ក្រោយពីមានការទម្លាយថានាយក្រឹមបានចុះចោលផ្ទះ និងផ្ដាច់ទាំងស្រុងនូវហិរញ្ញវត្ថុកូនប្រពន្ធ ចាប់តាំងពីនាយក្រឹមបានទាក់ទងជាមួយនាងលាភ ដែលជាភរិយាចុងបច្ចប្បន្ន កូនពៅរបស់នាយក្រឹមក៏បានបញ្ជាក់ថា នាយក្រឹមក្រៅពីមិនការពារតម្លៃប្រពន្ធ និងកូនៗស្របច្បាប់ ក៏បណ្ដោយឲ្យនាងលាភវ៉ៃម្ដាយរបស់ខ្លួន និងជេរម្ដាយរបស់ខ្លួន ក្នុងពេលមានជម្លោះកើតឡើងនោះផងដែរ។ អ៉ីចឹងហើយទើបកូនៗរបស់នាយក្រឹម បានប្រកាសយ៉ាងមុខមាំថានឹងឈានដល់ការឈប់រាប់រកនាយក្រឹមជាឪពុក និងជាអ្នកមានគុណ ប្រសិនបើនាងក្រឹមបន្តបោះបង់ភរិយា និងកូនៗបន្តទៀត។

លោក អ៊ូ ដានីញែលរ័ត្នមុន្នី កូនទី៤របស់នាយក្រឹម បានអះអាងថាតាំងពីឆ្នាំ២០១៤ នាយក្រឹម និងនាងលាភ បានក្លាយជាប្ដីប្រពន្ធគ្នាដោយមិនខ្វល់ពីការពេបជ្រាយតែម្ដង ដោយសូម្បីតែកូនៗនិយាយពាក្យសម្ដីណាមួយមានការប៉ះពាល់ដល់ភរិយាចុងរបស់លោក គឺនាយក្រឹមថែមទាំងគំរាមឈប់ផ្គត់ផ្គង់ធ្វើឲ្យលោក និងបងៗមានសម្ពាធក្នុងជីវិតនោះផង។ លោកថាជាការឈឺចាប់ក្នុងពេលដែលម្ដាយរបស់លោកបាត់នាយក្រឹមមិនចូលផ្ទះមួយរយៈធំ ដោយស្ងាត់ទាំងមិនជួយលុយកាក់ប្រពន្ធកូន ហើយម្ដាយរបស់លោកទៅតាមរកនាយក្រឹមបានជួបនាងលាភ ក៏ត្រូវនាងលាភប្រើហិង្សាដាក់ធ្វើឲ្យមានរបួស ប៉ុន្តែនៅពេលនាយក្រឹមមកដល់ក៏ការពារនាងលាភ ធ្វើឲ្យម្ដាយរបស់លោកឈឺទាំងកាយ ឈឺទាំងចិត្ត។

លោកអះអាងថា នាងលាភរមែងជេរប្រមាថម្ដាយរបស់លោកយ៉ាងពេញៗមាត់ៗ ដោយលោកក៏មានសំឡេងជេរប្រមាថនោះក្នុងពេលឈ្លោះគ្នានោះផង ប៉ុន្តែលោកមិនដែលឃើញនាយក្រឹមមានការណែនាំ ឬការពារម្ដាយរបស់លោក ដែលជាភរិយាស្របច្បាប់នោះទេ ទើបធ្វើឲ្យលោកជាកូនៗ និងម្ដាយផ្ទាល់ឆ្អែតចិត្ត។ យ៉ាងណាមិញ លោកថាម្ដាយរបស់លោកមិនដែលចង់លែងលះជាមួយនាយក្រឹមនោះទេ ដោយសារតែអាណិតកូនៗ និងគិតអាណិតដល់លោកខ្លាចលោកពិបាកក្រោយពេលធ្លាក់ខ្លួនរកលុយលែងបាន។

លោក អ៊ូ ដានីញែលរ័ត្នមុន្នី បន្តថាម្ដាយរបស់លោកប្រកូកប្រកាសប្រាប់អ្នកសារព័ត៌មានពីចំណងស្នេហ៍របស់ឪពុកជាមួយនឹងនាងលាភ ដោយគំរាមនឹងដាក់បណ្ដឹងពីបទនាងលាភលួចប្ដីផង គឺគ្រាន់តែចង់ឲ្យនាយក្រឹមខ្មាស់មហាជនហើយងាកមករកប្រពន្ធកូនវិញប៉ុណ្ណោះ ប៉ុន្តែក្រោយពេលរឿងរ៉ាវខ្ទរខ្ទារ នាយក្រឹមបែរជាឈប់ជាន់ផ្ទះ និងផ្ដាច់ហិរញ្ញវត្ថុប្រពន្ធកូនទាំងស្រុង ទើបលោកប្រកាសថាមានតែការកាត់កាលឈប់គោរពជាឪពុកប៉ុណ្ណោះ បើលោកនៅតែបន្តបោះបង់គ្រួសារ។

លោកបន្តថានៅពេលនាយក្រឹមធ្វើបាបម្ដាយ ធ្វើបាបកូនៗដោយសារតែនាងលាភកាន់តែធ្វើឲ្យលោកឈឺចាប់នៅពេលនឹកដល់រូបភាពនាងលាបវាយតប់ម្ដាយលោក ជេរប្រមាថលោក ហើយនាយក្រឹមនៅតែកាន់ជើងប្រពន្ធចុង។

យ៉ាងណាមិញពាក់ព័ន្ធនឹងការទម្លាយនេះ នាងលាភ មិនទាន់បានសុំការបកស្រាយនោះទេ ក្នុងពេលដែលនាយក្រឹមនៅតែរក្សាជំហរ លោកគឺនៅតែជាឪពុកល្អ និងជាស្វាមីល្អបើទោះជាលោកបានងាកមកទទួលខុសត្រូវដល់នាងលាភ ក្រោយមានកូនភ្លោះជាមួយគ្នានៅពេលនេះ៕