ផ្ទះ ព័ត៌មានសិល្បៈ និងកម្សាន្ត តារាជើងចាស់ ស...

តារាជើងចាស់ សរ កេសារ៉ា បង្ហើបបំណងប្រាថ្នាថ្ងៃខួបកំណើត

0

កាលពីថ្ងៃទី១៤ កក្កដា អ្នកស្រី សរ កេសារ៉ា ដែលត្រូវគេដឹងថា ជាតារាសម្ដែងជើងចាស់ និងជាម្ចាស់ផលិតកម្មកេសារ៉ាភាពយន្ត បានធ្វើខួបកំណើតយ៉ាងសប្បាយរីករាយ។ ខុសពីម្ចាស់ខួបកំណើត ភាគច្រើន ដែលតែងបួងសួងសុំឲ្យខ្លួនមានសុខភាពល្អ មានសម្រស់ស្រស់ស្អាត និងមានជោគជ័យក្នុងជីវិត អ្នកស្រី បែរជាបួងសួងផ្សងដើម្បីអ្នកដទៃទៅវិញ។

អ្នកស្រី កេសារ៉ា បញ្ជាក់ថា ខួបកំណើតឆ្នាំនេះ អ្នកស្រីមិនសូវផ្ដោតលើការជូនពរខ្លួនឯងនោះទេ ដោយអ្នកស្រីមានបំណងជូនពរឲ្យភ្ញៀវកិត្តិយស និងអ្នកសិល្ប:មានសុខភាពល្អ និងកាន់តែជោគជ័យ នៅក្នុងសិល្ប:។ អ្នកស្រីថា អ្នកស្រីចង់ឃើញតារាសិល្ប:ទាំងអស់កាន់តែជោគជ័យទ្វេដង និងកាន់តែមានការរីកចម្រើន កុំឲ្យចាញ់ប្រទេសជិតខាង។

អ្នកស្រីនឹងបន្តដើរតួជាអ្នកចូលរួមលើកស្ទួយសិល្ប: តាមរយ:ការផលិតភាពយន្តថ្មីៗ និងបណ្ដុះបណ្ដាលអ្នកជំនាន់ក្រោយ ឲ្យមានជំនាញសិល្ប:តាមលទ្ធភាព ខណ:ដែលអ្នកស្រី ក៏នឹងបង្កើនសមត្ថភាព ក្នុងការទាក់ទងផលិតករ និងអ្នករៀបចំកម្មវិធីនៅក្រៅប្រទេស ដើម្បីផ្ដល់ឱកាសឲ្យតារាខ្មែរ បានកាន់តែច្រើនផងដែរ ខណ:ដែលអ្នកស្រី ធ្លាប់បានស្វះស្វែងឲ្យផលិតករខ្មែរ និងតារាខ្មែរ បានចូលរួមក្នុងមហោស្រពអន្តរជាតិនានា និងបានសម្ដែង ជាមួយផលិតករបរទេសជាហូរហែរមកហើយ។ យ៉ាងណាមិញ អ្នកស្រីក៏សម្ដែងអារម្មណ៍ខកចិត្ត ចំពោះស្នាដៃផលិតកុនកន្លងមក ដែលទទួលបានការគាំទ្រតិចតួច។

អ្នកស្រី សរ កេសារ៉ា បន្តថា អ្នកស្រីធ្វើខួបកំណើតរាល់ឆ្នាំ គ្រាន់តែចង់ជួបជុំមិត្តភ័ក្ត្រ និងផលិតករតែប៉ុណ្ណោះ។ នៅក្នុងពិធីនោះ អ្នកស្រីដែលត្រូវគេស្គាល់ថា ជាតារាសម្ដែងជើងចាស់មួយរូប បានតែងឈុតជានារីខ្មែរ ដោយលម្អ ជាមួយនឹងផ្កាភ្ញីលើសក់ផង។ អ្នកស្រីថា ពិធីខួបកំណើតឆ្នាំនេះ អ្នកស្រីសប្បាយចិត្តបំផុត គឺបានជូនពរបងប្អូនអ្នកសិល្ប:គ្រប់រូប ដោយអ្នកស្រីបញ្ជាក់ថា សារជូនពររបស់អ្នកស្រី មិនមែនសម្រាប់តែតារាសិល្ប: និងផលិតករដែលចូលរួមប៉ុណ្ណោះទេ តែក៏ជូនពរចំពោះតារាសិល្ប:ទាំងអស់ តាមរយ:បណ្ដាញសារព័ត៍មានផងដែរ៕

មតិយោបល់