ក្នុងជំនួបដោយផ្ទាល់ក្នុងកម្មវិធីត្រៀមប្រកួត Star Award របស់ទូរទស្សន៍អប្សរាកាលពីពេលថ្មីៗ តារាចម្រៀងប្រចាំផលិតកម្ម BN និងជាតារាសម្ដែងលេចធ្លោរមួយរូបផង កញ្ញា វណ្ណា វត្តី បានអះអាងថា នាងសុខចិត្តពន្យារការគិតគូពីរឿងរ៉ាវ ស្នេហា មិនទាន់ចាប់យកនោះទេ ដើម្បីកុំឲ្យប៉ះពាល់ដល់ការងារសិល្ប: និងដើម្បីកុំឲ្យមានសម្ពាធពេលនាង ត្រូវចុះខេត្តនេះចុះខេត្តនោះ ក្នុងការប្រកួតប្រជែងនៅក្នុងកម្មវិធី Star Award ។ ក្នុងនោះនាងត្រូវគេកត់សម្គាល់ថា កាន់តែស្រស់ស្អាតប្លែក ស្របគ្នាដែលនាងប្រកាសជំហរថា បន្តប្រឡូកសិល្ប:ឲ្យខ្លាំងបន្ថែមទៀត មិនទាន់ចង់ដកដៃ។

កញ្ញា វណ្ណា វត្តី និយាយថា កញ្ញា សប្បាយចិត្តខ្លាំងណាស់ ដែលការងារសិល្ប:នាពេលចុងក្រោយ នៅតែបន្តផ្ដល់ឱកាសឲ្យខ្លួន បានសម្ដែង បានច្រៀង និងមានការងារជាហូរហែរ ដែលធ្វើឲ្យនាងនៅតែមានកម្លាំងចិត្តនៅក្នុងវិថីមួយនេះ។ នាងថារាល់ថ្ងៃខ្លួន មានបុរសៗតាមស្នេហ៍ច្រើនណាស់ ដោយមានទាំងបុរសទ្រព្យស្ដុកសុំនាងរៀបការ និងហ៊ានលើកស្ទួយ ឲ្យនាងសោយសុខដោយមិនខ្វល់ពីការងារសិល្ប:នោះផង តែមកពីនាងនៅស្រឡាញ់ការងារសិល្ប: ទើបនាងមិនទាន់សម្រេចចិត្ត។ នាងថាមិនទាន់ដល់ពេល ដែលនាងសម្រេចចិត្តបោះបង់សិល្ប:នៅឡើយទេ ទើបនាងសុខចិត្តមិនទាន់ទទួលយកលក្ខណ រៀបការជាមួយបុរសណាម្នាក់ ហើយប្រកាន់ជំហរបន្តការងារមួយនេះ ទាំងការសម្ដែង និងចម្រៀងឲ្យនៅតែខ្លាំង។

ក្រៅពីត្រៀមចេញបទចម្រៀងនៅក្នុងផលិតកម្ម BN នាងក៏បានត្រៀមខ្លួនរួចរាល់អស់ដែរ ក្នុងការប្រកួតប្រជែងក្នុងកម្មវិធី Star Award ដែលនឹងចាប់ផ្ដើមនៅដើមខែ១១ ដោយក្នុងកម្មវិធីនេះ នាងគឺជាបេក្ខនារីមួយរូបក្នុងចំណោម២៥រូប តំណាងឲ្យខេត្តក្រុងទាំង២៥ ហើយដើរតួជាអ្នកផ្សព្វផ្សាយវប្បធម៌ សិល្ប: និងតំបន់ទេសចរណ៍ តាមរយ:ការបង្ហាញសមត្ថភាពសិល្ប: យកបង្ហាញលើកញ្ចក់ទូរទស្សន៍។

យ៉ាងណាមិញ នាងថាខ្លួននឹងរៀបការហើយ អាចបន្ថយការងារសិល្ប: នៅពេលណាមួយ ដើម្បីបង្កើតជាក្រុមគ្រួសារឲ្យដូចនារីទាំងពួង ដោយគ្រាន់តែក្នុងពេលនេះ នាងថា នៅចង់ប្រឡូកសិល្ប:ឲ្យខ្លាំងសិន ទាន់នៅឱកាសហុចឲ្យ។ ជាមួយនឹងការត្រៀមខ្លួន បង្ហាញនូវស្នាដៃថ្មីនៅក្នុងសិល្ប:ទាំងចម្រៀង និងការសម្ដែង បូករួមទាំងការចូលរួមប្រកួតប្រជែង សមត្ថភាពសិល្ប: វណ្ណា វត្តី ក៏ត្រូវគេឃើញនៅតែហ៊ឺហារឡូយឆាយមិនអន់ដដែល ដោយក្នុងពេលបង្ហាញខ្លួន ថតឈុតកម្មវិធី Star Award នៅក្នុងថ្ងៃនោះគេ គឺនាងបង្ហាញខ្លួនជាមួយរថយន្តទំនើប និងមានសាច់ឈាមស្រស់ស្អាត ផូរផង់លើសពីពេលមុនទៅទៀត។

យ៉ាងណាមិញ នាងអះអាងថាហេតុផលដែលខ្លួនស្រស់ស្អាតជាងមុន គឺដោយសារតែនាងសប្បាយចិត្តនឹងការងារសិល្ប: ក៏ដូចជាការមុខជំនួញ ស្របគ្នាដែលនាង ក៏មិនទាន់មានសម្ពាធក្នុងរឿងស្នេហា ដែលធ្វើឲ្យនាងស្មុគស្មាញផ្លូវចិត្តប៉ុណ្ណោះ៕