កាលពីព្រឹកថ្ងៃទី១៣ មករា គេកត់សម្គាល់ថា ព្រឹត្តិការណ៍តន្ត្រីសប្បុរសធម៌លើកទី៩ និងអបអរខួបលើកទី៥៨របស់សាកលវិទ្យាល័យភូមិន្ទភ្នំពេញ ពិតជាកក្រើកយ៉ាងខ្លាំង ដោយសារតែវត្តមានគណអធិបតីដែលអញ្ជើញចូលរួមសុទ្ធតែសមាសភាពមន្ត្រីជាន់ខ្ពស់ និងពិសេសគឺមានក្រុមចម្រៀងក្មេងៗ យ៉ាងច្រើនកុះករ មកពីគ្រួសារតារាកម្ពុជា ចូលកូរនៅក្នុងកម្មវិធី។

នេះជាវត្តមានចូលរួមលើកទី១របស់គ្រួសារតារាកម្ពុជា ហើយជាវេទិកាដែលគេចាប់អារម្មណ៍ថា មានការចាប់អារម្មណ៍យ៉ាងកក្រើកផងដែរ បើទោះជាវត្តមានតារាសិល្បៈ ដែលបានបង្ហាញខ្លួនសុទ្ធសឹងតែជាតារាពន្លកថ្មី និងមិនទាន់ល្បីល្បាញលំដាប់ប្រទេសនៅឡើយ។
តារាសិល្បៈដែលបានបង្ហាញ នៅក្នុងវេទិកានោះ រួមមានតារាចម្រៀងមកពី Cambodian Idol រដូវកាលទី៣រួមមានកញ្ញា ញឹម សួនសោភាទេពី លោកវង្ស ថាណាន់ កញ្ញា ចាន់ឡៃ វលក្ខណ៍ លោកអៀម វន្នី ដែលជាអតីតបេក្ខជន Cambodian Idol រដូវកាលទី១ កញ្ញាប៊េប៊ី លោកជ័យ សុវ៉ាត តារាចម្រៀងមកពីផលិតកម្មសាន់ដេ លោកសុគន្ធ ដេវី តារាចម្រៀងមកពីផលិតកម្ម BN លោកខៀវ ប៊ុនលាភ តារាចម្រៀងមកពីផលិតកម្ម E Nation លោកនីគី តារាចម្រៀងមកពីផលិតកម្ម JH លោក សុខ ដែន តារាក្បាច់គុនមកពីផលិតកម្ម BN តារាចម្រៀងកំពុងពេញនិយមកញ្ញា អ៊ុង នីនិច តារាចម្រៀងផ្កាយរះក្នុងសួនប្អូនប្រុស សោម វិរៈបុត្រ តារាចម្រៀង Original Song លោកថន ណារ៉ុង អមដោយពិធីករពិការិនីឆ្នើម៣រូប គឺ កញ្ញា ប៉ុបពី លោកនីរិទ្ធិ អែនឌ្រូ មកពីប៉ុស្ដិ៍លេខ៩ និងលោកធៀ ហាក់មុនី អតីតពិធីករប៉ុស្ដិ៍លេខ៥ សុទ្ធតែបានធ្វើអោយព្រឹត្តិការណ៍តន្ត្រីសប្បុរសធម៌របស់សកលវិទ្យាល័យភូមិន្ទភ្នំពេញឆ្នាំកក្រើកខ្លាំង។

នេះគ្រាន់តែជាការប្រគំតន្ត្រីតូចមួយ នៅក្នុងកម្មវិធីប៉ុណ្ណោះ ខណៈដែលនៅពេលរសៀលក្នុងថ្ងៃដដែល ក៏មានការប្រគំតន្ត្រីពីសំណាក់តារាល្បីៗ ជាច្រើនផ្សេងទៀត ដើម្បីលក់សំបុត្រប្រមូលថវិកាជួយដល់និស្សិតក្រីក្រ នៅក្នុងសាកលវិទ្យាល័យ។ កញ្ញា សន រដ្ឋា តំណាងនិស្សិតជាអ្នករៀបចំកម្មវិធី បានអះអាងថាព្រឹត្តិការណ៍តាំងពិព័រណ៌ និងប្រគំតន្ត្រីរបស់សកលវិទ្យាល័យភូមិន្ទភ្នំពេញនេះ ត្រូវបានធ្វើឡើងរាល់ឆ្នាំ ដោយការធ្វើឡើងម្ដងៗ គឺទទួលបានថវិកាបរិច្ចាគជាច្រើនពីសប្បុរសជន និងបានពីការលក់សំបុត្រប្រមូលថវិកា ដើម្បីជាតម្រូវការជួយនិស្សិតក្រីក្រ នៅក្នុងសកលវិទ្យាល័យប្រឈមការខ្វះខាត។ កញ្ញាសម្រាប់ឆ្នាំនេះមានការខុសប្លែកជាងមុន ដោយសារតែក្រៅពីការប្រគំតន្ត្រីលក់សំបុត្រ ក្នុងសាលក៏មានការប្រគំតន្ត្រីចូលរួមពីគ្រួសារតារាកម្ពុជា នៅបរិវេណតាំងពិព័រណ៌ ដើម្បីអោយមានការទស្សនាដោយសេរី និងដើម្បីអោយមានការបរិច្ចាគពីអ្នកទស្សនាផងដែរ។

កញ្ញាចាត់ទុកថា ការរៀបចំកម្មវិធីសប្បុរសធម៌នៅក្នុងឆ្នាំនេះគគ្រឹកគគ្រេងជាងមុន តែកញ្ញាមិនទាន់អាចប្រាប់អោយដឹង ពីតួលេខថវិកាមូលនិធិដែលទទួលបាននៅឡើយទេ ដោយសារតែមិនទាន់មានការបូកសរុបអស់នៅឡើយ៕