យោងតាមបទសម្ភាសន៍ដែលបានផ្សាយផ្ទាល់ក្នុងកម្មវិធី«កិច្ចសម្ភាសន៍តារាសិល្ប: ឬ Komsan Talkshow» អ្នកនាងឈិន សុធារី បានអះអាងថាអ្នកនាងប្រកាន់ជំហរមិនទទួលយកការបកក្រោយរបស់អតីតស្វាមី គឺលោក សុវណ្ណ មករានោះទេ បើទោះជាមានថ្ងៃមួយលោកសម្រេចចិត្តបោះបង់ស្រីស្នេហ៍ ឬភរិយាចុង ហើយត្រូវត្រលប់មករកប្រពន្ធកូនវិញ។ ទន្ទឹមនឹងនោះ អ្នកនាងក៏បានប្រកាសឲ្យអតីតស្វាមី មកផ្ដិតមេដៃនៅសាលាសង្កាត់ឲ្យបានឆាប់នោះផង ដើម្បីឲ្យនាងបញ្ចប់ការពាក់ព័ន្ធទាំងស្រុងតាមអ្វីដែលអតីតស្វាមីចង់បាន។

អ្នកនាងនិយាយថាលោកសុវណ្ណ មករា បានចុះចេញពីនាង និងបានប្រកាសថាខ្លួនអស់និស្ស័យជាមួយនាង ដោយសម្រេចចិត្តទៅរួមរស់ជាមួយនារីម៉ូដែលម្នាក់ឈ្មោះចោមច័ន្ទ ដែលនាងបញ្ជាក់ថាបានស្គាល់គ្នាដោយសារតែលោកសុវណ្ណ មករា បានហៅនាងឲ្យសម្ដែងក្នុងរឿងភាគរបស់លោក។ នាងថាអតីតស្វាមីបានត្រឹមតែអះអាងថាចង់លែងនាង ដើម្បីឲ្យមានសេរីភាពទៅមានប្រពន្ធចុងដោយគ្មានសម្ពាធប៉ុណ្ណោះ ប៉ុន្តែមកទល់ម៉ោងនេះ គឺលោកនៅតែមិនយកឯកសារលែងលះមកកាន់សាលាសង្កាត់ដើម្បីឲ្យបានដាច់ស្រេចនោះទេ ក្នុងពេលដែលនាងធ្វើការរង់ចាំឲ្យចិត្តអន្ទារដើម្បីឲ្យផ្ដាច់កម្មពៀរជាមួយលោកតាមច្បាប់។ អ្នកនាងបញ្ជាក់ថារវាងស្វាមី និងអ្នកនាងដ្បិតថារៀបការក៏ពិតមែន ប៉ុន្តែចំណងអេតាស៊ីវិលមិនបានចងគ្ននោះទេ ទើបនាងយល់ថាឲ្យតែបានធ្វើលិខិតលែងលះត្រឹមសាលាសង្កាត់គឺនឹងបានរួចរាល់។ នាងថាបើលោកសុវណ្ណ មករាពិតជាសឿងចង់លែងនាងមែន សូមឲ្យលោកមកផ្ដិតមេដៃលែងលះជាមួយឲ្យបានដាច់ស្រេចផង ដើម្បីកុំឲ្យទៅមានភរិយាចុងក្រោយ ធ្វើឲ្យនាងឈឺចាប់ហើយ បែរជាមិនព្រមផ្ដិតមេដៃឲ្យនាងទទួលបានសេរីភាពទៀត។ យ៉ាងណាមិញអ្នកនាងថា មិនមែនចង់បានឯកសារលែងលះ ដោយសារតែចង់មានអ្នកថ្មី ឬអ្នកចាស់នោះទេ គឺគ្រាន់តែនាងឆ្អែតចិត្តនឹងការចុះចោលរបស់អតីតស្វាមី ហើយគិតថាបើលោកជ្រុលធ្វើចំពោះនាង និងកូនដល់ម្លឹងប៉ុណ្ណឹងហើយ គឺគួរតែលែងគ្នាឲ្យដាច់ ដើម្បីកុំឲ្យបន្តរសេមរសាម។ នាងថាលោកសុវណ្ណ មករា មិនអាចវិលត្រលប់មករកនាង និងកូនវិញទេ ដោយសារតែនាងអះអាងថាលោកកំពុងងប់ជាមួយនឹងភរិយាចុង។ អ្នកនាងក៏បានប្រកាសថាអតីតស្វាមី មិនបានទទួលខុសត្រូវចំពោះកូនទាំង២ក្រោយការចុះចោលផងដែរ ដោយនាងប្រកាសថានឹងតស៊ូចិញ្ចឹមកូនទាំង២ម្នាក់ឯង បើទោះជាលំបាកក្នុងជីវិតបន្តិច។

អ្នកនាងបានលាតត្រដាងពីរឿងរ៉ាវដ៏ក្ដៅគគុករបស់ខ្លួន ក្នុងកម្មវិធីដែលផ្សាយផ្ទាល់នៅលើផេកផុសកម្សាន្ត ក្នុងពេលដែលកម្មវិធីមួយនេះក្រៅពីមានការជជីកសួរពីសំណាក់ពិធីករ និងពិធីការិនី ក៏មានចោទឆ្លើយពីអ្នកខលចូលដែលទស្សនាកម្មវិធី។ អ្នកនាងគឺជាតារាកិត្តិយសបើកឆាក ខណ:ដែលកម្មវិធីនឹងបន្តជ្រើសយកតារាកិត្តិយសល្បីៗបន្តបន្ទាប់ឲ្យមកសម្ភាសន៍ និងលាតត្រដាងរឿងពិត។ កម្មវិធីនេះត្រូវបានប្រកាសថាបន្តផ្ទាល់រៀងរាល់ថ្ងៃព្រហស្បតិ៍ ដោយវត្តមានពិធីករពិធីការិនីក៏នឹងឆ្លាស់គ្នាជាមួយតារាល្បីៗផ្សេងទៀតផងដែរ៕