ព័ត៌មានអន្តរជាតិ

អាមេរិក យល់ព្រមលក់មីស៊ីល Patriot ក្នុងទឹកប្រាក់ ៣,៥ ពាន់លានដុល្លារទៅឲ្យតួកគី

អាមេរិក: រដ្ឋាភិបាលក្រុងវ៉ាស៊ីនតោន បាននិយាយថា ខ្លួនបានយល់ព្រមលក់មីស៊ីល ដែលមានតម្លៃ ៣,៥ ពាន់លានដុល្លារទៅឲ្យប្រទេសតួកគី ក្នុងគ្រាមានភាពតានតឹង រវាងក្រុមសម្ព័ន្ធមិត្តណាតូ ជុំវិញផែនការរបស់ក្រុងអាន់ការ៉ា ដើម្បីទិញអាវុធពីរុស្ស៊ី។ នេះបើយោងតាមសារព័ត៌មាន Aljazeera ចេញផ្សាយនៅថ្ងៃទី២០ ខែធ្នូ ឆ្នាំ២០១៨។

ក្រសួងការបរទេសអាមេរិក កាលពីថ្ងៃពុធ បាននិយាយថា ខ្លួនបានជូនដំណឹងដល់សភា នូវផែនការលក់ប្រព័ន្ធការពារដែនអាកាស រួមមាន​កាំជ្រួច ​Patriot ៨០​ដើម កាំជ្រួច​​ស្ទាក់​ចាប់ PAC-3 ​ចំនួន​៦០​ដើម​ និង​គ្រឿង​បរិក្ខារ​ពាក់ព័ន្ធផ្សេងទៀត ទៅឲ្យតួកគី​។

​សេចក្តីថ្លែងការណ៍មួយ ​បាន​ឲ្យដឹងថា «​ការលក់​នេះ​ នឹងជួយ​បង្កើន​សមត្ថភាព​ការពារ​របស់​យោធា​តួ​ក​គី ​ដើម្បីទប់​ទល់នឹង​ការឈ្លានពាន​បង្កហេតុ ក៏ដូចជា​ការពារ​សម្ព័ន្ធមិត្ត​ណា​តូ ​​ដែល​អាច​ហ្វឹកហាត់​ ឬ​ធ្វើ​ប្រតិបត្តិការ​នៅក្នុង​ព្រំដែន​តួ​ក​គី​»​។​

​សូម​ជំរាបថា កាល​ពីមួយ​ឆ្នាំមុន ​ក្រុង​អង់កា​រ៉ា បានប្រកាស​កិច្ចព្រមព្រៀង​ទិញ​ប្រព័ន្ធ​ការពារ​អាកាស ​S-400 ពី​រុស្ស៊ី ជាហេតុ​នាំឲ្យបណ្តា​សម្ព័ន្ធមិត្ត​​អង្គការ​ណា​តូ​របស់ខ្លួន​ រិះគន់​។​ ដោយមន្ត្រី​អាមេរិក​ម្នាក់​ បាន​និយាយថា សកម្មភាពតួ​ក​គី នឹងធ្វើឲ្យប៉ះពាល់ដល់​កម្មវិធី​លក់អាវុធយោធា​អាមេរិក គឺ​យន្តហោះចម្បាំង F-35 ​បើសិន​តួ​ក​គី​នៅតែ​បន្ត​​ទិញ​S-400 ​អាច​ប្រឈម​នឹង​ទណ្ឌកម្ម ​នៅក្រោម​ច្បាប់របស់​អាមេរិក​៕

មតិយោបល់