មកទល់ពេលនេះ គេកត់សម្គាល់ថាការវាយប្រហារដោយពាក្យសម្ដីរវាងអ្នកនាង ខាត់ សុឃីម និងអ្នកគាំទ្ររបស់លោកខឹម វាសនា ប្រធានគណបក្ស LDP នៅតែបន្តឡើងកម្ដៅ បន្ទាប់ពីអ្នកនាងខាត់ សុឃីម បានបង្ហោះសារមួយចំនួនតបតការបង្ហោះសាររបស់លោកឃឹម វាសនា ហើយត្រូវក្រុមអ្នកគាំទ្រលោកខឹម វាសនា ប្រើពាក្យអសុរសសំដៅ។ យ៉ាងណាមិញ អ្នកនាងប្រាប់ថាគឺ សម្រេចសុំចាញ់ ដើម្បីកុំឲ្យមានការប្រមាថបន្តទៀត។

ខាត់ សុឃីម និយាយថា ក្រោយពីអ្នកនាងតបតដោយសំណេរឆ្លើយតបទៅលោកខឹម វាសនា ដែលបានបង្ហោះថាបងប្អូនអ្នកនាងប្រមាថឪពុកខ្លួនថាឆ្កួតព្រោះតែឪពុកអ្នកនាងចូលចិត្ត ស្ដាប់សម្ដីលោកខឹម វាសនាក្នុងវិទ្យុ ក៏មានអ្នកគាំទ្ររបស់មេបក្សនេះជេរប្រមាថនាងកប់ៗមាត់។ ពាក្យសម្ដីអសុរសទាំងនោះ កាន់តែមានទម្ងន់ដោយគ្រាន់តែអ្នកនាងសរសេរបង្ហោះថា«សុំសរសើរដល់អ្នកពូកែជេរ….» និងបានបង្ហោះថា«ជាខ្មែរដូចគ្នាចាំបាច់ជេរគ្នា»។

អ្នកនាង ខាត់ សុឃីម និយាយថាក្រោយរងព្រនុង ព្រោះតែការបកស្រាយរបស់ខ្លួន នាងយល់ឃើញថាវាល្មមដល់ពេលដែលនាងសម្រេចចុះចាញ់ ដោយសារតែក្រុមអ្នកដែលមានបញ្ហាជាមួយអ្នកនាង គឺអ្នកនាងកាន់តែធ្វើការពន្យល់គឺកាន់តែជេរកប់មាត់។ អ្នកនាងនិយាយថា«ខ្ញុំសុំអត់ធ្វើការបកស្រាយរឿងអ្នកជេរនឹងទេ ហើយរឿងពាក់ព័ន្ធលោកខឹម វាសនា ខ្ញុំសុំឈប់ត្រឹមហ្នឹង! ខ្ជិលណាស់ បើហ៊ានតែតបតស្អីហ្នឹង ជេរទៀតហើយ! អ្នកណាក៏ដឹងដែរថាខ្ញុំមិនមែនជាអ្នកនយោបាយទេ ចឹងឈប់តទុកឲ្យអ្នកគាំទ្រគាត់ជេរទៅ ខ្ញុំសុំចប់ ចាញ់គេទៅ!»។ អ្នកនាងថាការប្រមាថរបស់អ្នកគាំទ្រលោកខឹម វាសនាទាំងនោះ គឺជាការដុតកម្ដៅរូបនាង និងក្រុមគ្រួសារឲ្យមានសតិអារម្មណ៍។

ប៉ុន្តែអ្នកនាងសុខចិត្តឈឺ សុខចិត្តចាញ់ ដោយអត់តបតហើយបន្តឲ្យអ្នកចេញមុខឈ្លោះជាមួយនាងទាំងនោះប្រមាថនាងទៀតទេ។ អ្នកនាងនិយាយថា«ពុកខ្ញុំគាត់ថាគាត់និយាយលេងក្នុងន័យផ្សេងទេ ហើយពួកខ្ញុំក៏អត់មានកូនណាថាឲ្យពុកជាមនុស្សឆ្កួតដោយគ្រាន់តែគាត់ចូលចិត្តលោកខឹម វាសនានោះទេ ខ្ញុំគិត ថាបងប្អូនគាត់ដឹងហើយថាអ្នកណាខុសអ្នកណាត្រូវ ចឹងហើយបានខ្ញុំសម្រេចចិត្តចាញ់ ព្រោះបើនៅតស្អីទៀតអត់ចប់ទេ រឹតតែជេរយើងម្មង!»។

អ្នកនាងថាខ្លួនពិបាកទទួលយកការប្រមាថរបស់ក្រុមអ្នកគាំទ្រលោកខឹម វាសនា តែអ្នកនាងមិនធ្វើការតវ៉ាទៀតទេ ដើម្បីបញ្ចប់បញ្ហា។ អ្នកនាងក៏ប្រកាសអរគុណដល់អ្នកគាំទ្រដែលបានសរសេរលើកទឹកចិត្តនាង តបតនឹងការប្រមាថរបស់អ្នកជេរនាងដែលគេស្គាល់ថាជាអ្នកគាំទ្រលោកឃឹម វាសនា នោះផងដែរ៕