លោក Rowan Atkinson ដែលនៅលើពិភពលោកបានស្គាល់លោកថាជា Mr Bean កាលពីថ្ងៃ​អាទិត្យ​ម្សិល​មិញ​នេះ បានចូលរួមពិធីសម្ពោធខ្សែភាពយន្តថ្មីចុងក្រោយរបស់លោក បានដាក់បញ្ចាំងតែនៅក្នុងប្រទេសចិនប៉ុណ្ណោះ។ នេះបើតាមការ​ចេញផ្សាយដោយសារព័ត៌មានចក្រភពអង់គ្លេស Daily Mail នៅមុននេះបន្តិចនារសៀលថ្ងៃច័ន្ទ ទី២០ ខែមីនា ឆ្នាំ២០១៧។

តារាកំប្លែងវ័យ ៦២ឆ្នាំ បានគាស់កាយសមត្ថភាពកំប្លែងក្រមិចក្រមើម ដើម្បីសម្ដែងក្នុងខ្សែភាពយន្ដថ្មីសម្រាប់​ទស្សនិកជនចិនជាងមួយពាន់ពាន់លាននាក់បានទស្សនាឡើងវិញ បន្ទាប់ពីលោកបានផ្អាកការសម្ដែងរាប់ឆ្នាំ ក្រោយពីមានការលែងលះជាមួយភរិយា ​លោក​ស្រី Sunatra មានវ័យ៥៦ឆ្នាំ ដែលធ្លាប់បានរួមរស់ជាមួយអស់រយៈពេល២៤ឆ្នាំ នឹងចំណាយប្រាក់អស់ជាង ៦​ លានដុល្លារ​សហរដ្ឋ​អាមេរិក កាលពីឆ្នាំ២០១៥ ។

គួរបញ្ជាក់ថា ខ្សែភាពយន្តថ្មីខាងលើមានចំណងជើងថា «Top Funny Comedian (កំពូលអ្នកកំប្លែង)» ត្រូវគេរំពឹងទុកថានឹង​ទទួលបានជោគ​ជ័យយ៉ាងធំធេង ហើយ​រក​ចំណូល​បាន​យ៉ាងច្រើន បន្ទាប់ពីរឿង Mr Bean’s Holiday ដែលបានដាក់បញ្ចាំងកាលពីឆ្នាំ២០០៧ និងរកចំណូលបាន​​បីលានដុល្លារនៅក្នុងប្រទេសចិនតែឯងប៉ុណ្ណោះ៕