កណ្តាលៈ ករណីគ្រោះថ្នាក់ចរាចរណ៍មួយបានកើតឡើងនៅវេលា ១៦និង ០០នាទីថ្ងៃទី០២ ខែឧសភា ឆ្នាំ២០១៦ រវាងរថយន្តដឹកដី និងម៉ូតូ បណ្តាលឲ្យម្ចាស់ម៉ូតូរងរបួសធ្ងន់ នៅចំណុចកើតហេតុចន្លោះគីឡូម៉ែត្រ១៩ និង២០ ក្នុងភូមិស្លាបតាអោន ឃុំគគីរ ស្រុកកៀនស្វាយ ខេត្តកណ្ដាល។

ជនរងគ្រោះ ឈ្មោះ ទេព ភក្ដី ភេទប្រុស អាយុ២២ឆ្នាំ ជនជាតិខ្មែរមានទីលំនៅភូមិតាស្អាង ឃុំកំពង់ចំឡង ស្រុកស្វាយជ្រំ ខេត្តស្វាយរៀងបានជិះម៉ូតូមួយគ្រឿងម៉ាក់សេ១២៥ ពណ៌ក្រហម ស៊េរី២០១៤បិតតែម២០១៦ ពាក់ផ្លាក់លេខកណ្ដាល1I.4753 ទិសដៅភ្នំពេញ-អ្នកលឿងមកដល់ចំនុចកើតហេតុត្រូវបានរថយន្តដឹកដីកែច្នៃពណ៌ខៀវធុនតូចបើកបរក្នុងទិសដៅពីភ្នំពេញទៅអ្នកលឿង ដោយបើកបររំលោភលើចំណែកផ្លូវខាងស្ដាំរបស់ម៉ូតូ ក៏ជ្រុលបុកម៉ូតូរបស់ជនរងគ្រោះ បណ្ដាលឲ្យអ្នកបើកបរម៉ូតូរងរបួសបាក់ដៃនឹងជើងខាងឆ្វេង។

ចំណែកអ្នកបើកបររថយន្តមិនស្គាល់ឈ្មោះបានរត់គេចខ្លួនមុនសមត្ថកិច្ចទៅដល់។

ក្រោយកើតហេតុ មន្ត្រីជំនាញបានចុះដល់កន្លែងកើតហេតុបន្តនីតិវិធីបញ្ជូនជនរងគ្តោះទៅកាន់មន្ទីពេទ្យនឹងប្រមូលមធ្យោបាយមកកាន់អធិការដ្ឋាន៕