ភ្នំពេញៈ នៅប៉ុន្មានម៉ោងមុននេះនៅថ្ងៃទី៣ សីហា ផលិតកម្ម B & S Good day Video ដែលត្រូវគេដឹងថា ជាផលិតកម្មផលិតរឿងឲ្យប៉ុស្ដិ៍លេខ៥ បានប្រកាសធ្វើពិធីក្រុងពាលី២រឿងបន្ថែម ដើម្បីបំពេញតម្រូវការនៅក្នុងម៉ោងមាសរបស់ស្ថាប័នមួយនេះ។ រឿងទាំងពីរនឹងប្រកាសចេញថតចាប់ដើមខែសីហា ហើយដាក់ផ្សាយនៅប៉ុស្ដិ៍លេខ៥ទន្ទឹមគ្នាតែម្ដងនៅពាក់កណ្ដាលខែ១១ ខាងមុខ។
ខ្សែរឿងដែលបានក្រុងពាលីចេញថតនោះរួមមាន រឿង «វរសេនីយ៍កំពូលស្នេហ៍» និងរឿង «ឋានសួគ៌វណ្ណៈ» ដែលរឿងទាំង២ត្រូវបានប្រកាសថា សុទ្ធតែជារឿងប្រភេទស៊ើបអង្កេត និងមានចំណុចអប់រំស៊ីជម្រៅ ត្រូវនឹងបរិបទនៃស្ថានភាពនៅក្នុងសង្គម។ ខ្សែរឿងទាំងពីរត្រូវបានផលិតដោយលោក ប៊ុន ស៊ា ផលិតករផលិត B&S Good Day Video ដែលត្រូវគេស្គាល់ថា បានបន្សល់នូវភាពល្បីល្បាញក្នុងការផលិតរឿងជាច្រើននាពេលកន្លងមក។
លោក ទិត្យ ធារិទ្ធិ អ្នកដឹកនាំសម្ដែងបានអះអាងថា ថ្វីដែលតែផលិតកម្មខាងលើ បានសម្រេចចេញរឿងម្ដងដល់ទៅ២ បន្ថែមពីលើរឿង «ភ្លើងឆេះក្នុងបេះដូង» ដែលទើបក្រុងពាលីថតដែរកាលពី២ថ្ងៃមុនក៏ពិតមែន។ ប៉ុន្តែធាតុពិតក្រុមអ្នកដឹកនាំផលិតមិនមែនជាក្រុមតែមួយនោះទេ គឺផលិតកម្មមួយនេះ មានអ្នកផលិតច្រើនក្រុមផ្សេងគ្នា។ លោកថា ខ្សែររឿង «វរៈសេនីយ៍កំពូលស្នេហ៍» គឺលោកនឹងដឹកនាំថតដោយផ្ទាល់ ហើយរឿង «ឋានសួគ៌វណ្ណៈ» និងរឿង «ភ្លើងឆេះក្នុងបេះដូង» គឺសុទ្ធតែមានអ្នកដឹកនាំផលិតដោយឡែក ដោយគ្រាន់តែក្រុមការងារត្រូវចេះលៃពេលជួយគ្នា។ លោកថា រឿង២ដែលទើបក្រុងពាលីនៅថ្ងៃទី៣ សីហា នេះ នឹងក្លាយជារឿងដំបូងរបស់ប៉ុស្ដិ៍លេខ៥ ដែលមានលក្ខណៈជារឿងប្រភេទស៊ើបអង្កេត ដែលមានលក្ខណៈខុសគ្នាទាំងស្រុងពីរឿងភាគ ដែលមានតែលក្ខណៈស្នេហាកាច់កុងសុទ្ធសាធកាលពីមុន។
រឿងទាំងពីរក៏មានការរំពឹងថា នឹងធ្វើម៉ោងមាសរបស់ប៉ុស្ដិ៍លេខ៥ ទទួលបានការចាប់អារម្មណ៍ផងដែរ បើទោះជាស្ថាប័នទូរទស្សន៍ផ្សេងទៀត សុទ្ធតែអះអាងថា រឿងភាគថ្មីៗដែលខ្លួនផលិត គឺជាឧបសគ្គ៕
មតិយោបល់