(ភ្នំពេញ)៖ កំពូលតារាកំប្លែងដ៏ល្បីលំដាប់ប្រទេសគឺ នាយកុយ ឬឈ្មោះពិតហៅថា ជួងជី តែងតែធ្វើឲ្យមហាជននិងអ្នកនិយមគាំទ្រ ព្រមទាំងអ្នកដែលទស្សនារឿងកំប្លែងតែងតែផ្ទុះសំណើច រំសាយអស់ទុក្ខកង្វល់នៅពេលដែលបានមើលរឿងការសម្តែងរបស់លោកជាក់ជាមិនខាន។ ត្បិតមិនសូវលេចវត្តមានក្នុងកម្មវិធីកំប្លែងដូចកាលពីប៉ុន្មានឆ្នាំមុនក្តី តែជីវិតឯកជនរបស់លោកនៅតែមានទស្សនិកជនិយមតាមដាន។ ជាពិសេស ថ្មីៗនេះ កូនស្រីជាទីស្រឡាញ់របស់លោក ហាក់មានអ្នកចាប់អារម្មណ៍យ៉ាងខ្លាំង។

តារាកំប្លែងនាយកុយបានធ្វើឲ្យមហាជនមានការភ្ញាក់ផ្អើលសាជាថ្មីម្តងទៀត ក្រោយបានបង្ហាញមុខកូនស្រីដ៏ស្រស់ស្អាត កំពុងមានអាជីវកម្មនៅក្នុងដៃជាម្ចាស់ហាងសម្លៀកបំពាក់នៅម្តុំផ្សារទួលទំពូង រួមទាំងមានរូបសម្រស់ដ៏ស្រស់ស្អាតមិនចាញ់តារាទៀតនោះ ដែលជាហេតុធ្វើឲ្យអ្នកគាំទ្រនៅលើបណ្តាញសង្គមលាន់មាត់សរសើរគ្រប់ៗគ្នាតែម្តង ស្របពេលដែលតារាកំប្លែងជើងចាស់រូបនេះ រួមទាំងកូនស្រីបណ្តូរចិត្តចាប់សហការគ្នាឡាយលក់ផលិតផលតាមអនឡាញ។

សូមរំលឹកផងដែរថា គិតមកត្រឹមឆ្នាំនេះ លោកជួងជី ហៅនាយកុយ លោកមានអាយុ៦៤ឆ្នាំហើយ ស្របពេលដែលលោកប្រឡូកក្នុងវិស័យសិល្ប:អស់រយ:ពេលជាង៤០ឆ្នាំទៅហើយ៕