អេក្វាទ័រ: ប្រធានាធិបតីលោក Rafael Correa កាលពីថ្ងៃច័ន្ទ បានបញ្ជាឲ្យមន្ត្រីមូលដ្ឋាន អនុវត្តការសាងសង់អគារ ឲ្យស្របតាមបទដ្ឋានត្រឹមត្រូវ ក្រោយពីគ្រោះរញ្ជួយដី បានបំផ្លិចបំផ្លាយ ក្នុងប្រទេសអេក្វាទ័រ។ នេះបើយោងតាមរយ: សារព័ត៌មានចិន ស៊ិនហួរ ចេញផ្សាយនៅថ្ងៃទី២៦ ខែមេសា ឆ្នាំ២០១៦នេះ។
បើតាមគណនី Twitter ជាផ្លូវការរបស់លោក Correa បានបញ្ជាក់ឲ្យដឹងថា ដោយសារសំណង់អគារខ្វះគុណភាព មកទាល់ពេលនេះ មានមនុស្សរាប់សិបនាក់ ត្រូវបានបាត់បង់ទីជម្រក បន្ទាប់ពីគ្រោះរញ្ជួយដី បានវាយប្រហារ ក្នុងប្រទេសនេះ។
គួរបញ្ជាក់ថា ខណ:ពេលនេះ ក្រុមមន្ត្រី បានអះអាងជាផ្លូវការថា យ៉ាងហោចណាស់មនុស្សចំនួន ៦៥៥នាក់ បានស្លាប់ និង ១៦.៦០១នាក់ទៀត រងរបួស ព្រមទាំងអ្នកបាត់ខ្លួន ចំនួន ៤៨នាក់ និង ២៩.០៦៧នាក់ទៀត កំពុងស្ថិតនៅក្នុងជម្រក ហើយសម្រាប់អគារ ដែលរងការបំផ្លិចបំផ្លាញ ដោយគ្រោះរញ្ជួយដីកម្រិត ៧,៨វ៉ិចទ័រ នៅក្នុងប្រទេសនេះ គឺមានចំនួន៩.៧៣០ ខ្នង៕
មតិយោបល់