ិកស៊ិក តែអាជ្ញាធរបាននិយាយថា មិនមានអ្នកស្លាប់នោះទេ។ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃទី១ ខែសីហា ឆ្នាំ២០១៨។

តាមរបាយការណ៍បឋម បានសន្មតថា ការធ្លាក់យន្តហោះនេះ បណ្ដាលមកពីលក្ខខណ្ឌអាក្រក់នៃអាកាសធាតុ។

យ៉ាងណាមិញមន្រ្តីនៅនាយកដ្ឋានគមនាគមន៍ម៉ិកស៊ិច បាននិយាយថា អ្នកដំណើរ៩៧នាក់ និងសមាជិកយន្តហោះ៤នាក់ បានស្ថិតនៅក្នុងយន្តហោះដែលធ្លាក់ កាលពីវេលាម៉ោងប្រហែលម៉ោង ៤ រសៀលនោះ។

រូបភាពទូរទស្សន៍ បានបង្ហាញថា តួយន្តហោះរងការខូចខាតយ៉ាងធ្ងន់ធ្ងរ ជាមួយផ្សែងដែលហ៊ុយឡើងទៅលើមេឃ៕