Post News Media ព័ត៌មានសិល្បៈ និងកម្សាន្ត រំភើបជំនួស! ត...

រំភើបជំនួស! តារាជើងចាស់ ពៅ ថាវី បានរង្វាន់ចម្ការ១ហិចតារ

ក្នុងពិធីជប់លៀង និងបើកសម្ពោធគម្រោងលក់ចម្ការ មិនធ្លាប់មាននៅក្នុងប្រទេសកម្ពុជាកាលពីយប់ថ្ងៃទី២៧ កុម្ភ: តារាសម្ដែងជើងចាស់អ្នកស្រី ពៅ ថាវី ដែលអ្នកសិល្ប:និយមហៅឈ្មោះថា យាយពៅៗ បានឈ្នះរង្វាន់ធំប្រចាំកម្មវិធី មិនគួរឲ្យជឿ ដោយអ្នកស្រីឈ្នះបានចម្ការប័រមួយហិកតារ ស្ថិតនៅក្នុងខេត្តមណ្ឌលគីរី។ ចម្ការនោះ ត្រូវបានប្រកាសថា មានដំណាំប័រពេញចម្ការ ដោយខាងក្រុមហ៊ុន ក៏បានប្រកាសថា នឹងផ្ដល់ជូនការថែទាំពីសំណាក់ក្រុមបច្ចេកទេសពេញរយ:ពេល៤ឆ្នាំ ដែលមានន័យថា អ្នកស្រីមិនចំណាយសូម្បីមួយសេនរៀល ប៉ុន្តែបានដីស្របច្បាប់មួយហិកតារ ហើយបានទាំងផលដំណាំ ដោយមិនខ្វល់រឿងធ្វើចម្ការដោយខ្លួនឯង។

អ្នកស្រី ពៅ ថាវី បានថ្លែងក្នុងពេលទទួលរង្វាន់ថា អ្នកស្រីមិននឹកស្មានថា ខ្លួនមានសំណាងបានឈ្នះរង្វាន់ធំ ដោយឈ្នះចម្ការប័រមួយហិកតារ ដែលមានតម្លៃច្រើនម៉ឺនដុល្លារនោះទេ ខណ:ដែលអ្នកស្រីមកចូលរួមនៅក្នុងពិធីនោះ គឺគ្រាន់តែមកក្នុងនាមជាភ្ញៀវកិត្តិយស និងមិនបានទិញដូរចម្ការរបស់ក្រុមហ៊ុនទាល់តែសោះ។ អ្នកស្រីថា រំភើបចង់ហោះ ដោយសារតែអ្នកស្រីវ័យកាន់តែចាស់ហើយ សម្ដែងក៏ចាប់ផ្ដើមធ្លាក់ចុះទីផ្សារ ប៉ុន្តែសម្រាប់ផ្ទះសម្បែង គឺអ្នកស្រីនៅជួលផ្ទះគេប៉ុណ្ណោះ។ អ្នកស្រីថា មួយជីវិតមិនដែលចាប់បានរង្វាន់ អ្វីសូម្បីតែតូចតាចនោះទេ ទើបអ្នកស្រីយល់ថា ការឈ្នះរង្វាន់ដីមួយហិកតារ ដោយមានទាំងដំណាំប័រពេញចម្ការផង នឹងធ្វើឲ្យអ្នកស្រីមានកម្លាំងក្នុងជីវិត ជាពិសេសក្នុងពេល ដែលវ័យកាន់តែចាស់នាពេលនេះ។

លោក ហង្ស ព្រីន្សយ៉ា ម្ចាស់គម្រោង និងជាប្រធានគម្រោងឈ្មោះឋានព្រះឥន្ទ បានអះអាងថា រយ:ពេលច្រើនឆ្នាំមកហើយ ដែលក្រុមហ៊ុនរបស់លោកសំងំទិញបានចម្ការអ្នកស្រីរហូតដល់រាប់ពាន់ហិកតារ នៅខេត្តមណ្ឌលគីរី រតន:គីរី កំពត និង ពោធិសាត់ជាដើម ហើយបានវិនិយោគដាំជាដំណាំផ្សេង អាស្រ័យទៅតាមសណ្ឋានដី។ ប៉ុន្តែដោយសារក្រុមហ៊ុនយល់ថា បើក្រុមហ៊ុនបន្តវិនិយោគដំណាំធុរ៉េន ដូងក្រអូប និងប័រ តែម្នាក់ឯងរបៀបនេះ គឺនៅថ្ងៃណាមួយពិតជាមានហានិភ័យ អ៊ីចឹងហើយទើបក្រុមហ៊ុនសម្រេចពុះដីចម្ការ ដែលខ្លួនទិញបានរហូតដល់រាប់ពាន់ហិកតារនោះ ជាឡូតិ៍តូចៗវិញ ដោយក្នុងឡូតិ៍មានទំហ៊ំ១ហិកតារៗ ហើយលក់បង់រំលោះ ដើម្បីឲ្យមានការចូលរួមវិនិយោគ ដើម្បីបន្ថយបន្ទុករបស់ក្រុមហ៊ុន។

ប៉ុន្តែក្រុមហ៊ុននៅតែបន្តផ្ដល់ជូននូវពូជដំណាំ និងការថែទាំដោយបុគ្គលិកជំនាញរហូតដល់៤ឆ្នាំ ឬ៦ឆ្នាំ ដែលជារយ:ពេល ឲ្យបង់រំលោះនោះ ដើម្បីឲ្យចម្ការទាំងឡាយនៅតែមានដំណាំចេញផ្លែចេញផ្កា ងាយស្រួលឲ្យក្រុមហ៊ុនទទួលទិញផល។ លោកថា គម្រោងដីចម្ការពុះឡូតិ៍របស់ខ្លួន មានតម្លៃពី១៤០០០រហូតដល់ជាង៤ម៉ឺនក្នុងមួយហិកតារ ដោយនៅទឹកដីខេត្តមណ្ឌលគីរី គឺជាចម្ការប័រ នៅកំពតជាចម្ការធុរ៉េន និងនៅខេត្តពោធិ៍សាត់គឺជាចម្ការដូងក្រអូប។ ក្នុងនោះក្រុមហ៊ុនក៏នឹងពុះលកក់ចម្ការក្រូច និងចម្ការឬស្សី ជាហិកតារៗឲ្យបង់រំលោះបែបនេះ ក្នុងពេលខាងមុខផងដែរ។

លោកថាពិធីជប់លៀង ដែលបានធ្វើឡើងកាលពីថ្ងៃទី២៧ កុម្ភ: គឺជាពិធីសម្ពោធបើកលក់ចម្ការដូងក្រអូបនៅខេត្តពោធិ៍សាត់ ដោយក្នុងមួយហិកតារ គឺលក់បង់រំលោះរយ:ពេល៤ ទៅ៦ឆ្នាំ ហើយមិនគិតការប្រាក់ និងមិនត្រូវការប្រាក់តម្កល់។ តម្លៃដែលលក់ជូននេះ ក៏បូកបញ្ចូលថ្លៃ ផ្ដល់ពូជដំណាំ និងសេវាថែទាំដំណាំឲ្យពេញរយ:ពេល៤ឆ្នាំផងដែរ ដោយមានន័យថា ម្ចាស់រង់ចាំតែទទួលផល។ អ្វីដែលសំខាន់លោកអះអាងថា ដីចម្ការដែលបានពុះលក់មិនមែនជាដីសម្បទានរបស់រដ្ឋ ឬដីខុសច្បាប់នោះទេ ដោយលោកធានាថា ជាដីដែលមានប្លង់កម្មសិទ្ធិច្បាស់លាស់ ដោយសារតែដីទាំងនោះ គឺជាដីដែលលោកប្រមូលទិញ ពីពលរដ្ឋកាលពីច្រើនឆ្នាំមុន ហើយយកមកវិនិយោគជាចម្ការប៉ុណ្ណោះ។

ដោយឡែកសម្រាប់រង្វាន់ដីមួយហិកតារ ដែលតារាសម្ដែងជើងចាស់ អ្នកស្រី ពៅ ថាវី បានឈ្នះ លោកថា មិនមែនជាដីទទេនោះទេ គឺជាដីមានដំណាំប័រមួយចម្ការនៅខេត្តមណ្ឌលគីរី ហើយបើទោះជាលោកផ្ដល់ជូនប្លង់កម្មសិទ្ធិជូនអ្នកស្រី ដោយមិនឲ្យអ្នកស្រីចំណាយ សូម្បីមួយសេនក្ដី ក៏លោកនឹងមានក្រុមបច្ចេកទេសផ្ដល់ពូជ និងមើលថែដំណាំប័រជូនអ្នកស្រី ពេញរយ:ពេល៤ឆ្នាំ ដូចគ្នានឹងអតិថិជនបង់រំលោះដែរ។ លោកថាអ្នកទិញនេះ នឹងចំណេញ៤យ៉ាងគឺ ទីបានចម្ការដោយមិនខ្វល់ ពីការមើលថែ ទី២ដីងាយឡើងថ្លៃ ទី៣បានដីជាប្រភេទធ្វើទេសចរណ៍បាន និងទី៤គឺបានទ្រព្យតកូនតចៅ។ អ៊ីចឹងហើយទើបគ្រាន់តែលោកប្រកាសគម្រោងនេះភ្លាម កាលពីឆ្នាំ២០១៨ គឺលក់អស់រាប់ពាន់ហិកតារ ដោយគម្រោង ដែលទើបប្រកាសក្ដៅៗកាលពីយប់ថ្ងៃទី២៧ កុម្ភ: គឺជាគម្រោងទី៧ហើយ៕

Loading...