អ៊ីស្រាអែល: កងកម្លាំងយោធាអ៊ីស្រាអែល (IDF) បាននិយាយនៅថ្ងៃច័ន្ទនេះថា ពួកគេបានបើកការបាញ់ប្រហារ ទៅលើជនប្រដាប់អាវុធមួយក្រុម ដែលបានឆ្លងកាត់ចូលព្រំដែនគ្មានយោធា នៅតំបន់ Golan Heights ដែលគ្រប់គ្រងដោយកងទ័ពរដ្ឋាភិបាលស៊ីរី។ នេះបើយោងតាមសារព័ត៌មាន Sputnik ចេញផ្សាយនៅថ្ងៃទី២៤ ខែធ្នូ ឆ្នាំ២០១៨។

IDF បានប្រទះឃើញជនសង្ស័យប្រដាប់អាវុធ ឆ្លងកាត់តំបន់ខ្សែបន្ទាត់ Alpha ចូលទៅកាន់ព្រំដែនស៊ីរី នៅតំបន់ Golan Heights។ នៅក្នុងការឆ្លើយតបទៅនឹងសកម្មភាពនេះ កងកម្លាំងអ៊ីស្រាអែល បានបើកការវាយប្រហារទៅកាន់ពួកគេ។

ដោយ IDF បាននិយាយថា នឹងបន្តប្រតិបត្តិការប្រឆាំងនឹងការរំលោភលើអធិបតេយ្យភាពរបស់អ៊ីស្រាអែល និងកិច្ចព្រមព្រៀងបែងចែកឆ្នាំ ១៩៧៤។

សូមជំរាបថា ឧបទ្ទវហេតុនេះ មិនបានបណ្តាលឲ្យមានការស្លាប់ និងរបួសភាគីអ៊ីស្រាអែលនោះទេ។ ចំណែកខាងស៊ីរីវិញ មិនបានផ្តល់ព័ត៌មានអំពីជនរងគ្រោះទេ មកដល់ពេលនេះ៕