Post News Media ព័ត៌មានអន្តរជាតិ ការដាក់ពង្រាយ...

ការដាក់ពង្រាយនាវាផ្ទុកយន្ដហោះចម្បាំងរបស់យោធាអាមេរិក នៅជុំវិញពិភពលោក ធ្លាក់ចុះជាងមុន ដោយសារបញ្ហាហិរញ្ញវត្ថុ

អាមេរិក: យោងតាមរបាយការណ៍របស់ USNI News កាលពីពេលថ្មីៗនេះ បានឲ្យដឹងថា អត្រានៃការដាក់ពង្រាយនាវាផ្ទុកយន្តហោះចម្បាំង របស់អាមេរិកនៅជុំវិញពិភពលោក គឺស្ថិតនៅចំណុចទាបបំផុត ក្នុងរយ:ពេល ២៥ ឆ្នាំកន្លងមក ដោយសារសកម្មភាពនេះ ត្រូវបានប្រឈមជាមួយការចំណាយកើនទ្បើង លើសង្គ្រាមប្រឆាំងភេរវកម្ម ក្នុងរយ:ពេល ១៧ឆ្នាំមកនេះ។ នេះបើយោងតាមសារព័ត៌មាន Sputnik ចេញផ្សាយនៅថ្ងៃទី២ ខែតុលា ឆ្នាំ២០១៨។

ការវិភាគនាពេលថ្មីៗនេះ អត្រាចំណាយត្រឹមតែ ១៥ ភាគរយប៉ុណ្ណោះ ទៅលើនាវាផ្ទុកយន្តហោះរបស់កងទ័ពជើងទឹក ដែលត្រូវបានគេដាក់ពង្រាយ ដើម្បីប្រតិបត្តិការនៅចំណុចមួយ ក្នុងឆ្នាំ ២០១៨ ។ ដោយគិតក្នុងរយ:ពេល ១៥ ខែចុងក្រោយនេះ គឺមានប្រតិបត្តិការនៃនាវាផ្ទុកយន្តហោះ តិចជាងការដាក់ពង្រាយទៅកាន់ទីតាំងនានា ចាប់តាំងពីឆ្នាំ ១៩៩២មក។

អ្វីដែលគួរកត់សម្គាល់ជាងនេះទៅទៀត សម្រាប់រយ:ពេល ២២ ថ្ងៃក្នុងអំទ្បុងរដូវក្តៅនេះ កងទ័ពជើងទឹកអាមេរិក មិនមានក្រុមវាយប្រហារលើនាវាផ្ទុកយន្តហោះពេញលេញ ដូចដែលធ្លាប់បានដាក់ពង្រាយ នៅគ្រប់ទីកន្លែងក្នុងពិភពលោក សម្រាប់កិច្ចការជាតិនោះទេ។

ពាក់ព័ន្ធនឹងបញ្ហានេះ មន្ត្រីជាន់ខ្ពស់មួយរូប បានប្រាប់ USNI ថា ហេតុផលចម្បងមួយ ចំពោះការធ្លាក់ចុះ នៅក្នុងការដាក់ពង្រាយនេះ គឺដោយសារការចំណាយដ៏ច្រើន ដែលទាក់ទងនឹងប្រតិបត្តិការនាវាផ្ទុកយន្តហោះ រួមទាំងយន្តហោះចម្បាំងនៅលើនាវាផងដែរ៕