កាលពីព្រឹកថ្ងៃទី២ មិថុនា តារាសម្ដែងលោក យន សុភ័ក្រ បានដឹកនាំក្រុមការងារ និងតារាសិល្បៈមួយក្រុមក្នុងនាមជាប្រធានសមាគមស្នាមញញឹម និងក្នុងនាមជាសមាជិកគ្រួសារតារាកម្ពុជា។ យ៉ាងណាមិញ នេះមិនមែនជាលើកទី១ ដែលលោក និងក្រុមការងារបានចុះទៅចែកអំណោយដល់ក្មេងៗ និងលោកគ្រូអ្នកគ្រូ ដែលរស់នៅក្នុងសហគមន៍ក្រីក្រទាំំងនេះនោះទេ។

សកម្មភាពចែកសៀវភៅ ប៊ិច ស្បែកជើង ភេសជ្ជៈ សារ៉ុង និងថវិកាជូនដល់សិស្សសាលា និង ប្រជាពលរដ្ឋ រស់នៅសហគមន៍ភូមិគីរីអភិវឌ្ឍន៍ ឃុំឈានឡើង ស្រុកសាមគ្គីមានជ័យ ខេត្តកំពង់ឆ្នាំង នេះ ត្រូវបានធ្វើឡើងដោយសារតែកង្វះខាតនៅក្នុងសហគមន៍នេះ ត្រូវបានលោកនិងក្រុមការងារមើលឃើញ។ លោក យន សុភ័ក្រ ប្រធានសមាគមន៍ស្នាមញញឹម ដែលជាអ្នកដឹកនាំតារាសិល្បៈ និងក្រុមការងារចុះបោះតង់ និងចែកអំណោយដល់ក្មេងៗ លោកគ្រូអ្នកគ្រូ និងប្រជាពលរដ្ឋក្រ នៅទីនោះ បានថ្លែងបញ្ជាក់ថា សហគមន៍មួយនេះ លោក និងក្រុមការងារបានស្វះស្វែងរកជំនួយមកចែកអំណោយជូនជាច្រើនលើកមកហើយ ដើម្បីអោយក្មេងៗ និងពលរដ្ឋនៅក្នុងសហគមន៍ មានភាពកក់ក្ដៅ ពីការទទួលយកចិត្តទុកដាក់ផង និងដើម្បីអោយតារាសិល្បៈ និងមិត្តភក្តិរបស់លោក បានដឹងពីការលំបាក របស់ប្រជាពលរដ្ឋនៅក្នុងសហគមន៍នេះផង។ លោកថាថវិកា និងជំនួយដែលចុះចែកកន្លងមក គឺសុទ្ធសឹងតែបានសប្បុរសជន ដោយមួយចំណែកក៏បានពីការរ៉ៃអង្គាសពីតារាសិល្បៈ និងក្រុមការងាររបស់លោក។ ថវិកា សារ៉ុង សម្ភារៈសិក្សា និងស្បែកជើង ដែលយកមកចែកចាយនៅក្នុងថ្ងៃនោះ លោកថាមិនអាចបំពេញតម្រូវការរបស់ប្រជាពលរដ្ឋដែលមានកង្វះខាតបានទេ ប៉ុន្តែក៏អាចចែករំលែកក្ដីស្រឡាញ់ដល់សិស្ស និងប្រជាជននៅតំបន់ដាច់ស្រយាលនោះផងដែរ។

នៅក្នុងពិធីចែកអំណោយ ក្រៅពីក្រុមការងារសមាគមស្នាមញញឹម របស់លោក យន សុភ័ក្រ គេឃើញមានវត្តមាន មកពី«គ្រួសារតារាកម្ពុជា» ដូចជា កញ្ញា ភីយ៉ា តារាសម្ដែង លោកសន សុវណ្ណារ៉ា ពិធីករ លោក សេម អាជុន តារាចម្រៀង និងតារាក្មេងៗជាច្រើនផ្សេងទៀត៕