តាំងពីបានជាប់លេខក្នុងកម្មវិធី «ពេជ្រកំពុងច្នៃ»កាលពីឆ្នាំ២០១៣ គេចាប់អារម្មណ៍ថាអតីតបេក្ខជនចំណាត់ថ្នាក់លេខ២ លោក មាស បូរ៉ា ហៅ រ៉ា វីរៈ ទទួលបានជោគជ័យកាន់តែខ្លាំងនៅក្នុងវិស័យសម្ដែង ដោយគេកត់សម្គាល់ថាលោកកញ្ឆក់បានតំណែងជាតួឯកក្នុងរឿងនោះផង។

យ៉ាងណាមិញ លោកនៅតែចាត់ទុកថានោះ គ្រាន់តែជាជំហានចាប់ផ្ដើមរបស់ខ្លួនប៉ុណ្ណោះ ដោយសារតែលោកយល់ថាគោលដៅដែលខ្លួនទទួលបាននៅមិនទាន់ដូចការចង់បាន បើទោះជាលោកកាន់តែមានទីផ្សារ និងក្លាយជាតារាដែលមានកេរ្តិ៍ឈ្មោះបោះសំលេងនៅក្នុងសិល្បៈ។

អតីតបេក្ខភាពចំណាត់ថ្នាក់លេខ២ របស់«ពេជ្រកំពុងច្នៃ»រូបនេះ និយាយភ្លាមៗបន្ទាប់ពីបានប្រលងជាប់នាពេលនោះ លោកបានទទួលតែការងារដើរម៉ូដ និងថតស្ពតតិចតួប៉ុណ្ណោះ ប៉ុន្តែប្រហែលជិត២ឆ្នាំបន្ទាប់ លោកចាប់ផ្ដើមកន្ទ្រាក់បានការងារច្រើនឡើងលើផ្នែកសម្ដែង ដោយក្នុងរយៈពេលចុងក្រោយ គឺអាចនិយាយបានថាមិនមានពេលទទួលសម្ដែងអោយបានពេញលេញនោះផង។ លោកលេចធ្លោរកាន់តែខ្លាំងក្នុងឆ្នាំ២០១៦ បន្ទាប់ពីបានសម្ដែងក្នុងរឿង«លេខាថ្មី» រឿង«ចាប៉ីនាគត្រាច់ចរ» និងរឿង«ប្ដីម៉ែទេកូន»ជាដើម។ ក្នុងឆ្នាំ2018 នេះ លោកកំពុងសម្ងំថតរឿងចំនួន២រឿង គឺរឿង«វិញ្ញាណម្ចាស់ព្រែក»ដែលគ្រោងបញ្ចាំងនៅទូរទស្សន៍CTN និងភាពយន្តមួយរឿងដែលមិនទាន់បញ្ចេញចំណងជើងនៅឡើយរបស់ផលិតកម្មចក្រវាទ្ប។ ក្នុងនោះMV បទចម្រៀង លោកត្រូវបានគេស្គាល់មិនតិចនោះទេ ជាពិសេសគឺបន្ទាប់ពីបានសម្ដែងក្នុងបទ«ស្ទឹងត្រែងបងអើយ» របស់តារាចម្រៀងហង្សមាស លោក ខេមរះ សិរីមន្ដ និង បទ«អនុស្សាវរីយ៍ស្រុកកំពង់ត្រាច»របស់តារាចម្រៀងសាន់ដេ កញ្ញា លីនដា។

លោក រ៉ា វិរៈ បញ្ជាក់ថា លោកជាកូនអ្នកខេត្តកំពង់ឆ្នាំង ហើយក្នុងចំណោមគ្រួសាររបស់លោកគឺមានតែលោកតែប៉ុណ្ណោះ ដែលបានហក់ចូលក្នុងសិល្បៈ ហើយទទួលបានជោគជ័យ។ យ៉ាងណាក៏ដោយ លោកថាទម្រាំបោះជំហានមកដល់ពេលនេះ លោកក៏ត្រូវរែកពន់ការបរាជ័យរាប់មិនអស់ផងដែរ ជាពិសេសក្នុងពេលដែលលោកមុនបោះជំហានចូលប្រលង និងក្រោយប្រលងជាប់បានលេខ២ហើយ ក៏មិនសូវមានការគាំទ្រនោះ។ លោកធ្លាប់មានអារម្មណ៍ចង់បោះបង់ការងារមួយនេះច្រើនអន្លើរមកហើយ ប៉ុន្តែបណ្ដាលមកពីកម្លាំងចិត្ត និងការប្រឹងប្រែងជំនះការលំបាក និងការមើលស្រាលរាប់មិនអស់ ទើបលោកទទួលបានថ្ងៃនេះ។ មកទល់ពេលនេះ លោកថាការសិល្បៈបានក្លាយជាឆ្នាំងបាយដ៏ធំរបស់ខ្លួន ខណៈដែលតម្លៃខ្លួនក៏បានស្ទុះឡើងខុសពីពេលមិនទាន់ល្បី។ ថ្វីដ្បិតថាមិនទាន់មានក្លាយខ្លួនជាតារាល្បីជួរមុខនៅឡើយ ប៉ុន្តែលោកនៅតែចាត់ទុកថានេះជាជោគជ័យរបស់ខ្លួន ដោយលោកប្រកាសថានឹងបន្តវាយលុកការសម្ដែងអោយកាន់តែខ្លាំងក្នុងឆ្នាំ២០១៨នេះ ដើម្បីអោយកេរ្តិ៍ឈ្មោះអ្នកខេត្តកំពង់ឆ្នាំងកាន់តែលោតខ្លាំងឡើង៕