ឥណ្ឌូនេស៊ី: គ្រោះរញ្ជួយដីកម្រិត ៦.២ រ៉ិចទ័រ បានវាយប្រហារនៅប្រទេសឥណ្ឌូនេស៊ី កាលពីថ្ងៃព្រហស្បតិ៍ បង្កឲ្យមនុស្សម្នា មានការភ័យស្លន់ស្លោ នៅលើកោះ Lombok ខណ:ដែលចំនួនអ្នកស្លាប់ បន្ទាប់ពីការរញ្ជួយដីដ៏ខ្លាំងក្លាជាបន្តបន្ទាប់ រយ:ពេល ៤ ថ្ងៃកន្លងមកនេះ បណ្ដាលមនុស្សស្លាប់ឡើងដល់ ៣១៩ នាក់។ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃទី១០ ខែសីហា ឆ្នាំ២០១៨។

កាលពីថ្ងៃអាទិត្យ រញ្ជួយដីនេះ បានវាយប្រហារនៅភាគខាងជើងកោះ បណ្ដាលឲ្យអគារជាច្រើនបាក់រលំ ខណ:មនុស្សម្នាបាននាំគ្នារត់ចេញ តាមដងផ្លូវ នៅពេលថ្មបានធ្លាក់ចុះពីក្បែរភ្នំ។

ប្រមុខរដ្ឋមន្ត្រីសន្តិសុខឥណ្ឌូនេស៊ីលោក Wiranto បាននិយាយថា «កិច្ចខិតខំប្រឹងប្រែង ជួយសង្គ្រោះកំពុងបន្ត បើទោះបីជួបផលលំបាក និងភាពស្មុគស្មាញដោយសារការរញ្ជួយដីក៏ដោយ»។

អ្នកនាំពាក្យទីភ្នាក់ងារគ្រោះមហន្តរាយជាតិលោក Sutopo Purwo Nugroho បានឲ្យដឹងថា ចំនួនមនុស្សដែលត្រូវបង្ខំឲ្យចាកចេញ ពីលំនៅឋានរបស់ពួកគេ បានកើនឡើងដល់ ២៧០,០០០នាក់ ខណ:ដែលមានមនុស្សប្រហែល ១,០០០ នាក់ បានរងរបួសយ៉ាងធ្ងន់ធ្ងរ៕