ទើបតែដាក់បង្ហោះនៅលើផេកផ្ទាល់ខ្លួន និងលើយូធូប បានត្រឹមប៉ុន្មានម៉ោងប៉ុណ្ណោះ តែគេកត់សម្គាល់ថា MV ក្ដៅៗក្រោមចំណងជើងថា«មនុស្សក្នុងបេះដូងបងគឺអូន» មានអ្នកចែកចាយ និងចូលទស្សនាយ៉ាងច្រើន។ អ្វីដែលគេបានឃើញ គឺសាច់រឿងនៅក្នុងបទចម្រៀងនេះ មានលក្ខណៈជាស្នេហាស៊ីជម្រៅ ហើយកម្សត់ចង់ស្រក់ទឹកភ្នែកតាម ជាពិសេសសម្រាប់អ្នកមានស្នេហាតស៊ូ គឺពិតជាទប់ទឹកភ្នែកមិនបាន។

MV ដែលបានចេញបង្ហោះនេះ គឺជាលើកទី១ ដែលតារាចម្រៀង លោក សុគន្ធ ដេវីត មានឱកាសបានសម្ដែងជាមួយតារាសម្ដែងខុសជំនាន់ គឺអ្នកនាងមាស សម្ផស្ស ខណៈដែលអ្នកទាំង២សម្ដែងបានស៊ីសង្វាក់គ្នាយ៉ាងខ្លាំង នៅក្នុងបទចម្រៀងទាំងមូល។
បទចម្រៀងក្រោមចំណងជើងថា«មនុស្សក្នុងបេះដូងបងគឺអូន» ត្រូវអ្នកទស្សនាភាគច្រើនសរសើរថាមានសាច់រឿងទាក់ចិត្ត ហើយលោក សុគន្ធ ដេវីដ ដែលជាម្ចាស់បទ ក៏សម្ដែងបានល្អណាស់ដែរ បើធៀបនឹងពេលដែលលោកបានសម្ដែងក្នុងបទចម្រៀងផ្ទាល់ខ្លួនមុនៗ។ វីដេអូនៅក្នុងបទនេះ ស្ទើរតែទប់ទឹកភ្នែកមិនបាន ដោយសារតែតួអង្គប្រុសបានក្លាយជាជនរងគ្រោះព្រោះតែជំងឺធ្ងន់ធ្ងរបំបែកលោកពីនារីដែលលោកស្រឡាញ់ ហើយលោកប្រឹងលាក់រហូតដល់កម្រិតសង្គ្រោះលែងបាន។ យ៉ាងណាមិញ គេមិនទាន់ដឹងថាMV ដែលទើបតែចេញបង្ហោះក្ដៅៗនេះ នៅមិនទាន់ប្រាកដថានឹងជោគជ័យកម្រិតណានោះទេ បើទោះជាក្រោយបង្ហោះបានប៉ុន្មានម៉ោង ត្រូវគេកត់សម្គាល់ថាមានអ្នកចាប់អារម្មណ៍មិនធម្មតា។

ប៉ុន្តែផ្អែកតាមទស្សនៈពីម្ចាស់បទចម្រៀងគឺលោកជឿជាក់ចំពោះសាច់រឿង និងអត្ថន័យរបស់បទនេះ បន្ទាប់ពីបទ«មនុស្សក្នុងបេះដូងបងគឺអូន» បានក្លាយជាបទបុកត្រូវអារម្មណ៍យុវវ័យតាំងពីមិនទាន់ចេញជាMV រួចទៅហើយ។

លោក សុគន្ធ ដេវីដ និយាយថា លោកមានអារម្មណ៍រំភើបចិត្ត ដែលMV បទនេះ ទើបតែបានដាក់បង្ហោះបានមិនដល់ប៉ុន្មានម៉ោងទេ ប៉ុន្តែមានអ្នកគាំទ្រមិនធម្មតា ដោយមានអ្នកឆាតមកសរសើរធ្វើអោយលោកកាន់តែមានកម្លាំងចិត្តនោះផង។

លោកថាបទចម្រៀងមួយនេះ ត្រូវបានសម្រិតសម្រាំងសាច់រឿង ហើយលោកក៏សរសើរចំពោះតារាស្រីអ្នកនាងមាស សម្ផស្ស ផងដែរ ដែលបានចាប់ដៃសម្ដែងជាមួយលោកបានស៊ីសង្វាក់ រហូតធ្វើសាច់រឿងនៅក្នុងបទចម្រៀង ក្លាយជាឈុតឆាកស្នេហាកម្សត់ ហើយមានការចាប់អារម្មណ៍តាំងពីបានដាក់បង្ហោះភ្លាមៗ។ លោកជំរុញអោយគាំទ្រស្នាដៃដែលលោកផលិតឡើង ដោយក្នុងពេលដ៏ខ្លីលោកក៏ត្រៀមបញ្ចេញបទថ្មី និងMV ដែលមានសាច់រឿងជក់ចិត្តជាងនេះផងដែរ បន្ទាប់ពីបទចម្រៀងច្រើនបទរបស់លោក ក៏ទទួលបានជោគជ័យរួចទៅហើយ៕

https://youtu.be/VGTLO3v_DBo