កំពង់ធំៈ លោក សាយ ណរ៉ា ព្រះរាជអាជ្ញារង អមសាលាដំបូងខេត្តកំពង់ធំ បានដឹកនាំកម្លាំងចុះស្ទាក់ រថយន្តកូរ៉េមួយគ្រឿង ដែលមានការដឹកជញ្ជូនសត្វសេះ៤ក្បាល ដោយគ្មានច្បាប់អនុញ្ញាត នៅវេលាម៉ោង១០យប់ ថ្ងៃទី២៤ ខែវិច្ឆិកា ឆ្នាំ២០១៦ ត្រង់ចំណុចទល់មុខការ៉ាស់សាំង តេលា ស្ថិតនៅក្នុងភូមិអាចារ្យលាក់ សង្កាត់អាចារ្យលាក់ ក្រុងស្ទឹងសែន ខេត្តកំពង់ធំ។

តាមការឆ្លើយបំភ្លឺរបស់តៃកុងឡាន បានឲ្យដឹងថាលោកបានបើក រថយន្ដមួយគ្រឿងដឹកសត្វសេះ ចំនួន៤ក្បាលចេញពីប្រទេសថៃ តាមច្រកអូរបីជាន់ ទឹកដីខេត្តបន្ទាយមានជ័យ ឆ្លងកាត់ខេត្តសៀមរាប តាមរយៈរថយន្ត ម៉ាកហ៊ីយ៉ានដាយ ពណ៌ស ទ្រុងពណ៌បៃតង ចំណុះ៥តោន ពាក់ស្លាកលេខ ភ្នំពេញ 3C-5766។

សូមបញ្ជាក់ដែរថា ការដឹកជញ្ជូនសត្វសេះនេះ ត្រូវបានគេដឹងថាជាកម្មសិទ្ធរបស់ក្រុមហ៊ុន អង្គរសុខសារិទ្ធិមានជ័យ គឺធ្វើកាដឹកជញ្ជូនដោយមិនប្រក្រតី ដោយលួចនាំចូលតាមច្រកអូរ៣ជាន់ ស្រុកអូជ្រៅ ខេត្តបន្ទាយមានជ័យ ដែលជាប្រភេទសេះ ប្រណាំង នាំចូលពីប្រទេសអ៊ឺរ៉ុប ក្នុង១ក្បាលមានតម្លៃរាប់ម៉ឺនដុល្លារ។ ការឃាត់រថយន្ដនេះពាក់ព័ន្ធនិងគ្មានលិខិតបញ្ជាក់សុខភាពសត្វ ពីប្រទេសដែលនាំចេញឯកសារមិនគ្រប់គ្រាន់ ត្រូវបានគេស្គាល់ថាជាក្រុមហ៊ុននាំចូល របស់លោក ជឹម សុខ ប្រធានក្រុមហ៊ុន អង្គរ សុខសារិទ្ធិមានជ័យ។

ពាក់ព័ន្ធនិងបញ្ហានេះលោក ជឹម សុខ ប្រធានក្រុមហ៊ុន អង្គរ សុខសារិទ្ធិមានជ័យ មិនបានបំភ្លឺជុំវិញការនាំចូលនេះទេ ដោយសារយើងទំនាក់ទំនងតាមទូសព្ទ ហើយលោកឆ្លើយ ថាជារវល់ប្រជុំលោកនឹងទំនាក់ទំនងមកវិញ។

លោក អ៊ិត សុធា ព្រះរាជអាជ្ញាអមសាលាដំបូងបានបញ្ជាក់ឲ្យដឹងថា ការឃាត់រថយន្ដដឹកសេះនេះពាក់ព័ន្ធនិងគ្មានឯកសារគ្រប់គ្រាន់ ហើយជាសេះប្រភេទប្រណាំងនៅក្នុងប្រទេសអ៊ឺរ៉ុប មានតម្លៃរាប់សែនដុល្លារ ក្រោយពីឃាត់រួចបានយកវត្ថុតាងមករក្សាទុកនៅមន្ទីរការិយាល័យពហុព្យាបាលនិងសត្វឃាត រង់ចាំម្ចាស់ក្រុមហ៊ុនចូលខ្លួនមកដោះស្រាយតាមនីតិវិធីច្បាប់៕

https://youtu.be/3ffDuV9x2Oc