ដើម្បីអបអរភាពយន្តរឿង«វិកលចរិត»ត្រូវបានអនុញ្ញាតឲ្យបញ្ចាំងផ្លូវការនៅក្នុងរោងភាពយន្តរបស់ប្រទេសថៃ និងឡាវក្នុងពេលខាងមុខ ភាពយន្តនេះក៏នឹងដាក់លក់សំបុត្រឡើងវិញក្នុងពេលទន្ទឹមគ្នាផងដែរ។ នៅថ្ងៃទី៣ សីហានេះ ការដាក់បញ្ចាំងជាថ្មីនឹងត្រូវធ្វើឡើង ដើម្បីឲ្យពលរដ្ឋកម្ពុជា ដែលមិនទាន់បានទស្សនា ឬ ចង់ទស្សនាឡើងវិញ អាចទិញសំបុត្រមើលនៅតាមរោងកុនបាន។

លោក ហ៊ុយ យ៉ាឡេង ម្ចាស់ផលិតកម្មមាតុចក្រហ្វីលម៍ បានប្រកាសនៅលើហ្វេសប៊ុក លោកពិតជាមានសេចក្តីរីករាយយ៉ាងខ្លាំងដែលសេចក្តីព្យាយាមរបស់លោកបានសម្រេចក្នុងការនាំយកភាពយន្តរបស់ខ្លួន ឲ្យថៃ និង ឡាវ យល់ព្រមឲ្យដាក់បញ្ចាំងនៅរោងកុនគេបាន។ លោកថា ជារឿងលំបាកទម្រាំតែទាក់ទងបាន ដើម្បីឲ្យរឿងមួយនេះត្រូវបានប្រទេសទាំង២ទទួលយកបាន ជាពិសេសគឺប្រទេសថៃ។ ចំណែកភាគីឡាវ គឺមិនសូវជាបញ្ហាទេ ដោយសារតែមានក្រុមហ៊ុន Westac និង Puprum ជួយអន្តរាគមន៍។

លោកថា ភាពយន្តខ្មែររឿងវិកលចរិតនឹងចូលទីផ្សារប្រទេសថៃ និងឡាវ ព្រមជាមួយនឹងការដាក់បញ្ចាំងឡើងវិញនៅក្នុងប្រទេសកម្ពុជា ដើម្បីឲ្យរឿងមួយនេះត្រូវបានទស្សនាជាថ្មីម្ដងទៀត។

លោក ហ៊ុយ យ៉ាឡេង បន្តថាលោករំភើបឡើងអួលដើម នៅពេលដាក់បញ្ចាំងរឿងនេះកាលពីដំបូង ហើយពលរដ្ឋកម្ពុជាខ្លួនឯង មិនសូវគាំទ្រ។ លោកថារឿងនេះបានទទួលជោគជ័យ ដោយក្រៅពីទទួលផលចំណេញពីការដាក់បញ្ចាំងក៏មានការទទួលស្គាល់ក្នុងពិពណ៌ភាពយន្តក្នុងប្រទេសចិន។ លោកថាសប្បាយចិត្តណាស់ដែលនៅប្រទេសថៃ និងឡាវ ព្រមបើកទីផ្សារឲ្យលោកផ្លូវការ ទើបលោកសម្រេចស្នើសុំឲ្យរោងភាពយន្តនៅក្នុងប្រទេសកម្ពុជា ដាក់បញ្ចាំងឲ្យបានស្របគ្នានៅថ្ងៃទី សីហា ខាងមុខ ដោយខាងពូព្រហ្ម ជាអ្នកចាត់ចែងរឿងនេះប្រកបដោយភាពរលូន។

លោកថានៅក្នុងប្រទេសកម្ពុជា គឺជាឱកាសចុងក្រោយដែលពលរដ្ឋខ្មែរអាចទស្សនារឿង វិកលចរិត ម្ដងទៀត ក្រោយពីបានទម្លាក់ផ្លាកចេញពីរោងក្នុងពេលខាងមុខនេះ។ លោកទទូចឲ្យផ្តល់កម្លាំងចិត្តជាថ្មី ដើម្បីអបអរចំពោះរឿងនេះដែលអាចឈានចូលទីផ្សារ និងឡាវ បានជោគជ័យ។ លោករំពឹងថា ភាពយន្តរបស់លោកនឹងមានអ្នកទស្សនាច្រើនព្រមគ្នា ពិសេសនៅថៃ និងឡាវ ដោយសារតែរឿងមួយនេះ ត្រូបានលោកចាត់ទុកជារឿងប្រវត្តិសាស្ត្រធំមួយដែលលោកផលិតហើយមានការគាំទ្រខ្លាំង៕