កាលពីយប់ថ្ងៃទី១៦ មីនា ម្សិលមិញ បេក្ខនារីដែលត្រូវបានគេកត់សម្គាល់ថាមានទឹកដមសំឡេងមិនធម្មតា កញ្ញា គង់ កែវមរកត បានធ្លាក់ចេញពីកម្មវិធី Cambodian Idol ហើយ បើទោះជាពេលដែលនាងបកស្រាយបទជាថ្មីម្ដងទៀតដើម្បីអោយមានការសង្គ្រោះ ក៏នៅតែគ្មានការសង្គ្រោះពីគណកម្មការទាំង៣។ នាងបានប្រកាសដឹងគុណដល់អ្នកស្រី ឌី សាវ៉េត បន្ទាប់ពីនាងចាកចេញពីកម្មវិធី ក្នុងពេលដែលនាងបញ្ជាក់ថាបើកុំតែអ្នកស្រីឌី សាវ៉េត បានជួយរូបនាងមួយគ្រាក៏នាងមិនអាចបង្ហាញខ្លួនក្នុងកម្មវិធីប្រលងនោះបាន កាលពីសប្ដាហ៍ទី៦។

កញ្ញា គង់ កែវមរកត ដែលថ្លែងទាំងទឹកភ្នែកក្រោយពីត្រូវប្រកាសថាធ្លាក់ថា កញ្ញាសប្បាយចិត្តយ៉ាងណាស់ដែលកញ្ញាបានឈានដល់មកវគ្គ Live Show ក្នុងសប្ដាហ៍ទី៦ ដែលការបង្ហាញខ្លួននោះគឺកញ្ញាមិនធ្លាប់រំពឹងពីមុនទាល់តែសោះ ដោយសារតែកញ្ញាគ្រាន់តែជាអ្នករត់តុមួយរូបមុនពេលចូលប្រឡង។ កញ្ញានិយាយថាអ្វីដែលនាងរំភើបចិត្តបំផុតគឺកញ្ញា ត្រូវបានអ្នកស្រីឌី សាវ៉េត អនុញ្ញាតឲ្យខ្ចីសម្លៀកបំពាក់ឡើងឆាក ដោយនាងបញ្ជាក់ថាវិញ្ញាសារតម្រូវអោយនាង និងបេក្ខជនទាំងអស់តុបតែងខ្លួនក្នុងសម័យសង្គមរាស្រ្តនិយម បើគ្មានអ្នកគ្រូ ឌី សាវ៉េត ផ្ដល់សំលៀកបំពាក់អោយខ្ចីទេ គឺប្រាកដជាមិនអាចអោយនាងមានសំលៀកបំពាក់ឡើងឆាកនោះទេ ដោយសារតែនាងមិនមែនជាបេក្ខនារីមានលុយសម្រាប់ទិញដូរសម្លៀកបំពាក់ដើម្បីតម្រូវអោយត្រូវនឹងកម្មវិធី។

កញ្ញាបានបង្ហូរទឹកភ្នែកអរគុណដល់តារាជើងចាស់រូបនេះ បើទោះជានាងបានគ្រងឈុតសំលៀកបំពាក់របស់អ្នកស្រីឌី សាវ៉េត ហើយក៏ត្រូវបានធ្លាក់ពីកម្មវិធីទាំងសោកស្ដាយ។ នាងត្រូវគេអោយបកស្រាយបទចម្រៀងដែលហាក់មិនស៊ីនឹងសំឡេងនោះទេ ប៉ុន្តែនាងនៅតែធ្វើបានល្អ តែដោយសារតែនាងទទួលបានសារបោះឆ្នោតតាមទូរសព្ទតិចជាងគេទើបនាងមិនមានសំណាងបានតទៅសប្ដាហ៍ទី៧។

គង់ កែវមរកត ត្រូវបានអ្នកទស្សនាសោកស្ដាយយ៉ាងខ្លាំង ដែលនាងគឺបេក្ខនារីល្អមួយរូប ត្រូវបានធ្លាក់ចេញ ខណៈដែលកម្មវិធីនេះត្រូវបានគេកត់សម្គាល់ថានៅសល់តែប៉ុន្មានសប្ដាហ៍ទៀតប៉ុណ្ណោះ នឹងឈានដល់ការដណ្ដើមយកពានទៅហើយ។
នាងអះអាងថាមិនតូចចិត្តនឹងការធ្លាក់ចេញនោះទេ ហើយនាងក៏មានតែការជូនពរអោយបេក្ខជនបេក្ខនារី ដែលបានទៅកាន់វគ្គបន្តប្រឹងប្រែងអោយកាន់តែខ្លាំង ដើម្បីជោគជ័យនៅក្នុងអាជីពក្រោយការប្រឡងចប់។ យ៉ាងណាមិញ គង់ កែវមរកត ត្រូវគេមើលឃើញថា ហង្សមាសនឹងមិនព្រលែងទៅអោយហក់លោកទៅកាន់ផលិតកម្មផ្សេងនោះទេ ដោយសារតែនាងគឺជាបេក្ខនារីមានសមត្ថភាព ដោយមានទាំងរូបសម្រស់ផូរផង់ និងមានទឹកដមសំលេងច្រៀងបានគ្រប់ប្រភេទបទ ដែលហង្សមាសពិតជាជ្រើសមកលើកស្ទុយក្នុងពេលខាងមុខ៕

https://youtu.be/KJIazLCMs9Q