ភ្នំពេញ: ក្នុងចំណោមវិធានការដែលបានលើកឡើងចំពោះអ្នកសិល្ប: ដោយក្រសួងវប្បធម៌កាលពីថ្ងៃទី២៧ ខែកញ្ញា លោកសុះ ម៉ាច បានចាប់អារម្មណ៍ពីភាពអសីលធម៌របស់អ្នកសិល្ប: ដែលចូលចិត្តប្រើប្រាស់ប្រព័ន្ធហ្វេសប៊ុកជេរគ្នា និងឈ្លោះគ្នាជាសាធារណ:បណ្ដាលឲ្យមហាជនវាយតម្លៃកម្រិតចេះដឹងរបស់អ្នកសិល្ប:ផ្សេងទៀត ថាជារឿងធ្ងន់ធ្ងរជាងគេ។ លោកទទូចឲ្យក្រសួងវប្បធម៌តម្រែតម្រង់ និងដាក់ពិន័យចំពោះបុគ្គលប្រភេទនេះឲ្យបានជាមុន ដោយសារតែបញ្ហាដែលលោកលើកឡើងលោកថាគឺជាអ្វីដែលបង្កឲ្យមានការប៉ះពាល់ដល់តម្លៃអ្នកសិល្ប:ទូទៅ។
លោកសុះ ម៉ាច ប្រធានសមាគមសិល្បករខ្មែរ បានអះអាងថា ការប្រកាសដាក់សម្ពាធលើតារាសិល្ប:ដែលស៊ិចស៊ី លើអ្នកនិពន្ធ និងផលិតករដែលបានផលិតបទចម្រៀង និងសាច់រឿងបណ្ដាលឲ្យមានការរិះគន់ គឺជាអ្វីដែលលោកចង់បាន។ ប៉ុន្តែបញ្ហាដែលលោកចង់ឃើញមុនគេ គឺវិធានការដោះស្រាយលើបុគ្គលមួយចំនួនដែលភ្លេចគិតថាខ្លួនឯងជាតារាសិល្ប: ហើយបានរំលេចភាពអសីលធម៌ តាមរយ:ការបង្ហោះពាក្យឈ្លោះគ្នា និងដៀលត្មិះបុគ្គលជាគូជម្លោះរបស់ខ្លួន ដែលធ្វើឲ្យលោកយល់ថាមិនអាចទទួលយកបាននោះតែម្ដង។
លោកបានបន្តថា តារាសិល្ប:ក៏ជាមនុស្សដែលអាចបញ្ចេញកំហឹងមិនខុសពីបុគ្គលទូទៅនោះទេ ប៉ុន្តែតារាសិល្ប:គឺបុគ្គលសាធារណ:មួយរូបដែលត្រូវបានមហាជនផ្ដល់ការឲ្យតម្លៃ។ ដូច្នេះមិនអាចចេះតែបង្ហោះពាក្យសម្ដីបង្ហាញឲ្យគេបានឃើញពីភាពអសីលធម៌របស់ខ្លួនឯងជាសាធារណ: បង្កឲ្យមានការប៉ះពាល់ដល់តម្លៃអ្នកសិល្ប:ដែលល្អៗផ្សេងទៀតកើតទេ។ លោកថាតារាសិល្ប:ដែលប្រើប្រព័ន្ធហ្វេសប៊ុកជេរអ្នកនេះ ជេរអ្នកនោះ ហើយសម្បូររឿងម្ដងហើយម្ដងទៀត និងប្រើភាសាមិនថ្លៃថ្នូរ គឺជាត្រីស្អុយដែលធ្វើឲ្យតម្លៃសីលធម៌នៅក្នុងពិភពសិល្ប:រងការរិះគន់។ លោកនិយាយថា«សម្រាប់ខ្ញុំអ្វីដែលក្រសួងលើកឡើងខ្ញុំគាំទ្រទាំងអស់ ប៉ុន្តែបញ្ហាអសីលធម៌របស់អ្នកសិល្ប:ដែលខ្ញុំមើលឃើញធ្ងន់ធ្ងរជាងគេ គឺបញ្ហាអ្នកសិល្ប:មួយចំនួនបានបង្ហោះជាសាធារណ:នូវសម្ដីមិនអាចទទួលយកបាននៅលើបណ្ដាញហ្វេសប៊ុកនោះតែម្ដង!… ការបង្ហោះសំណេរអសុរសរបស់ពួកគាត់ធ្វើឲ្យគេមើលងាយអ្នកសិល្ប:យើងមែនទែន ធ្វើឲ្យគេដៀលអ្នកសិល្ប: .. ត្រង់នឹងហើយដែលខ្ញុំយល់ថាក្រសួងត្រូវតែមានវិធានការលើអ្នកសិល្ប:ពីរបីនាក់ហ្នឹងធ្វើជាគំរូ ដើម្បីកុំឲ្យពួកគាត់ចេះតែបន្តប៉ាតណា ប៉ាតណី នាំឲ្យគេមើលងាយអ្នកសិល្ប:អញ្ចឹង!..»។
លោកបន្តថា វាដល់ពេលហើយដែលក្រសួងវប្បធម៌ត្រូវយកតារាសិល្ប:ដែលមានចរឹកក្អេងក្អាង និងខ្វះសីលធម៌ទាំងនោះទៅធ្វើការអប់រំ និងឈានដល់ការប្រកាសឲ្យបញ្ចប់អាជីពជាអ្នកសិល្ប:ម្ដង ដើម្បីកុំឲ្យកើតមានគំរូអាក្រក់ចំពោះតារាសិល្ប:ជំនាន់ក្រោយ។ ជាពិសេសនៅក្នុងកាល:ទេស:ដែលមានប្រព័ន្ធហ្វេសប៊ុកចែកចាយនូវភាពអសីលធម៌របស់ពួកគេធ្វើឲ្យមានការរិះគន់កាន់តែច្រើន នៅពេលតារាទាំងនោះបង្ហោះសំណេរដែលបង្ហាញពីការអប់រំខ្សោយរបស់ខ្លួនឯងក្នុងនាមជាអ្នកសិល្ប:។ លោកនិយាយថា«ខ្ញុំមិនយល់ថាតារាសិល្ប: ដែលបង្ហោះភាសាមិនថ្លៃថ្នូរកន្លងមក គាត់យល់យ៉ាងមិចទេ ប៉ុន្តែសម្រាប់ខ្ញុំគឺជារឿងអសីលធម៌ ហើយមហាជនគេមើលស្រាលអ្នកសិល្ប:យើងដោយសារពួកគាត់ពីរបីនាក់នឹង ជាពិសេសចំពោះតារាសិល្ប:ដែលឈ្លោះគ្នាទៅវិញទៅមក ខ្ញុំមិនយល់ដែលគាត់ខ្វះការយោគយល់ហើយ ទៅហែកទ្រូងឲ្យគេមើលងាយអ្នកសង្គមសិល្ប:ទាំងមូលនឹង!..»។
ការលើកឡើងរបស់លោកប្រធាន សុះ ម៉ាច គឺបន្ទាប់ពីរដ្ឋមន្ត្រីក្រសួងវប្បធម៌បានប្រកាសនៅក្នុងកិច្ចប្រជុំកាលពីថ្ងៃទី២៧ កញ្ញា នៅទីស្ដីការក្រសួងវប្បធម៌ ប្រកាសវិធានការដាក់ទោសចំពោះតារាសិល្ប: អ្នកនិពន្ធ និងផលិតករ ដែលត្រូវបានរកឃើញថាបានរំលេចនូវទង្វើ និងពាក្យសម្ដីបង្កប៉ះពាល់ដល់តម្លៃសីលធម៌ក្នុងនាមជាអ្នកសិល្ប: ដើម្បីឈានទៅបញ្ចប់អាជីពរបស់ពួកគេមិនឲ្យបន្តសកម្មភាពក្នុងនាមជាអ្នកសិល្ប:បន្តទៀតបើរកឃើញនូវចំណុចអវិជ្ជមានទាំងនោះ។ ការលើកឡើងរបស់លោកសុះ ម៉ាច ក៏បានកើតឡើងទន្ទឹមនឹងតារាសិល្ប:មួយចំនួនបានប្រើប្រព័ន្ធហ្វេសប៊ុកជេរប្រមាថគេឯងសម្ញ៉ែងមហាជន និងឈ្លោះគ្នា ធ្វើឲ្យគេមើលឃើញពីការធ្លាក់ចុះតម្លៃសីលធម៌របស់តារាសិល្ប: ដែលត្រូវបានមហាជនរិះគន់នាពេលចុងក្រោយ។ លោកសុះ ម៉ាច បញ្ជាក់ថា លោកនឹងជំរុញឲ្យការប្រកាសរបស់ក្រសួងធ្វើឡើងដោយមានប្រសិទ្ធិភាព ហើយលោកយល់ថាបើទោះជាតារាខ្លះបានលុបចោលនូវសំណេរអសីលធម៌របស់ខ្លួន ឬមានការសុំទោសក៏ដោយ ក៏លោកយល់ថាមិនគួរនឹងកើតមានសម្រាប់តារាសិល្ប:នៅលើបណ្ដាញហ្វេសប៊ុក ៕
មតិយោបល់