ភ្នំពេញ: គ្រឿងស្រវឹងពិតជានាំមកនូវផលវិបាកជាអវិជ្ជមានដ៏ច្រើនបំផុត សម្រាប់ផលប្រយោជន៍បុគ្គល សាធារណជន និងសង្គមជាតិ ជាពិសេសគ្រោះថ្នាក់ចរាចរណ៍ ដែលបង្កឲ្យមានមនុស្សស្លាប់ របួស ខូតខាតទ្រព្យសម្បត្តិ អំពើហិង្សានានាលើស្រ្តី និងកុមារ។

លោកស្រីឧបនាយករដ្ឋមន្រ្តី ម៉ែន សំអន រដ្ឋមន្រ្តីក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ច និងជាប្រធានសមាគមនារីកម្ពុជាដើម្បីសន្តិភាព និងអភិវឌ្ឍន៍ បានមានប្រសាសន៍នៅក្នុងសិក្ខាសាលាស្តីពីស្រ្តី និងគ្រឿងស្រវឹង នៅថ្ងៃទី២៤ ខែវិច្ឆិកា ឆ្នាំ២០១៦ នាសណ្ឋាគារអ៊ីនធើកុងទីណង់តាល់ថា “គ្រឿងស្រវឹងភាគច្រើនត្រូវបានប្រើប្រាស់នៅពេល ជប់លៀង មង្គលការ ជួបជុំគ្នា និងក្នុងបរិយាកាសសប្បាយរីករាយនានា ដែលភាគច្រើនបុរសៗតែងតែហូបគ្រឿងស្រវឹង។ ពេលខ្លះអ្នកកើតទុក្ខ ក៏សេពស្រវឹងដើម្បីបន្លប់ និងបំភ្លេចទុក្ខធ្វើឲ្យពិបាកនឹងបញ្ឈប់ ឬទប់ស្កាត់ការប្រើប្រាស់គ្រឿងស្រវឹងបានទាំងស្រុង។

លោកស្រីបានលើកឡើងថា “ផ្តើមចេញពីពាក្យស្លោក ស្រ្តីជាមាតានៃពិភពលោក ធ្វើឲ្យយើងគ្រប់គ្នាបានយល់យ៉ាងច្បាស់ថា ស្រ្តី គឺជាបុគ្គលសំខាន់ និងជាមេដឹកនាំមួយនៃគ្រប់សកម្មភាពសង្គម ដែលរួមមានកម្ពុជាផងដែរ ពោលគឺយើងគ្រប់គ្នាមានតួនាទីការពារពួកគេ ពីផលប៉ះពាល់ទាំងផ្លូវកាយ និងផ្លូវចិត្ត តែវាជារឿងគួរឲ្យសោកស្តាយដែលរហូតមកដល់បច្ចុប្បន្ននេះ យើងនៅតែឃើញមានស្រ្តី និងកុមារីកម្ពុជាជាច្រើន ត្រូវរងគ្រោះដោយហិង្សាដែលពាក់ព័ន្ធនឹងការសេពគ្រឿងញៀននេះ”។

លោកស្រីបញ្ជាក់ថា បុគ្គលអ្នកប្រព្រឹត្តអំពើហិង្សាទោះមាន ឬគ្មានជាតិស្រវឹង ពួកគេនៅតែត្រូវទទួលទោសដោយគ្មានករណីលើកលែងណាមួយនៅក្នុងច្បាប់របស់កម្ពុជា។ ការយកគ្រឿងស្រវឹងជាលេសមិនអាចជួយពួកគេបានទេ។ ម៉្យាងវិញទៀតយើងគ្រប់គ្នាបានដឹងតាមរយ:ភស្តុតាងវិទ្យាសាស្រ្តរបស់អង្គការសុខភាពពិភពលោកដែលថា “ការសេពគ្រឿងស្រវឹងធ្វើឲ្យប៉ះពាល់ដោយផ្ទាល់ទៅលើសុខភាព និងមុខងារខួរក្បាលរបស់បុគ្គលអ្នកសេព។ ដោយសារគ្រឿងស្រវឹង ពួកគេអាចឡើងជាតិអាស៊ីតក្នុងឈាម ដែលធ្វើឲ្យចុក និងហើមសន្លាក់ដៃជើង។ ដោយសារជាតិស្រវឹង ពួកគេវង្វេងស្មារតី និងបាត់បង់ភាពម្ចាស់ការលើខ្លួនឯង ហើយមានភាពយឺតយ៉ាវនៅក្នុងសកម្មភាព និងការធ្វើសុភវិនិច្ឆ័យចំពោះស្ថានការណ៍នានាដែលកើតឡើងជុំវិញខ្លួន”។ ការសេពគ្រឿងស្រវឹងគឺជាកត្តាលីករជំរុញឲ្យមានការប្រព្រឹត្តអំពើហិង្សា តាមការស្រាវជ្រាវរបស់ក្រសួងកិច្ចការនារី បានបង្ហាញថា អំពើហិង្សាក្នុងគ្រួសារកើនឡើងវាស្របពេលគ្នា នៃការសេពគ្រឿងស្រវឹងញឹកញាប់របស់ជនបង្ក ហេតុនេះអាចសន្និដ្ឋានថា ដើម្បីកាត់បន្ថយ ឬទប់ស្កាត់អំពើហិង្សាលើស្រ្តី ឬបុគ្គល ទូទៅចាំបាច់ត្រូវកាត់បន្ថយការសេពគ្រឿងស្រវឹង។

លោកស្រី បានស្នើដល់ស្ថាប័នពាក់ព័ន្ធដែលមានសមត្ថកិច្ចជំនាញ ពិនិត្យ និងមានវិធានការទប់ស្កាត់រាល់ខ្លឹមសាររូបភាពនៃការផ្សព្វផ្សាយ ដែលមានលក្ខណ:ជំរុញលើកទឹកចិត្តនៃការប្រើប្រាស់គ្រឿងស្រវឹងកាន់តែខ្លាំងតាមរយ:ប្រព័ន្ធផ្សព្វផ្សាយសាធារណ: ដើម្បីផ្តល់នូវភាពសុខសាន្តទាំងផ្លូវកាយ ផ្លូវចិត្តជូនប្រជាពលរដ្ឋ ជាពិសេសស្រ្តី និងកុមារ។

លោក មុំ គង់ នាយកប្រតិបត្តិអង្គការចលនាដើម្បីសុខភាពកម្ពុជាថ្លែងថា “ជារៀងរាល់ឆ្នាំ គ្រឿងស្រវឹងបានបណ្ដាលឲ្យមនុស្សស្លាប់ប្រមាណ៣.៣លាននាក់ នៅលើពិភពលោកដែលចំនួននេះស្មើនឹង៥,៩%នៃអត្រាមរណ:សរុបទូទាំងពិភពលោក។ គ្រឿងស្រវឹងជាកត្តាហានិភ័យចម្បងមួយ ក្នុងចំណោមកត្តាហានិភ័យចម្បងបួន ដែលបណ្ដាលឲ្យអ្នកប្រើប្រាស់កើតជំងឺមិនឆ្លងប្រមាណជាង២០០ប្រភេទ ដែលរួមមាន មហារីក ទឹកនោមផ្អែម លើសសម្ពាធឈាម ដាច់សរសៃខួរក្បាល។ គ្រឿងស្រវឹង ក៏ជាកត្តាហានិភ័យនៃគ្រោះថ្នាក់ចរាចរណ៍ អំពើហិង្សា និងបញ្ហាអសន្តិសុខផ្សេងៗផងដែរ។

គួរបញ្ជាក់ថា គ្រឿងស្រវឹងជាមូលហេតុទី១ដែលធ្វើឲ្យប្រជាពលរដ្ឋកម្ពុជាជិត៤០០នាក់ បានស្លាប់ដោយសារគ្រោះថ្នាក់ចរាចរណ៍នៅក្នុងឆ្នាំ២០១៥ ហើយគោលដៅនៃសិក្ខាសាលាស្តីពីស្រ្តី និងគ្រឿងស្រវឹង គឺចែករំលែកចំណេះដឹង ស្ដីពីផលប៉ះពាល់នៃការប្រើប្រាស់គ្រឿងស្រវឹង លើសង្គម និងបុគ្គលជាពិសេសស្រ្តី និងស្វែងរកនូវវិធានការប្រសិទ្ធភាព ដើម្បីកាត់បន្ថយការប្រើប្រាស់គ្រឿងស្រវឹង ជាពិសេសក្នុងចំណោមស្រ្តី និងយុវជន និងស្វែងរកការគាំទ្រឲ្យមានការអនុម័តច្បាប់លិខិតបទដ្ឋានគតិយុត្តិ ស្ដីពី ការត្រួតពិនិត្យផលិតផលគ្រឿងស្រវឹងនៅកម្ពុជាឲ្យកាន់តែមានប្រសិទ្ធភាព៕