ស្របពេលដែលព័ត៌មានសាយភាយថា មានបុរសៗជាច្រើននៅឯនាយសមុទ្រ ចង់បានបេះដូង តារាចម្រៀង រស់ ម៉ូនីកា ទៅថ្នាក់ថ្នមនោះ សាមីខ្លួនបានចេញភ្លាមៗ ប្រតិកម្មនូវដំណឹងដ៏រសើបមួយនេះ។
ឆ្លើយឆ្លងជាមួយនឹង Post Komsan ក៏ដូចជា Post News Media ឆ្លងទ្វីបពីកាណាដា តាមរយ:ទូរស័ព្ទ តារាចម្រៀងយ៉េៗ រស់ ម៉ូនីកា បានធ្វើការបដិសេធ នូវព័ត៌មានថា នាងមានចំណងស្នេហ៍នៅឯនាយ សមុទ្រ ដោយមានអ្នកធានាចិញ្ចឹមនាង សោយសុខលើទ្រព្យសម្បត្តិ នាទឹកដីអាគាំង ។
ជារឿងធម្មតា ផ្កាក្នុងថូស្រស់សោភា ពិតជាមានអ្នកតាមស្រឡាញ់ ចង់បាន ដាក់ក្នុងផ្ទះខ្លួន ប៉ុន្តែសម្រាប់ តារាចម្រៀង រស់ ម៉ូនីកា វិញ ថា សម្រាប់នាងគឺបេះដូងនៅទំនេរ ហើយក៏មិនមានចន្លោះទំនេរ សម្រាប់ទទួលយកស្នេហា ពីនរណាម្នាក់ឡើយ។ តារាចម្រៀង ស្រស់សោភា រូបនេះបានបន្តទៀតថា បើទោះបីជាមានអ្នកស្រឡាញ់នៅក្រៅស្រុកមែន តែនាងគ្មានបំណង ចង់រស់នៅលើទឹកដីអាគាំងនោះទេ ព្រោះថានៅកម្ពុជា គឺសុខសប្បាយទៅហើយ មានសេរីភាព គ្រប់គ្រាន់ សម្រាប់នាង។
រស់ ម៉ូនីកា បានទៅដល់ទឹកដី កាណាដា កាលពីថ្ងៃទី៣១ ខែធ្នូ ឆ្នាំ២០១៦ ប៉ុន្តែរហូតមកទល់នឹងពេលនេះ នាងមិនទាន់បានបង្ហាញ ខ្លួនសម្តែងនៅឡើយទេ ដែលជាដើមហេតុធ្វើឲ្យលេចឭនូវព័ត៌មាន មួយចំនួនថា នាងមានចំណងស្នេហ៍ ជាមួយបុរសនៅកាណាដា តែម្តងទៅ ។ រស់ ម៉ូនីកាថា នាងមិនទាន់បានសម្តែងនៅឡើយទេ ក៏ព្រោះតែ ម្ចាស់ Sponsor យកនាងទៅ អុកឡុក ដែលមានបំណងមិនល្អ ទៅលើរូបនាង ចឹងហើយ ក៏មិនបានចេញសម្តែង ។
ប៉ុន្តែជាសំណាងល្អ ដែលមាន អ្នកចិត្តបុណ្យ ជួយនាង ដែលកន្លងមកគាត់ធ្លាប់ជាអ្នកធានាតារាទៅសម្តែង នៅកាណាដា ដូចគ្នា ដោយនឹងចេញសម្តែងនៅថ្ងៃទី២៥ ខែកុម្ភ: ឆ្នាំ២០១៧ នេះតែម្តង ហើយដើមខែ ៥ នឹងវិលមកកម្ពុជាវិញ ចឹងហើយ តម្រូវចូលឆ្នាំខ្មែរ នៅទីនោះ៕
មតិយោបល់