Post News Media ព័ត៌មានអន្តរជាតិ អំទ្បុងសមយុទ្...

អំទ្បុងសមយុទ្ធសមុទ្រដ៏ធំជាងគេបំផុតនៅអឺរ៉ុប យន្តហោះ​ទម្លាក់​គ្រាប់បែក​រុស្ស៊ី​ ហោះល្បាត​នៅ​សមុទ្រ​អាក់​ទិ​ក

រុស្ស៊ី: ក្រសួងការពារជាតិរុស្ស៊ី កាលពីថ្ងៃពុធបាននិយាយថា យន្តហោះទម្លាក់គ្រាប់បែកយុទ្ធសាស្ត្រ Tu-160 ចំនួន២គ្រឿង របស់កងកម្លាំងអាកាសខ្លួន បានហោះល្បាត​លើ​សមុទ្រ​អាក់​ទិក ខណ:កំពុងធ្វើសមយុទ្ធសមុទ្រ ដ៏ធំជាងគេបំផុតនៅអឺរ៉ុប របស់អង្គការណាតូ។ នេះបើយោងតាមសារព័ត៌មាន sputnik ចេញផ្សាយនៅថ្ងៃទី១ ខែវិច្ឆិកា ឆ្នាំ២០១៨។

ការហោះល្បាតនេះ បានធ្វើឡើងស្របតាមច្បាប់អន្តរជាតិ ស្តីពីការប្រើប្រាស់ដែនអាកាស ដោយពុំមានការរំលោភលើព្រំដែនរបស់រដ្ឋផ្សេងៗទៀត ទ្បើយ ដោយ​ក្រុមអាកាសយានិក នឹងត្រូវត្រឡប់ទៅកាន់ទីលានអាកាសយានដ្ឋានរបស់ពួកគេវិញ ក្រោយបំពេញបេសកកម្មនេះរួចរាល់។

ប្រភពដែល បានបន្ថែមថា សមយុទ្ធនោះ មានឈ្មោះថា Trident Juncture 2018 កំពុងត្រូវបានធ្វើនៅប្រទេសន័រវែស និងនៅសមុទ្រជុំវិញប្រទេស ចាប់ពីថ្ងៃទី២៥ ខែតុលា ដល់ថ្ងៃទី៧ខែវិច្ឆិកាខាងមុខ។

សមយុទ្ធនេះ គឺមានការចូលរួមពីកងទ័ពប្រមាណជា ៥០,០០០នាក់ មកពីសមាជិកអង្គការណាតូ ដែលមានប្រទេសជាសមាជិកចំនួន២៩ និងប្រទេសជាដៃគូដទៃទៀត រួមមាន៖ ស៊ុយអែត និង ហ្វាំងឡង់ ដោយមានយន្តហោះ២៥០ គ្រឿង នាវាចំនួន៦៥ គ្រឿង និងរថយន្តចំនួន១០,០០០គ្រឿង៕