កាលពីយប់ថ្ងៃទី១៥ មីនា តារាសម្ដែងស៊ិចស៊ីនាងរតន: ពិសី បានរៀបចំពិធីខួបកំណើតយ៉ាងអធឹកអធម ដោយមានតារាសិល្ប:ចូលរួមកុះករ។ ក្នុងពិធីនាងបានចែកទាន និងបានផ្ដល់ឱកាសឲ្យក្មេងៗកុមារកំព្រាចំនួន៣០នាក់ឡើងតុដូចភ្ញៀវទូទៅ ដើម្បីឲ្យពួកគេបានរីករាយ និងបានស្និទ្ធិស្នាលជាមួយតារាសិល្ប:ដែលបានចូលរួម។ អ្វីដែលគេកត់សម្គាល់គឺនាងបញ្ចប់ខួបក្នុងយប់ថ្ងៃទី១៥ ហើយក៏ឡើងយន្តហោះទៅកាណាដាដល់ទៅ៦ខែតែម្ដង នៅថ្ងៃ២១ មីនានេះ។

រតន: ពិសី និយាយថាដោយសារតែនាងយល់ថាក្មេងកុមារកំព្រានៅមិនទាន់ត្រូវបានសង្គមអ្នកមានបញ្ចប់នូវការរើសអើងនៅឡើយ ទើបនាងសម្រេចចិត្តយកខួបគម្រប់២៤ឆ្នាំរបស់ខ្លួន រៀបតុឲ្យពួកគេចំនួន៣តុ ដើម្បីឲ្យក្មេងៗទាំងនោះបានសើចសប្បាយ និងបានរីករាយ ហើយបានថតរូបជាមួយតារាសិល្ប:នៅក្នុងពិធីរបស់នាង។ នាងក៏បានចែកចាយលុយកាក់ និងសម្ភារ:សិក្សាដល់ក្មេងទាំងនោះផងដែរ ដើម្បីលើកទឹកចិត្តឲ្យពួកគេខំរៀន។ នាងនិយាយថាក្រោយចប់ពិធីខួបភ្លាមៗ នាងនឹងឡើងយន្តហោះទៅច្រៀងលើកទី១នៅលើទឹកដីកាណាដា ទើបនាងសម្រេចចិត្តធ្វើខួបឲ្យធំតែម្ដង ដោយសារតែការបាត់មុខ៦ខែគឺពិតជាធ្វើឲ្យនឹកនាអ្នកសិល្ប: និងនឹកស្រុកខ្មែរ។ យ៉ាងណាមិញ នាងថាឱកាសចេញច្រៀងក្រៅស្រុកមិនមែនជាលើកទី១នោះទេ ដោយសារតែនាងធ្លាប់ចេញទៅច្រៀងនៅអូស្រ្តាលី និងសិង្ហុបុរីរួចហើយ។ នាងនឹងមានគម្រោងបន្តច្រៀងនៅក្រៅប្រទេសផ្សេងទៀត ក្រោយចប់នៅកាណាដាផងដែរ ជាពិសេសអាមេរិក ប្រសិនបើមានសំណូមពរ។ នាងថាខ្លួនជាតារាចម្រៀងរបស់ផលិតកម្មបុត្រា តែនាងមិនយកបទ Original Song របស់ខ្លួនទៅច្រៀងនៅក្នុងប្រទេសកាណាដានោះទេ គឺនឹងសង្វាតច្រៀងបទបែបខ្មែរច្រើនជាង។ រតន: ពិសី និយាយថាពិធីធ្វើខួបរបស់នាងដែលឲ្យក្មេងឡើងតុធ្វើភ្ញៀវ គឺនាងចង់ផ្ញើជាសារឲ្យយកចិត្តទុកដាក់ចំពោះក្មេងៗរស់នៅក្នុងមណ្ឌល ដោយសារតែពួកគេខ្វះភាពកក់ក្ដៅ។ នាងក៏មានគម្រោងនឹងធ្វើទានដល់ក្មេងៗសម្រាប់លើកក្រោយឲ្យធំជាងនេះផងដែរ។

ខាងក្រោមនេះជាបទសម្ភាសន៍ជុំវិញការចែកទានដល់ក្មេងៗ និងគម្រោងចេញទៅកាណាដារបស់នាង៖

//www.youtube.com/watch?v=Rgza7Vi7NiM