(ភ្នំពេញ)៖ អតីតតារាចម្រៀងស្រីក្នុងផលិតកម្ម Pleng Records និងជាប្អូនស្រីរបស់អ្នកនិពន្ធទំនុកចម្រៀងល្បីឈ្មោះលោក សុខ ជំនោរ កញ្ញា សុខ ចិន្ដា ឬមហាជនស្គាល់ថា វ៉ាន់ នីឡា កំពុងត្រឡប់រកវិស័យចម្រៀងវិញម្តងទៀត តាមការទទូចសុំរបស់អ្នកគាំទ្រដែលប្រើប្រាស់បណ្ដាញសង្គម Facebook និង Instagram ដែលសុំឱ្យកញ្ញាវិលមកកាន់វិស័យសិល្បៈចម្រៀងវិញ។

តារាចម្រៀងរូបនេះបានបាត់មុខពីវិស័យចម្រៀងអំឡុងឆ្នាំ២០១៤ ក្រោយកើតមានរឿងអាស្រូវមួយចំនួន ដែលនាំឱ្យប៉ះទង្គិចដល់ផ្លូវចិត្តកញ្ញាយ៉ាងធ្ងន់ធ្ងរ។ ពេលនោះ ជាអំឡុងឆ្នាំពេលដែល កញ្ញាកំពុងផ្ទុះប្រជាប្រិយភាពខ្លាំង តាមរយៈបទចម្រៀងស្នេហាបែបយុវវ័យជាច្រើនបទ។ ចម្រៀងមនោសញ្ចេតនារបស់ វ៉ាន់ នីឡា ដែលបានអង្រួនទម្លុះចិត្តយុវវ័យ និងត្រូវបានគេឯងចាក់តាមហាង Milk Tea ស្ទើររាល់ថ្ងៃ មានដូចជា៖ «មនុស្សបងធុញវិលវិញបានទេ? » «គេសុំជួបសង្សារចាស់គេ» «បេះដូងអូនទុកនៅបង» «បន្តស្រលាញ់ឬចាប់ផ្តើមស្អប់» «៩៩ភាគរយ» «អ្នកចាស់មានអ្នកថ្មី» «ពេលគេអស់ចិត្ត» «ស្នេហ៍ជិតផ្ទះ» និងបទផ្សេងៗជាច្រើនទៀតផងដែរ។

ក្រឡេកមកមើលបណ្តាញសង្គមហ្វេសប៊ុកឯណេះវិញ ប៉ុន្មានថ្ងៃមុននេះ ទំព័រហ្វេសប៊ុកផ្លូវការរបស់ ម្ចាស់បទ «មនុស្សបងធុញវិលវិញបានទេ?» បានបង្ហោះឱ្យឃើញសកម្មភាពក្រៅឆាករបស់ MV ថ្មី របស់នាង ថែមទាំងបានទម្លាក់វីដេអូចម្រៀងខ្លីមួយឱ្យអ្នកគាំទ្របានស្តាប់កម្សាន្តជាមុនទៀតផង ដែលនេះសរបញ្ជាក់យ៉ាងច្បាស់ថា កញ្ញា វ៉ាន់ នីឡា កំពុងត្រៀមបញ្ចេញស្នាដៃចម្រៀងថ្មីឡើងម្តងទៀត ក្រោយទុកឱ្យអ្នកគាំទ្រនឹករលឹកសំនៀងរបស់នាងអស់រយៈពេលជាច្រើនឆ្នាំ។កាន់តែគួរឱ្យចាប់អារម្មណ៍ វិលត្រឡប់មកវិញលើកនេះ វ៉ាន់ នីឡា មិនមានអ្វីប្រែប្រួលឡើយ ផ្ទុយទៅវិញនាងកាន់តែស្រស់ស្អាត និងគួរឱ្យស្រលាញ់ជាងមុនទៅទៀត។