ព័ត៌មានសិល្បៈ និងកម្សាន្ត

តារាសម្ដែង ព្រីយ៉ា ប្រកាសជំហរក្រោយឡើងកូដ

ជាមួយនឹងការឈានឡើងនៃទីផ្សារចម្រៀង តារាសម្ដែងទម្រង់មុខកូនកាត់ កញ្ញា ព្រីយ៉ា បានអះអាងថា នាងមិនចោលឥរិយាបថចាស់ ឬ មានភាពក្រអើតក្រទម ដាច់ខាត បើទោះជានាងអាចនឹងក្លាយជាតារាល្បីឈ្មោះមួយរូបនាពេលអនាគត។ នាងអះអាងថា ខ្លួនមានម្តាយជាខ្មែរកម្ពុជាក្រោម និងមានឪពុកជាខ្មែរកាត់ចិន ប៉ុន្តែរូបសម្រស់របស់តារាស្រីរូបនេះ ត្រូវគេឆ្ងល់កាន់តែច្រើន ដោយសារតែមានត្រេមុខ ដូចតារាកូនកាត់។

កញ្ញា ព្រីយ៉ា បានអះអាងថា ក្នុងនាមជាតារាសិល្ប:មួយរូប ដែលមានការងារថត សកម្មនៅភ្នំពេញ ប៉ុន្តែសម្រាប់ឪពុកម្ដាយរបស់នាង រស់នៅឯខេត្តកំពតឯណោះទេ ខណ:ដែលម៉ាក់ប៉ារបស់នាង ក៏គ្រាន់តែជាអ្នកចម្ការ មិនមែនជាអ្នកមានស្ដុកស្ដម្ភ។ នាងមានបងប្អូន៧នាក់ ដោយមានបងប្អូនប្រុសតែម្នាក់គត់ តែមិនមែនជាអ្នកសិល្ប: ដូចនាងឡើយ។ នាងជាកូនទី៣ ដោយបានចូលប្រឡូកការងារសិល្ប: មិនតិចជាង២ឆ្នាំនោះទេ ដោយគ្រាន់តែមិនទាន់មានឱកាសឲ្យគេស្គាល់ច្រើន។

កេរ្តិ៍របស់នាងមានការឈានឡើង ក្រោយពីបានស្ម័គ្រចិត្តចូលប្រកួតឈុតបុរាណ របស់គ្រួសារតារាកម្ពុជា និងបានចូលរួមសកម្មភាពជាច្រើនជាមួយក្រុមនេះ។ នាងបន្តថា រយ:ពេលជាង២ឆ្នាំដែលនាងប្រឡូកសិល្ប: នាងទើបតែបានឡើងកូដ នាពេលចុងក្រោយ ដោយបានទទួលថត៣រឿងព្រមគ្នាតែម្ដង ហើយសុទ្ធតែជាភាពយន្ត ដែលនាងសម្ដែងជាតួធំ។

នាងត្រូវបានគេស្គាល់កាន់តែច្រើនតាមរយ: ការសម្ដែងក្នុងបទ”កំដរខ្ញុំបន្តិចបានទេ របស់កញ្ញា សួស វីសា តារាហង្សមាស បទ”ផឹកកាហ្វេ” របស់តារាចម្រៀង នី រតនា បទ “កុំបង្ខំឲ្យបងចេញពីអូន” លោក រ៉ូបឺត និងបទ “បើបងក្បត់អូននរណាទទួលខុសត្រូវ” របស់កញ្ញា លីដា តារាសាន់ដេ។ នៅលើកញ្ចក់ទូរទស្សន៍ My tv ភាពយន្តរឿង “អំណាចទឹកកប្រាក់” ដែលបញ្ចាំងរាល់ថ្ងៃ ក៏ជួយឲ្យនាងកាន់តែមានគេស្គាល់ផងដែរ។

នាងត្រូវគេយល់ស្របគ្នាថា កាន់តែល្បីកាន់តែស្រស់ស្អាត ខណ:ដែល ភាពស្រស់ស្អាតរបស់នាង ទើបតែត្រូវគេឃើញ កើតឡើងបន្ទាប់ពីទីផ្សារ សិល្ប:មានការឈានឡើង នាពេលចុងក្រោយ ជាពិសេសចាប់តាំងពីនាង ចេះតុបតែងខ្លួនឲ្យមើលទៅហាយសូរ។

តារាសម្ដែង ព្រីយ៉ា បញ្ជាក់ថា នាងនឹងប្រឹងពុះពារនៅក្នុងសិល្ប:ឲ្យអស់លទ្ធភាព ដើម្បីឲ្យកេរ្តិ៍របស់នាងកាន់តែការទទួលស្គាល់។ នាងអាចសម្ដែងបានទាំងតួស៊ិចស៊ី កាចឆ្នាស់ និងតួទឹកភ្នែក ខណ:ដែលនាងរីករាយសម្ដែងគ្រប់ទម្រង់សិល្ប: ឲ្យតែខាងផលិតករតម្រូវ។ យ៉ាងណាមិញ នាងថា ប្រសិនបើជាឈុតស៊ិចស៊ីខ្លាំង អមដោយឈុតស្នេហារោលរាលនោះ នាងមិនថាទេ ព្រោះធ្វើឲ្យកេរ្តិ៍ឈ្មោះខំសាង រលាយបាត់ ដោយសារការរិះគន់៕

មតិយោបល់