មិនធម្មតា! បទថ្មី របស់ សុគន្ធ ដេវីត ស្ដាប់ហើយដក់ជាប់អារម្មណ៍!

ក្រោយជោគជ័យជាមួយបទចម្រៀង «សុំទោសបុប្ផាស្វាយរៀង» តារាចម្រៀងវ័យក្មេងលោក សុគន្ធ ដេវីត ត្រូវបានអ្នកគាំទ្រងាកមកចាប់អារម្មណ៍ ទៀតហើយ បន្ទាប់ពីលោកចេញបង្ហោះបទចម្រៀងថ្មីស្រឡាងក្រោមចំណងជើង «ត្បូងឃ្មុំ យំនឹកកំពង់ចាម» ដែលអត្ថន័យបទរបស់បទនេះ គឺអាចនិយាយបានថាស្ដាប់ហើយដោតជាប់អារម្មណ៍ ជាពិសេសអ្នកដែលមានស្រុកកំណើត ឬមានលំនៅក្នុងខេត្ត២គឺកំពង់ចាម និងត្បូងឃ្មុំ។

ក្រៅពីមានអត្ថន័យគួរឲ្យចង់ស្ដាប់ ចម្រៀងមួយបទនេះក៏បានរំលឹកពីបទចម្រៀងម្ចាស់ដើម ដែលធ្វើឲ្យអ្នកស្ដាប់កោតសរសើរពីការអភិរក្សបទចម្រៀងរបស់ម្ចាស់ដើមដែលលោកយកមកច្នៃនោះផង។

នៅលើប្រព័ន្ធYoutube គេឃើញបទថ្មី «ត្បូងឃ្មុំយំនឹកកំពង់ចាម» របស់លោកសុគន្ធ ដេវីត មានការចែកចាយ និងចូលទស្សនាច្រើនដង ចាប់តាំងពីបទថ្មីនេះបង្ហាញវត្តមានជាសាធារណៈ កាលពីថ្ងៃទី១ សីហា។

នេះជាបទចម្រៀងថ្មីសន្លាងដែលបានកែច្នៃចេញពីសាច់ភ្លេងរបស់ម្ចាស់ដើម ប៉ុន្តែលោកមិនបានបំភ្លេចម្ចាស់ដើមនោះទេ គឺលោកបានសំឡេងម្ចាស់មុនសិន មុននឹងបទចម្រៀងរបស់លោកត្រូវបានបន្លឺឡើងនៅក្នុង Youtube ។ ត្រង់ចំណុចនេះហើយ ដែលធ្វើឲ្យបទចម្រៀងមួយបទគ្រាន់តែបង្ហោះភ្លាម កន្ត្រាក់បានអ្នកស្ដាប់ភាគច្រើនដែលបានចូលស្ដាប់តែម្ដង។ នៅលើផេករបស់តារាចម្រៀងរូបនេះ ត្រូវគេឃើញអ្នកគាំទ្រដែលពាក់ព័ន្ធនឹងខេត្តកំពង់ចាម និងត្បូងឃ្មុំ បញ្ចេញទស្សនៈសរសើរថាត្រូវចិត្ត និងថានេះជាបទដែលមានខ្លឹមសារអត្ថន័យស្ដាប់ហើយដក់អារម្មណ៍។

អ្នកទាំងនោះបានដើរតួជាអ្នកចែកចាយបទចម្រៀងមួយបទនេះជំនួសឲ្យលោកជាម្ចាស់បទផង ទើបធ្វើឲ្យបទថ្មីរបស់លោកទទួលបានការគាំទ្រខ្លាំងភ្លាមៗ បើធៀបនឹងបទថ្មីដែលទើបបង្ហោះលើផេក និងYoutube ក្ដៅៗដូចគ្នា។

លោកសុគន្ធ ដេវីត និយាយថាចម្រៀងមួយបទនេះលោកបានធ្វើឡើងក្នុងគោលបំណងរំលេចបទឲ្យមានការចាប់អារម្មណ៍ចំពោះបទចាស់របស់ម្ចាស់ដើមផង និងចង់រៀបរាប់ពីអនុស្សាវរីយ៍ក្នុងខេត្តកំពង់ចាម និងខេត្តត្បូងឃ្មុំ ក្រោយពេលខេត្តទាំង២ត្រូវបានកាត់ផ្ដាច់ជាខេត្ត២ផ្សេងគ្នានោះផង។

លោកថាសប្បាយចិត្តដែលឃើញចម្រៀងមួយបទនេះទទួលបានការសរសើរ ជាពិសេសអ្នករស់នៅខេត្តត្បូងឃ្មុំ និងកំពង់ចាម ឆាតមកគាំទ្របទនេះច្រើន។ លោករំពឹងថាបទ «ត្បូងឃ្មុំយំនឹកកំពង់ចាម» នឹងក្លាយជាបទពេញនិយមរបស់ខេត្តទាំង២ ដោយសារតែក្នុងបទនេះ លោកបានបញ្ចូលអត្ថន័យជ្រាលជ្រៅភាគច្រើន ដែលសូម្បីតែលោកគឺបានស្ដាប់ហើយក៏ដក់អារម្មណ៍។
លោកថាអ្នកស្ដាប់បទនេះបានឆាតប្រាប់លោកថាគឺប្រៀបដូចជាបានស្រម៉ៃដល់ស្នេហារបស់យុវវ័យ២នាក់ដែលត្រូវបែកគ្នា និងស្រម៉ៃដល់តំបន់សំខាន់ៗ និងអនុស្សាវរីយ៍ក្រោយខេត្តទាំង២បែកគ្នា ទើបអ្នកចូលស្ដាប់ភាគច្រើនត្រូវចិត្ត។