Post News Media ព័ត៌មានសិល្បៈ និងកម្សាន្ត ទឹម រដ្ឋា បាន...

ទឹម រដ្ឋា បានតំណែងទៀតហើយ នៅប៉ុស្តិ៍លេខ ៥

ទើបតែបញ្ចប់ការថតភាពយន្តមួយឲ្យប៉ុស្តិ៍លេខ៥សោះ តារាម៉ូដែល កញ្ញា ទឹម រដ្ឋា ត្រូវបានស្ថាប័នមួយនេះ ឲ្យគ្រងតំណែងជាតួអង្គសំខាន់ក្នុងរឿង “ភ្លើងគំនុំ” ដែលជាភាពយន្តថ្មីសន្លាង។ ភាពយន្តនេះ ត្រូវបានក្រុងពាលីប្រកាសចេញថត កាលពីព្រឹកថ្ងៃទី១០ មិថុនា ដោយនាងត្រូវគេឲ្យសម្ដែង ជាតួឆ្នាស់ឆ្នើម និងចិត្តអាក្រក់ទៀតហើយ។

កញ្ញា ទឹម រដ្ឋា និយាយថា នៅប៉ុស្តិ៍លេខ៥ នាងមានយីអ៑ុនយ៉ាងខ្លាំង ដោយត្រូវបានជ្រើស ឲ្យសម្ដែងក្នុងភាពយន្តថ្មីៗ មួយហើយមួយទៀត ដែលហាក់ដូចជាតួប្រចាំប៉ុស្តិ៍។ យ៉ាងណាមិញនាងថា ខ្លួនមិនមានកុងត្រា ជាមួយប៉ុស្តិ៍លេខ៥នោះទេ ដោយឱកាស បានសម្ដែងមួយរឿង ហើយមួយរឿងទៀតរបស់នាង គឺជាការពេញចិត្តរបស់ផលិតករថៃសុទ្ធសាធ។

ក្នុងរឿង”ភ្លើងគំនុំ” ថ្មីនេះ នាងថា ផលិតករតម្រូវឲ្យនាងសម្ដែងជាតួរងឆ្នាស់ឆ្នើម និងចិត្តអាក្រក់ លើសពីរឿងមុនៗទៅទៀត តែនាងមិនភ័យបារម្ភរឿងសម្ដែងក្នុងតួអង្គនេះទេ បើទោះកាលមុន មានមហាជនតាមគប់ដបទឹកសុទ្ធ ដូចតារាសម្ដែង អ្នកនាង ផាភួង ដោយសារតែនាងយល់ថា មហាជនពិតជាដឹងថា នាងគ្រាន់តែសម្ដែងប៉ុនណ្ណោះ។ កញ្ញា បានទាំងប្រកាសថា នឹងសម្ដែងកាចឆ្នាស់ ឲ្យអស់ពីសមត្ថភាព ដើម្បីឲ្យអ្នកទស្សនា យល់ថានាងសម្ដែងបានចិត្តអាក្រក់ពេញទំហឹងនោះផង។ ទឹម រដ្ឋា បន្តថា សប្បាយចិត្ត ដែលបានសម្ដែងក្នុងរឿងនេះ ដោយនាងយល់ថា ឱកាសទទួលបានរឿង នៅប៉ុស្តិ៍លេខ៥បន្តបន្ទាប់ ក៏អាចមកពីគោរពពេលវេលាបានល្អ និងទំនាក់ទំនងការងារល្ អជាមួយផលិតករ តាំងពីបានប្រលូកការងារនឹងគ្នានោះដែរ។

យោងតាមពិធីដែលបានប្រកាសឡើង ភាពយន្តភាគរឿង “ភ្លើងគំនុំ” នឹងដំណើរការចេញផលិត ចាប់ពីថ្ងៃបញ្ចប់ក្រុងពាលីតទៅ ដោយគ្រោងចំណាយពេលប្រមាណ៣ខែ។ ភាពយន្តនេះ នឹងគ្រោងដាក់បញ្ចាំងនៅប៉ុស្តិ៍លេខ៥ នៅក្នុងម៉ោងមាស នៅអំឡុងចុងឆ្នាំ ឬដើមឆ្នាំ២០២០៕