ទើបតែត្រលប់ពីការសម្ដែង នៅក្នុងប្រទេសអូស្រ្តាលី មិនទាន់បាត់ធំក្លិនយន្តហោះផង តារាចម្រៀងប្រចាំផលិតកម្ម M លោកសន វិជ្ជបុត្រ បានប្រកាសយ៉ាងក្ដែងៗថា លោកនឹងយកប្រាក់ចំណូល ដែលខ្លួនទទួលបាន យកទៅធ្វើគម្រោងសប្បុរសធម៌ ដែលធ្លាប់ប្រកាសប្រាប់ទៀតហើយ ដើម្បីចែករំលែកក្ដីលំបាក និងបានរួមចំណែក ជួយដល់សហគម។ ក្រៅពីបានចេញមុខ ជួយថវិកាដល់តារាជើងចាស់ រួមមាននាយគ្រៀវ និងក្មេងកំព្រា ជាដើម លោកក៏នឹងចុះទៅសង់របង ជួយដល់សាលាក្រីក្រមួយ នៅខេត្តក្រចេះ ក្នុងពេលដ៏ខ្លីនេះ ផងដែរ។

លោក សន វិជ្ជបុត្រ និយាយថា ការសម្ដែង រយៈពេលជាងមួយខែរបស់លោក នៅក្នុងប្រទេសអូស្រ្តាលី បានជួយឲ្យលោក ទទួលបាននូវបទពិសោធន៍ និងជោគជ័យ យ៉ាងខ្លាំង ដោយសារតែមានបងប្អូនខ្មែរ យ៉ាងច្រើនកុះករ ស្រឡាញ់ពេញចិត្ត។ ក្រៅពីមកទស្សនា ការប្រគំតន្ត្រីលក់សំបុត្ររបស់លោក យ៉ាងណែនណាន់តាន់តាប់ ក្នុងគម្រោងមួយលើកៗ លោក ក៏ត្រូវពលរដ្ឋខ្មែរ នៅក្នុងប្រទេសអូស្រ្តាលី ស្វាគមន៍ឲ្យចូលរួមក្នុងកម្មវិធីជប់លៀង ជាលក្ខណៈឯកជន ធ្វើឲ្យលោកទទួលបាននូវកិត្តិយស និងប្រជាប្រិយភាព ក្នុងរយៈពេលចេញសម្ដែង ផងដែរ។

យ៉ាងណាមិញ លោកថា ការសម្ដែង នៅក្នុងប្រទេសអូស្រ្តាលីរបស់លោក មិនបានទទួលប្រាក់ខែនោះទេ ដោយសារតែលោកទៅច្រៀង ក្នុងគម្រោងទៅរ៉ៃអង្គាសថវិកាលក់សំបុត្រ ជួយដល់ក្រុមក្មេងកំព្រា និងនិស្សិតក្រក្រី នៅកម្ពុជា ប៉ុណ្ណោះ។ អ្វីដែលគួរឲ្យកោតសរសើរនោះ គឺលោកទៅច្រៀងក្រៅប្រទេស មិនបានប្រាក់ខែ ហើយថែមទាំងប្រកាសយកប្រាក់ធីប ដែលលោកទទួលបាន យកមកធ្វើសកម្មភាពសប្បុរសធម៌ ដូចអ្នកមានប្រាក់ហូរហៀរ សល់លុយមិនខ្វះ នោះទៅទៀត។ ជាក់ស្ដែង គ្រាន់តែចុះពីលើយន្តភ្លាម លោក ក៏បានចេញមុខចូលរួម ក្នុងពិធីបុណ្យ ៧ថ្ងៃរបស់លោក រាជ បូរី និងអ្នកស្រី សារ៉ាវឌី សូម្បីតែពេលនៅរស់ រូបលោក និងតារាទាំងពីរ មិនមានទំនាក់ទំនងគ្នាក្តី។ នៅព្រឹកថ្ងៃទី២២ មុននេះ លោក ក៏បានចុះទៅផ្ដល់ជំនួយ ជួយដល់តារាកំប្លែងធ្លាក់ខ្លួនឈឺធ្ងន់ និងខ្វះខាត គឺនាយគ្រៀវ អមដោយទឹកប្រាក់ ច្រើនគួរសម។

ក្រៅពីនោះ លោកក៏បានប្រកាសថា នឹងចុះទៅជួយសង់របង បង្គោលបន្លាលួស ជុំវិញលាសាក្រីក្រមួយ ស្ថិតនៅក្នុងខេត្តក្រចេះ ដែលមានទឹកប្រាក់ មិនតិចជាង ២ពាន់ដុល្លារ នោះផងដែរ។ លោក សន វិជ្ជបុត្រ និយាយថា « ខ្ញុំបានតាំងចិត្ត តាំងពីខ្ញុំមុនចេញទៅច្រៀង នៅអូស្រ្តាលី ថា ឲ្យតែខ្ញុំរកបានប្រាក់ធីប គឺខ្ញុំនឹងយកមកធ្វើរបងឲ្យសាលាហ្នឹង ឲ្យបានរួចរាល់ ព្រោះកន្លងមក ខ្ញុំបានជួយសង់អាគារសិក្សា ឲ្យសិស្ស និងជួយគម្រោងមួយចំនួន នៅក្នុងសាសាហ្នឹងច្រើនហើយ ប៉ុន្តែនៅសល់របងព័ទ្ធជុំវិញមួយទៀត ទើបដាច់ខាត ខ្ញុំត្រូវតែជួយគាត់ ឲ្យបានដាំបង្គោល ដាក់បន្លាលួស ដើម្បីកុំឲ្យចេះតែមានសត្វគោ សត្វអី មករំខានដល់ការសិក្សារបស់សិស្ស ដូចដែលខាងសាលា បានប្រទះ! »។

លោកបញ្ជាក់ ជាចុងក្រោយថា គម្រោងដាំបង្គោល ធ្វើរបងព័ទ្ធសាលានេះ គ្រោងចំណាយប្រហែល ២៤០០ដុល្លារ ដោយបូករួមទាំងថ្លៃកម្មករ និងការធ្វើការដំណើរ គឺប្រហែលជា ៣ពាន់ដុល្លារ។ លោកថា ក្នុងចំណោមការចំណាយ ដ៏ច្រើនសន្ធឹកនោះ ក៏មានបងប្អូនខ្មែរ នៅក្រៅប្រទេស និងមិត្តភ័ក្រ្ត ដែលរាប់អានលោក បានជួយជាថវិការ និងរួមចំណែក ផងដែរ៕