មុនទទួលមរណភាព តារាសម្ដែងជើងចាស់លោកឈុំ អាឈុន បានទទួលការគាំទ្រក្នុងនាមជាតារាសម្ដែងគួរសម តាមរយ:ការបង្ហាញខ្លួន ក្នុងខ្សែភាពយន្តទាំងរឿងភាគ និងរឿងដុំមួយចំនួន។ យ៉ាងណាមិញ កេរ្តិ៍ឈ្មោះដែលលោកបន្សល់ទុកហាក់ត្រូវបានមហាជនបំភ្លេចចោល ដោយទើបតែមានការរំលឹកមកវិញ ក្រោយពេលតារាសម្ដែងលោក ព្រហ្ម ប្រសិទ្ធី ប្រកាសថាខ្លួនជាចៅប្រុសរបស់លោក និងប្រឹងពុះពារក្នុងសិល្ប:សិល្ប:ដើម្បីស្នងលោកនោះតែប៉ុណ្ណោះ។

តារាសម្ដែងវ័យ២៧ឆ្នាំរូបនេះ បានអះអាងថាខ្លួនពិតជាចៅរបស់លោកឈុំ អាឈុន ដោយលោកឈុំ អាឈុន គឺជាមាបង្កើតរបស់ម្ដាយលោក និងជាអ្នកសិល្ប:តែម្នាក់ដែលទទួលបានការគោរពពីក្រុមគ្រួសារ។ យ៉ាងណាមិញ លោកថាគ្រួសារមិនបានគាំទ្រឲ្យលោកបន្តប្រឡូកអាជីពសិល្ប:តាមលំនាំរបស់ឈុំ អាឈុននោះទេ ទើបលោកសម្រេចចិត្តចាកចេញពីខេត្តតាកែវ ហើយផ្សងព្រេងប្រឡូកអាជីពសិល្ប:តែម្នាក់ឯងនៅភ្នំពេញ ដោយទទួលបានជោគជ័យជាបន្តបន្ទាប់ ទាំងការសម្ដែងរឿង ខារ៉ាអូខេ និងថតស្ពត។ លោកចូលប្រឡូកសិល្ប:ត្រឹមតែអំឡុងឆ្នាំ២០១៥តាមរយ:កម្មវិធី «Super Star »របស់PNN តែទទួលបានច្រើនរឿងដែលលោកចាត់ទុកថាជាសញ្ញាណវិជ្ជមាន។ ខ្សែរឿងទាំងនោះរួមមានរឿង«តាមស៊ើបជួបស្នេហ៍» រឿង«លំអៀងចិត្ត» រឿង«វរសេនីយ៍កំពូលស្នេហ៍» រឿង«ពស់កេងកង» និងរឿង«រាជបូរី Comeback » ជាដើម។ លោកថាខ្លួនស្រឡាញ់សិល្ប:ទើបប្រឹងជំទាស់គ្រួសារដែលសុទ្ធតែជាអ្នកសិល្ប: ហើយប្រឡូកអាជីពសិល្ប:តាមលំនាំលោកឈុំ អាឈុន។ លោកសារភាពការជម្នះគ្រួសារដើម្បីប្រឡូកសិល្ប: គឺលោកសុខចិត្តរត់តុ និងសុំគេច្រៀងតាមហាងបៀហ្គាឌិន ដើម្បីយកលុយចិញ្ចឹមខ្លួន ក្នុងពេលឪពុកម្ដាយមិនគាំទ្រឲ្យលោកផ្សងព្រេងនៅភ្នំពេញម្នាក់ឯងដើម្បីសិល្ប:។

លោក ព្រហ្ម ប្រសិទ្ធី បន្តដោយសារតែភាពជោគជ័យ នាពេលចុងក្រោយនោះហើយ ទើបលោកសម្រេចចិត្តទិញយីហោផ្ដាច់មុខមកពីប្រទេសថៃ ដាក់លក់ឆៅកួយធ្វើជាអាជីវកម្មផ្ទាល់ខ្លួន ដោយបានបង្កើតស្ដង់ និងក្រុមការងារដាក់លក់២កន្លែងនៅសាកលវិទ្យាល័យភូមិន្ទភ្នំពេញ និងនៅសាលាIFL ដោយគ្រោងនឹងបើក៥ទីតាំងទៀត ដើម្បីដាក់លក់ឲ្យគ្រប់សាលវិទ្យាល័យ។ លោកថាសិល្ប:ទោះជាបានសម្ដែងច្រើន តែឱកាសសល់ប្រាក់មិមាននោះទេ ទើបបានប្រឹងប្រែងបង្កើតមុខរបរបន្ថែមពីលើសិល្ប: ដោយលក់ឆៅកួយរសជាតិឆ្ងាញ់គុណភាពដើមមកពីប្រទេសថៃ ដើម្បីរកចំណូលទប់សិល្ប:។ លោកថាមុខរបរនេះជោគជ័យ ទើបគ្រោងបន្ថែមសាខា បើទោះនឹងបន្តលក់ត្រឹមជាស្ដង់បែបនេះ ដោយមិនមានផែនការបើកជាហាង នាំឲ្យប្រើដើមទុនច្រើនក្ដី។ យ៉ាងណាមិញ លោកថានៅតែបន្តការសម្ដែងមិនឲ្យបាត់មុខ ដោយសារតែមុខរបរនេះ គឺក្រុមការងារអាចចាត់ចែងបាន៕