(ភ្នំពេញ)៖ ជាដំណឹងដ៏សោកស្តាយមួយ ខណៈតារាចម្រៀងមួយរូបរបស់កម្ពុជា គឺលោក សែម សង្វាត បានទទួលមរណភាពកាលពីយប់មិញនេះ ដែលធ្វើឲ្យអ្នករួមអាជីព និងមហាជនធ្លាប់គាំទ្រនិយមស្តាប់ចម្រៀងរបស់លោក មានការអាណិតអាសូរ សោកស្តាយជាពន់ពេក។ ការទទួលមរណភាពរបស់លោក សែម សង្វាត គឺបន្ទាប់ពីលោកធ្លាក់ខ្លួនឈឺធ្ងន់ ដោយសារជំងឺប្រចាំកាយមួយចំនួន។

ផ្អែកទៅតាមផេក សិក្បករកម្ពុជា បានបង្ហោះសារជូនដំណឹងយ៉ាងដូច្នេះថា «RIP តារាចំរៀង លោក សែម សង្វាត បានទទួលមរណភាពហើយ! ដោយកូនប្រុសរបស់លោកបាន និយាយថា សូមជួនជាដំណឹងដល់ពុកម៉ែអ៊ុពូមុីងទាំងអស់គ្នាឲ្យបានជ្រាប់ថា នៅយប់ថ្ងៃទី៣០ រំលង់ចូលថ្ងៃទី០១ លោកឪពុកខ្ញុំបាទឈ្មោះ សែមសង្វាត (បានទទួលមរណៈភាព) នៅវេលាម៉ោង១២:១០នាទី ដោយជំងឺប្រចាំកាយ »។

បើតាមលោក សង្វាត រតនៈ ដែលជាកូនប្រុសរបស់តារាចម្រៀង សែម សង្វាត បា្យដឹងថា ឪពុករបស់លោក មានជំងឺថ្លើម (ទាចទឹក), ជំងឺដំបៅក្រពះ និងរលាកពោះវៀន ជាពិសេសជំងឺថ្លើម គឺបានឈឺអស់រយៈពេលជាច្រើនឆ្នាំមកហើយ។

សូមបញ្ជាក់ថា តារាចម្រៀង សែម សង្វាត ម្ចាស់បទ «កម្មករឆ្លងដែន» បានបាត់មុខពីវិស័យសិល្បៈ អស់រយៈពេលជាច្រើនឆ្នាំមកហើយ។ យ៉ាងណាមិញ ចំពោះដំណឹងមរណភាពរបស់លោកនៅពេលនេះ ពិតជាធ្វើឲ្យមហាជនមានការតក់ស្លុតជាខ្លាំង ជាពិសេស គឺមានការអាណិតអាសូរចំពោះរូបលោកផងដែរ៕