(កូរ៉េ)៖ ថ្មីៗនេះសារព័ត៌មានក្នុងស្រុករបស់កូរ៉េជាច្រើន បានចុះផ្សាយជាបន្តបន្ទាប់ ក្រោយពីមានពាក្យចចាមអារ៉ាមអំពីដំណឹងលែងលះរបស់តារាសម្ដែងស្រីជួរមុខកូរ៉េ Jun Ji Hyun ជាមួយស្វាមីជាសេដ្ឋីជំនួញ ដែលត្រូវបានគេដាត់ទុកដា កំពុងល្បីយ៉ាងសុះសាយក្នុងពិភពសិល្ប:កូរ៉េ។

តាមរយ:កម្មវិធី «Garo Sero Institute» ដែលជាវេទិកាព័ត៌មានកម្សាន្តដ៏ល្បីនៅកូរ៉េខាងត្បូង បានរាយការណ៍ថាតារាសម្តែងវ័យ ៣៩ ឆ្នាំ Jun Ji Hyun (ចុន ជីយ៉ុន) និងស្វាមី Choi Joon Hyuk (ឆយ ជូនយុក) មិនបាននៅជាមួយគ្នាទេ ចាប់តាំងពីខែធ្នូឆ្នាំ ២០២០ ម្ល៉េះ។

បើទោះបីជា ទំនាក់ទំនងរបស់ពួកគេបានសាបរលាបទៅហើយក៏ពិតមែនតែ តួឯកស្រីដែលល្បីខ្លាំងតាមរយ:រឿងភាគ “សង្សារខ្ញុំជាមនុស្សភពផ្កាយ” នឹងមិនស៊ីញ៉េលើលិខិតលែងលះនៅពេលនេះទេ មូលហេតុមួយ គឺប្រហែលជាដោយសារកូនៗទាំងពីរ ២ នៅតូចៗ ហើយមូលហេតុធំមួយទៀត គឺវានឹងអាចធ្វើឱ្យខូចខាតយ៉ាងធ្ងន់ធ្ងរដល់យុទ្ធនាការផ្សព្វផ្សាយពាណិជ្ជកម្មជាច្រើន ដែលនាងបានចុះកិច្ចសន្យារួច ជាពិសេសនៅឆ្នាំនេះនាងមានភាពយន្តភាគដល់ទៅ ២ រឿងត្រូវចាក់ផ្សាយក្នុងឆ្នាំនេះគឺរឿង “ Kingdom of Ashin of North” និង“ Jirisan” ។

ប្រភពដដែលអះអាងថា មូលហេតុនៃការលែងលះរបស់ប្ដីប្រពន្ធដែលបានរៀបការកាលពីឆ្នាំ២០១២ គឺដោយសារភាគីស្វាមីគឺលោក Choi Joon Hyuk ពេលនេះកំពុងមានស្រីថ្មី។

ទោះយ៉ាងណា មកដល់ព្រឹកថ្ងៃទី៣ ខែមិថុនា នេះទីភ្នាក់ងារតំណាង Jun Ji Hyun បានបញ្ចេញសេចក្ដីថ្លែងការណ៍បដិសេធថាព័ត៌មានដែលត្រូវបានផ្សាយក្នុងកម្មវិធីខាងលើមិនមែនជាការពិតនោះទេ ហើយពួកគេនឹងធ្វើការស៊ើបអង្កេតបន្តទៀតចំពោះរឿងនេះ ៕

ប្រភព៖ Koreaboo