ហុងកុងៈ តារាសម្តែងជើងចាស់ហុងកុង លោក ចូវយានហ្វាត បានប្រកាសថា លោកនឹងបញ្ចប់ ក្នុងសកម្មភាពលើវិថីសិល្បៈក្នុងឆ្នាំនេះ ។
យោងតាម គេហទំព័រ jaynestars ចុះផ្សាយនៅពេលថ្មីៗនេះ បានឲ្យដឹងថា លោក ចូវយានហ្វាត នឹងមិនទទួលយកខ្សែភាពយន្តណាមួយដើម្បីសម្តែង បន្ថែមទៀតនោះទេ ដោយគ្រោងសម្រាក ដើម្បីទទួលសេចក្តីសប្បាយរីករាយ លក្ខណៈឯកជន។
ចូវយានហ្វាត បានវិលត្រឡប់មកកាន់ឧស្សាហកម្មកម្សាន្តហុងកុងវិញ នៅឆ្នាំ២០១៣ បន្ទាប់ពីចំណាយពេល ៣ទសវត្សរ៍ ជាមួយនឹងសកម្មភាពភាពយន្តនៅលើទឹកដីចិន និងហូលីវូត ។
នៅឆ្នាំ២០១៤ ចូវយានហ្វាត បានបង្ហាញវត្តមានក្នុងភាពយន្ត From Vegas to Macau ដែលជាខ្សែភាពយន្តស្តេចល្បែង ដឹកនាំសម្តែងដោយលោក Wong Jing ។
សម្រាប់ភាពយន្តចុងក្រោយរបស់ ចូវយានហ្វាត គឺ Cold War 2 បានបំបែកកំណត់ត្រាជារឿងដែលរកចំណូលបានច្រើនជាងគេនៅហុងកុង បន្ទាប់ពីចេញផ្សាយបាន ២សប្តាហ៍កន្លងទៅនេះ ។
មូលហេតុដែលធ្វើឲ្យតារាសម្តែងវ័យ ៦១ឆ្នាំ បោះបង់មិនព្រមទទួលយកការសម្តែងបន្ត ដោយសារតែ ក្នុងអំឡុងពេលថត ភាពយន្ត «សង្គ្រាមត្រជាក់វគ្គ២» នេះ ធ្វើឲ្យលោកតានតឹង ប៉ះពាល់ដល់សុខភាព ដោយយកពេលវេលាសម្រាក និងមិនចង់ដើរដោយឈើរច្រតក្នុងពេលខាងមុខ៕