ស្ងប់ស្ងាត់ពីរឿងតុលាការមួយខ្យល់ ពេលនេះប្រភពផ្លូវការបានអះអាងថា ករណីបណ្ដឹងទាមទារអោយតារាសម្ដែងកញ្ញា នី មុន្នីនាថ ពីបទឆបោក និងរំលោភលើសេចក្ដីទុកចិត្ត កម្រើកឡើងវិញហើយ បន្ទាប់ពីករណីបណ្ដឹងនេះនឹងត្រូវតុលាការស៊ើរើ ស្របគ្នាដែលអតីតគូដណ្ដឹងរបស់នាងក៏ត្រូវកំណត់អោយឡើងមកបំភ្លឺដើម្បីតតាំងគ្នាផង។ លោកអ៉ឹង សូឡាង ជាដើមបណ្ដឹងនឹងឡើងយន្តហោះពីអាមេរិកមកដល់កម្ពុជា នៅថ្ងៃទី២២ មករា នេះហើយ ដោយលោកនឹងនៅតតាំងក្ដីជាមួយនី មុនីនាថ រហូតដល់បញ្ចប់ការកាត់ក្ដី។

ប្រភពពីតុលាការនិយាយថា នៅអំឡុងចុងខែកុម្ភៈនេះ បណ្ដឹងរបស់អ៉ឹង សូឡាង លើតារាសម្ដែងកញ្ញា នី មុន្នីនាថ នឹងត្រូវកំណត់អោយកាត់ក្ដីហើយ បន្ទាប់ពីបណ្ដឹងមួយនេះត្រូវបានអូសបន្លាយច្រើនខែមកហើយ ចាប់តាំងពីលោក អ៉ឹង សូឡាង ដាក់បណ្ដឹង និងបន្ទាប់ពីកញ្ញានី មុន្នីនាថ បានស្នើសុំពន្យារពេលចូលបំភ្លឺ ដើម្បីស្វែងរកមេធាវី។ ប្រភពបន្តថា លោក អ៉ឹង សូឡាង និងកញ្ញានី មុន្នីនាថ នឹងតម្រូវអោយចូលបំភ្លឺដោយផ្ទាល់នៅក្នុងពេលដ៏ខ្លីនោះ ដោយក្រោយការបំភ្លឺ នឹងតម្រូវអោយមានការសម្រុះសម្រួល ហើយបើការសម្របសម្រួលមិនមានលទ្ធផល នឹងឈានដល់ការកាត់ក្ដី។ យ៉ាងណាមិញ ប្រភពពីតុលាការបានបដិសេធមិនទម្លាយអោយដឹងពីកាលបរិច្ឆេទក្នុងការចូលបំភ្លឺរបស់អ្នកទាំង២ និងលទ្ធផលទុកមុននៃការកាត់ក្ដីនោះទេ។
ស្របគ្នានឹងការទម្លាយនេះ ភាគីលោក អ៉ឹង សូឡាង អតីតគូដណ្ដឹងរបស់កញ្ញា នី មុន្នីនាថ បានថ្លែងប្រាប់បណ្ដាញសារព័ត៌មានក្នុងស្រុកថាលោកនឹងមកដល់កម្ពុជានៅថ្ងៃទី២២ មករា នេះ ដោយការមកដល់របស់លោកនឹងមិនកំណត់ពេលវេលាត្រឡប់ទៅវិញនោះទេ ដរាបណាមន្ត្រីតុលាការមិនអាចកាត់ក្ដីបណ្ដឹងរបស់លោកអោយដាច់ស្រេច។ លោកហាក់មានជំនឿចិត្តថានឹងឈ្នះក្ដីលើនី មុន្នីនាថ ខណៈដែលនី មុន្នីនាថ ក៏មានជំនឿថានឹងឈ្នះក្ដីដូចគ្នា។ មេធាវីរបស់នី មុន្នីនាថ បានទាំងប្រកាសថានឹងប្ដឹងលោក អ៉ឹង សូឡាង ពីបទបរិហាកេរ្តិ៍ ក្រោយពេលឈ្នះក្ដីនោះផង ដោយសារតែការបង្ហោះរបស់លោក អ៉ឹង សូឡាង ត្រូវបានមេធាវីរបស់នាងប្រាប់ថាធ្វើអោយប៉ះពាល់ដល់កិត្តិយសរបស់នាងខ្លាំង។

ជាមួយនឹងការទម្លាយរបស់មន្ត្រីតុលាការ និងការប្រកាសថាលោក អ៉ឹង សូឡាង នឹងចុះមកតតាំងក្ដីជាមួយនាងដល់ស្រុកខ្មែរនេះ នឹងកាន់តែធ្វើអោយគេមើលឃើញថាបណ្ដឹងមួយនេះកម្រើកខ្លាំង ខណៈដែលអ្នកតាមដានក៏រង់ចាំមើលពីលទ្ធផលដែរនោះ៕