អ៊ីរ៉ង់: មេបញ្ជាការកងទ័ពជើងទឹករបស់អ៊ីរ៉ង់ បានប្រកាសថា ប្រទេសខ្លួន ព្រមទាំងចិន និងរុស្ស៊ី បានចាប់ផ្តើមធ្វើសមយុទ្ធកងនាវាចររួមគ្នា រយ:ពេល ៤ ថ្ងៃ នៅមហាសមុទ្រឥណ្ឌា និងឈូងសមុទ្រអូម៉ង់ កាលពីថ្ងៃសុក្រទី ២៧ ធ្នូ។ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃទី២៨ ខែធ្នូ ឆ្នាំ២០១៩។

សមយុទ្ធនេះ ធ្វើឡើងចំពេលមានភាពតានតឹង កាន់តែខ្លាំងឡើង បន្ទាប់ពីអាមេរិក ដកខ្លួនចេញពីកិច្ចព្រមព្រៀងនុយក្លេអ៊ែរឆ្នាំ ២០១៥ ជាមួយអ៊ីរ៉ង់ កាលពីខែឧសភាឆ្នាំមុន។

ដោយលោក Gholamreza Tahani បាននិយាយនៅលើកញ្ចក់ទូរទស្សន៍ថា៖ ««សារនៃការធ្វើសមយុទ្ធនេះ គឺដើម្បីបង្ហាញសន្តិភាព ក៏ដូចជាមិត្តភាព និងសន្តិសុខយូរអង្វែង តាមរយ:កិច្ចសហប្រតិបត្តិការឯកភាពរវាងភាគីពាក់ព័ន្ធ ដែលឥទ្ធិពលរបស់វា នឹងធ្វើឲ្យឃើញថា អ៊ីរ៉ង់ មិនបានស្ថិតនៅដាច់ឆ្ងាយពីគេទេ ទោះបីអាមេរិកដកខ្លួន ចេញពីកិច្ចព្រមព្រៀងក៏ដោយ»៕