ដ្បិតថាជាអ្នករត់តុមួយរូបផ្សេងព្រេងមកពីខេត្តកំពង់ចាម ប៉ុន្តែគេកត់សម្គាល់តារាបេក្ខនារី គង់ កែវមរកត មានទឹកដមសម្លេងមិនធម្មតានោះទេ នៅក្នុងកម្មវិធី Cambodian Idol ក្នុងរដូវកាលទី៣នេះ។ ប៉ុន្មានសប្ដាហ៍កន្លងមកនេះ នាងទទួលបានការគាំទ្រខ្លាំងក្លាមិនធម្មតានោះ ដោយបានក្ដោបក្ដាប់សំឡេងបោះឆ្នោតដោយមិនស្ថិតក្នុងការភ័យបារម្ភនៅពេលប្រកាសលទ្ធផល និងមានការចែកចាយវីដេអូរបស់នាងគគ្រឹកគគ្រេងគួរឲ្យកត់សម្គាល់នោះផង។

បេក្ខនារីមួយរូប ដែលមានក្ដីស្រម៉ៃចង់ក្លាយជាតារាចម្រៀង ក្រោយពីតស៊ូរត់តុនៅភ្នំពេញយ៉ាងលំបាកនេះ កាន់តែធ្វើឲ្យអ្នកគាំទ្រចាប់អារម្មណ៍ចំពោះនាង បន្ទាប់ពីនាងបង្ហាញសមត្ថភាពក្នុងកម្មវិធី Cambodian Idol ហើយអាចបកស្រាយបទចម្រៀងបានស្ទើរតែគ្រប់ទម្រង់បានល្អពីមួយវគ្គទៅវគ្គ។ ជាក់ស្ដែងក្នុងវគ្គ Judge Audition នាងក៏ទទួលបានសំបុត្រមាស៤ និងបានទទួលបានការសរសើរពេញៗមាត់ពីក្រុមគណកម្មការទាំង៤ គឺលោកព្រាប សុវត្ថិ កញ្ញា ឱក សុគន្ធកញ្ញា លោកឆន សុវណ្ណរាជ និងលោក ណុប បាយ៉ារិទ្ធិ។ ក្នុងវីដេអូពីជីវប្រវត្តិ មានការប្រកាសថានាងជាកូនស្រីអ្នកម៉ៅការសំណង់ និងមានជីវភាពមិនសូវធូរធារនោះទេ ទើបធ្វើឲ្យមានការចាប់អារម្មណ៍ចំពោះនាងកាន់តែខ្លាំង ក្នុងពេលដែលនាងគ្រាន់តែអ្នករត់តុមួយរូប តែមានសមត្ថភាពសម្លេងមិនធម្មតា។ យ៉ាងណាមិញ នាងក៏ទទួលបានបទពិសោធន៍ផ្នែកចម្រៀងពីលោកយាយដែលជាអ្នកយីកេ និងពីឪពុកដែលស្រឡាញ់ចូលចិត្តផ្នែកសិល្បៈចម្រៀងនោះផងដែរ។

នាងកាន់តែលេចធ្លោរខ្លាំង ក្នុងសប្ដាហ៍ទី៤ ក្នុងវគ្គបកស្រាយបទចម្រៀងប្រពៃណី ដោយនាងបកស្រាយបទ«កោតចិត្តអ្វីម្ល៉េះ​» បានល្អមិនចាញ់តារាចម្រៀងអាជីពនោះទេ។ នាងទទួលបានសម្លេងសារ ដោយត្រូវបានគេប្រកាសថាជាប់តាំងពីនៅស្ថិតនៅបេក្ខជនបេក្ខនារីច្រើននាក់នៅលើវេទិកា។ យ៉ាងណាមិញ គេនៅមិនទាន់ដឹងថាសម្រាប់សប្ដាហ៍បន្តបន្ទាប់ តើនឹងទទួលបានការគាំទ្រកម្រិតណានោះទេ ក្នុងពេលដែលបេក្ខជន និងបេក្ខនារីដែលបានជាប់៨នាក់ចុងក្រោយ សុទ្ធតែមានសមត្ថភាពមិនធម្មតា ដែលមិនអាចឲ្យនាងប្រហែសបាន។

ចង់ដឹងថាសមត្ថភាពរបស់បេក្ខនារីរូបនេះ មានចំណុចពិសេសកម្រិតណា សូមរីករាយទស្សនា៖
https://www.youtube.com/watch?v=6hHZtk_sgGQ