ម៉ាពូតូៈ ប្រទេស ម៉ូសំប៊ិក បានបង្កើតគណៈកម្មការមួយឡើងដើម្បីស៊ើបអង្កេតលើករណីផ្ទុះរថយន្តដឹកសាំងមួយគ្រឿង បណ្តាលឲ្យស្លាប់ ៧៣នាក់ និងរបួស ១១០នាក់។

ទីភ្នាក់ងារព័ត៌មានចិន ស៊ិនហួ ចេញផ្សាយនៅថ្ងៃទី១៨ ខែវិច្ឆិកា ឆ្នាំ២០១៦ បានឲ្យដឹងថា គណៈកម្មការនោះ គឺដឹកនាំដោយលោក Carmelita Namashulua រដ្ឋមន្រ្តីរដ្ឋបាលរដ្ឋ និងមន្រ្តីរាជការស៊ីវិល, លោក Carlos Mesquita រដ្ឋមន្រ្តីដឹកជញ្ជូន និងទំនាក់ទំនង, ឧបនាយករដ្ឋមន្រ្តីសុខាភិបាលលោក Mouzinho Saide និងប្រធានវិទ្យាស្ថានគ្រប់គ្រងគ្រោះមហន្តរាយ លោកOsvaldo Machatine។

យោងតាមអាជ្ញាធរប៉ូលិស បានឲ្យដឹងថា សោកនាដកម្មនេះ បានកើតឡើងកាលពីថ្ងៃព្រហស្បតិ៍ ទី១៧ នៅពេលដែលជនរងគ្រោះទាំងនោះ បាននាំគ្នាដួសប្រេងពីរថយន្តដឹកសាំងនោះ រួចហើយរថយន្តក៏ផ្ទុះឆេះតែម្តង។

មេប៉ូលិសខេត្ត គឺលោក Fabiao Nhancoloco បាននិយាយថា «ហេតុការណ៍នេះបានកើតឡើងដោយសារតែអ្នកបើកបររបស់ក្រុមហ៊ុន Malawian ធ្វេសប្រហែសបើកចូលក្នុងសហគមន៍ ហើយរថយន្តកំពុងសាក់សាំង ខណៈរថយន្តកំពុងក្តៅខ្លាំង និងក៏បានផ្ទុះតែម្តង»។

ក្រោយហេតុការណ៍កើតឡើង មនុស្ស ៤៣នាក់បានស្លាប់ នៅកន្លែងកើតហេតុ ខណៈ ៤០នាក់ផ្សេងទៀត ស្លាប់នៅតាមផ្លូវពេលបញ្ជូនទៅកាន់មន្ទីរពេទ្យ ចំណែកអ្នករបួសដោយរលាកធ្ងន់ធ្ងរ ត្រូវបានគេប្រញាប់បញ្ជូនទៅកាន់មន្ទីរពេទ្យដែលនៅជិតនោះ។
ហេតុការណ៍ដ៏អាក្រក់នេះ បានកើតឡើងចំថ្ងៃដែលខេត្ត តេតេ ស្ថិតក្នុងសីតុណ្ហភាព ៣៧អង្សារសេ៕