មួយរយៈក្រោយមកនេះ ក្រោយភ្លៀងពិតជាមេឃស្រឡះមែន សម្រាប់ឧស្សាហកម្មតន្ត្រីក្នុងព្រះរាជាណាចក្រកម្ពុជា ដោយផលិតកម្មធំៗមួយចំនួន បានធ្វើការអះអាងបញ្ឈប់ការកូពី ទាំងស្រុង ក្នុងនោះមានផលិតកម្ម ហង្សមាស និងផលិតកម្មថោន ។
សម្រាប់ផលិតកម្មហង្សមាស ជាមួយនឹងវ៉ុលចុងក្រោយ របស់ខ្លួន CD Vol.493 ដែលជាបទផលិតដោយស្នាដៃកូនខ្មែរពិតៗ និងកំពុងចរាចរណ៍លើទីផ្សារ ជាមួយនឹងបទ “ស្រាអាល័យ” បានអង្រួនអារម្មណ៍ប្រិយមិត្តអ្នកស្តាប់ ឱ្យលន្លង់លន្លោចហាក់ដូចជួបរឿងពិត ខណៈពេលអង្គុយញ៉ាំស្រាជាមួយសង្សា ហើយវាជាវេលាចុងក្រោយ សម្រាប់ត្រៀមចិត្តបែកគ្នា ដោយមិនមានកាលបរិច្ឆេទកំណត់ថា នឹងជួបគ្នាវិញពេលណាឱ្យប្រាកដ។
ដោយឡែកសម្រាប់ ផលិតកម្មថោន វិញ បើទោះបីជាបទថ្មីស្នាដៃកូនខ្មែររបស់ខ្លួន ដែលចេញកន្លងមកតិចតួច ក្នុងនោះមានបទ “ស្តាប់ Ring Ring Tune បងអូនស្រក់ទឹកភ្នែក” ដែលច្រៀងដោយកញ្ញា មាស សុខសោភា ក៏ទទួលបានការចាប់អារម្មណ៍មិនតិចនោះទេ។ ជាមួយនឹងនិន្នាការផលិបទថ្មីសន្លាងដែលជាស្នាដៃកូនខ្មែរ ផលិតកម្ម ថោន កំពុងបង្ហាញមហិច្ចតារបស់ខ្លួន ដោយត្រៀមខ្លួនជាស្រេចនឹងបង្ហាញអាលប៊ុមថ្មី Original ជូនដល់ប្រិយមិត្តគោលដៅរបស់ខ្លួន ក្នុងពេលឆាប់ៗនេះ។
ដោយកាន់តែជាក់ជាងនេះទៅទៀត លោក យឹម តាស្រង់ ដែលជាកវីនិពន្ធឆ្នើម ក្នុងផលិតកម្ម ថោន បានធ្វើការអះអាង ដោយ Comments នៅលើ ទំព័រ បណ្តាញទំនាក់ទំនងហ្វេសប៊ុក ថា ” បន្តិចទៀតបទ Original Song របស់Town នៅក្នុង youtube ក្រៅពីក្រុមហ៊ុន អ្នកផ្សេង Upload លែងបានហើយ ព្រោះយើងកំពុងតែរៀបចំដូចថៃដែរ”។ ការ Comments បែបនេះដោយសារតែលោក បាន Wall Post លើគណនីរបស់ខ្លួន ថា “បទថៃដែលល្បីមួយបទៗគេចូល View មើលសុទ្ធតែ ២០លានដង ហើយផលិតកម្មណាហ៊ានយកបទទាំងនេះមកធ្វើបទខ្មែរដឹងតែគេបាញ់ទក់សាច់ពេញ Facebook ហើយហាហាហា….” ។ជាមួយនឹងគ្នានេះដែរ មិត្តភក្តិ និងអ្នកគាំទ្ររបស់លោកអ្នកខ្លះក៏គាំទ្រ និងអ្នកខ្លះទៀត បានចំអកឡក់ឡើយ ដោយរំឭកពីអតីតកាលចាស់ មកនិយាយទៅវិញ ។
មជ្ឈដ្ឋានអ្នកស្នេហាវិស័យសិល្បៈ បាននាំគ្នាខ្សឹបខ្សៀវពីមួយទៅមួយថា ការផលិតបទថ្មីនេះ ដែលជាស្នាដៃកូនខ្មែរ មិនចំលងពីគេ យើងពិតជាមានមោនៈភាពខ្លាំងណាស់ ដោយផលិតកម្មធំទាំងពីរ អាចមើលឃើញចំណុចនេះ និងកំពុងធ្វើការប្រកួតប្រជែងគ្នាយ៉ាងស្រាក់សស្រាំ ដើម្បីសិល្បៈខ្លួន ឲ្យមានពន្លឺឡើងវិញ ពោលគឺប្រែក្លាយបទចម្រៀងខ្មែរឲ្យមានកេរ្តិ៍ឈ្មោះ ឡើងវិញ កុំឲ្យដូចទៅនឹងពាក្យពោលតៗគ្នាថា “ស្នាដៃរបស់ខ្លួនស្លាប់មុនម្ចាស់” ។ចំណុចនេះដែរ មជ្ឈដ្ឋានអ្នកស្នេហាវិស័យសិល្បៈ ក៏បញ្ចេញមតិបន្ថែមទៀតថា “ស្នាដៃកូនខ្មែរកើតឡើងហើយ តែបើសិនជាខាងក្រសួងដែលពាក់ព័ន្ធមិនអើពើ រឿងថតចំលង និងកូពីប្រាកដជាធ្វើឲ្យការផលិតនេះអសារបង់ជាក់ជាមិនខាននោះទេ” ៕
មតិយោបល់