មកទល់ពេលនេះស្ថានភាពជំងឺរបស់តារាកំប្លែងលោកនាយវីតាមីនសេ និងតារាសម្ដែងកញ្ញា ពេជ្រ ចរណៃ ដែលជាសិស្សគុនផ្នែកល្បុកត្តោ ស្ថិតក្នុងការសង្គ្រោះបន្ទាន់នៅឡើយទេដោយសារតែអ្នកទាំង២សុទ្ធតែមិនទាន់មានលទ្ធភាពធ្វើការវះកាត់នៅឡើយ។

អ្នកទាំង២សុទ្ធតែស្ថិតក្នុងប្រឈមពីការគំរាមកំហែងដល់អាយុជីវិត ប្រសិនបើក្នុងពេលខាងមុខមិនមានលទ្ធភាពធ្វើការវះកាត់បានទាន់ពេលវេលា។

អ្នកនាងប៉េងប៉ោង បានថ្លែងប្រាប់ថា ក្រោយការចាកចេញពីប្រទេសកម្ពុជា ទៅធ្វើការពិនិត្យនៅក្នុងមន្ទីរពេទ្យប្រទេសថៃ ឪពុករបស់អ្នកនាងគឺលោកនាយវីតាមីនសេ នៅមិនទាន់បានធ្វើការវះកាត់នោះទេ ដោយសារតែខាងមន្ទីរពេទ្យថៃកំណត់ឲ្យលោកមកធ្វើការពិចារណាពីបញ្ហាប្រាក់កម្រៃជាមុនសិន ដើម្បីសម្រេចចិត្តថាធ្វើការវះកាត់ ឬញាំថ្នាំពន្យារអស់មួយជីវិត។ អ្នកនាងនិយាយថាលោកវីតាមីនសេ មិនអាចជម្រើសយកពិធីលេបថ្នាំពន្យារបានទេ ដោយសារតែការជម្រើសយកពិធីនេះអាចបណ្ដាលឲ្យជំងឺដុំសាច់ក្នុងថ្លើមរបស់លោកឪពុករីករាលដាលហើយបង្កការពិបាកនៅថ្ងៃក្រោយ។

អ្នកនាងថាបើជម្រើសយកការប្រើថ្នាំដើម្បីទប់ស្កាត់មេរោគ និងការពារកុំឲ្យដុំសាច់រីកធំឡើង គឺគ្រាន់តែបានទប់ស្កាត់សភាពធ្វើទុក្ខកុំឲ្យសុខភាពរបស់ឪពុកមានការប៉ះពាល់ប៉ុណ្ណោះ តែបើជម្រើសយកការវះកាត់ដ្បិតថាត្រូវចំណាយអស់ច្រើន ប៉ុន្តែភាគីខាងគ្រូពេទ្យជំនាញបានអះអាងថានឹងជា១០០ភាគរយ។ អ្នកនាងប៉េងប៉ោង បញ្ជាក់ថា នាយវីតាមីនសេ ត្រូវបានពេទ្យថៃបញ្ជាក់ថាអាចវះកាត់ដុំសាច់ក្នុងថ្លើមដោយមិនបង្កផលប៉ះពាល់ដល់ជំងឺទឹកនោមផ្អែម ជំងឺលើសឈាម និងជំងឺដំបៅក្រពះនោះទេ អ៉ីចឹងហើយទើបអ្នកនាង និងគ្រួសារសប្បាយចិត្ត តែស្ថិតក្នុងការភ័យបារម្ភជុំវិញការស្វះរកឲ្យបាន២ម៉ឺនដុល្លារដើម្បីធ្វើការវះកាត់។

អ្នកនាងថាគ្រូពេទ្យតម្រូវឲ្យចាក់ថ្នាំឲ្យសាច់ស្វិតចំនួន២លើកដោយនៅពាក់កណ្ដាលខែ១២ គ្រូពេទ្យណាត់ឲ្យទៅចាក់ថ្នាំរំលាយដុំសាច់ម្ដងដោយចំណាយអស់៦ពាន់ដុល្លារ មួយខែក្រោយទៅចាក់ថ្នាំរំលាយដុំសាច់ជាលើកទី២ដោយចំណាយអស់៦ពាន់ដុល្លារម្ដងទៀត ទើបឈានដល់ការវះកាត់ដុំសាច់ចោល ដោយចំណាយចុងក្រោយអស់៨ពាន់ដុល្លារ។ អ្នកនាងថាសរុបទាំងការចាក់ថ្នាំរំលាយ និងវះកាត់គឺលោកវីតាមីនសេ នឹងចំណាយរសរុប២ម៉ឺនដុល្លារ ទើបអ្នកនាងកំពុងតែគិតគូគ្នាថាត្រូវលក់ឡាន បញ្ចាំផ្ទះ ឬធ្វើយ៉ាងណា ខណ:ដែលជំនួយដែលបានជួយដល់ឪពុកក្នុងពេលទៅពិនិត្យនៅឯមន្ទីរពេទ្យថៃមុននោះក៏ចំណាយអស់មួយចំនួនហើយ។

ងាកទៅតារាសម្ដែងកញ្ញា ពេជ្រ ចរណៃ វិញ ក៏បានប្រកាសថាគ្រូពេទ្យប្រទេសថៃតម្រូវឲ្យចំណាយចំនួន២ម៉ឺនដុល្លារដូចគ្នាផងដែរ ដើម្បីធ្វើការវះកាត់។ កញ្ញាថាខ្លួនមិនមែនមិនចង់ទទួលយកការវះកាត់ដោះដូរសរសៃប្រើសបេះដូងនៅក្នុងប្រទេសកម្ពុជា ដែលខាងមន្ទីរពេទ្យកាល់ម៉ែត្របានប្រកាសបញ្ចុះតម្លៃត្រឹមតែ៥ពាន់ដុល្លារ ដែលជាចំនួនមួយតិចងាយនឹងស្រួលជំនួយនោះទេ ប៉ុន្តែមកពីនាងមិនចង់ទទួលយកលក្ខណ:វះកាត់មួយនេះទើបនឹងស្នើសុំឲ្យមានការជួយសង្គ្រោះនាងដើម្បីឲ្យនាងអាចមានលទ្ធភាពធ្វើការវះកាត់ជួសជុលសរសៃបេះដូងនៅក្នុងប្រទេសថៃវិញ។

នាងថាបាននាងទទួលយកលក្ខណ្ឌវះកាត់ដូរដាក់សរសៃបេះដូងសិប្បនិមិត្តិនៅក្នុងពេលនេះ គឺអំឡុង៥ឆ្នាំទៅ៩ឆ្នាំក្រោយគឺនាងនឹងត្រូវវះកាត់ដោះដូរជាថ្មីទៀតហើយ អ៊ីចឹងតើនាងត្រូវបន្តស្នើសុំជំនួយពីសប្បុរសជនបែបនេះគ្រប់ពេលត្រូវដូរ ឬ សុខចិត្តទទូចសុំតែម្ដងហើយអាចរស់បានដូចអ្នកមិនមានជំងឺ។

កញ្ញាថា ពេទ្យក្នុងស្រុកបានអះអាងថាមិនអាចធ្វើការជួសជុលសរសៃប្រើសបេះដូងរបស់នាងបានទេក្រៅពីការវះកាត់ដោះដូរដាក់សរសៃប្រើសសិប្បនិមិត្ត ក្នុងពេលដែលខាងពេទ្យថៃគេធានានឹងព្យាបាលជំងឺប្រហោងបេះដូង និងជួសជុលសរសៃប្រើបេះដូងរបស់នាងឲ្យជា១០០ភាគរយ ដោយមិនចាំប្រឈមដូចការវះកាត់ដាក់សរសៃសិប្បនិមិត្ត។ នាងថាមនុស្សមួយចំនួនបានរិះគន់ថា ថាខាងពេទ្យកាល់ម៉ែត្រធានាវះកាត់ដូរសរសៃប្រើសបេះដូងឲ្យនាងដោយតម្រូវឲ្យបង់តែ៥ពាន់ដុល្លារហើយ ហេតុអ្វីបានជានាងបន្តប្រកែកហើយសុខចិត្តអំពាវនាវសុំជំនួយទៅវះកាត់នៅស្រុកថៃទៀត ថាជាមូលហេតុដែលនាងចង់បានលុយទៅកាន់ក្នុងដៃដើម្បីកេងចំណេញ ប៉ុន្តែធាតុពិតគឺដោយសារតែនាងមិនចង់វះកាត់ដោះដូរសរសៃប្រើសហើយត្រូវប្រឈមប្រើថ្នាំរំលាយឈាមប្រចាំ និងត្រូវមានលុយវះដូររៀងរាល់៥ឆ្នាំទៅ៩ម្ដង ដែលនោះសុទ្ធតែជាការប្រឈមរបស់នាង។

នាងថានៅខាងមន្ទីរពេទ្យថៃបានកំណត់យកនាងចំនួន៤ម៉ឺនដុល្លារដើម្បីវះកាត់ជួសជុលសរសៃបេះដូង ប៉ុន្តែដោយសារតែមានសប្បុរសជនជួយនិយាយជាមួយពេទ្យ ទើបខាងពេទ្យសម្រេចចិត្តបញ្ចុះតម្លៃឲ្យនាងត្រឹមតែ២ម៉ឺនដុល្លារ៕